22
1 “ಮಾರ ಬಾವೊ, ಯಹೂದಿ ದೋಸ್ತಿವೊ, ಮೇ ಹಮ್ಕೆ ತುಮೂನ ದೆವುಸ್ತೆ ಫೇಡ್ನ ಖ್ಹಮ್‍ಜೊ ಕರಿ ಚಿಕ್ರಿ ಬೋಲ್ಯೊ.
2 ಇವ್ಣಿಜೋ಼ಡೆ ಇಬ್ರಿಯ ಬೋಲಿಮ ವಾತೆ ಬೋಲಾನು ಖ್ಹಮ್‌ಜಿನ್‌ ಇವ್ಣೆ ಬಿಜೂ಼ಬಿ ಖ್ಹೊಪೊ ಪಡೀಗು. ತದೆ ಇನೆ ಶಾತ್ ಬೋಲ್ಯೊಕತೊ;
3 ಮೇ ಕಿಲಿಕ್ಯಾನು ತಾರ್ಸ ಖ್ಹಯೇರ್‌ಮ ಪೈದಹುಯೊತೆ ಯೆಹೂದ್ಯವಾಳೊ. ಕತೋಬಿ ಆಸ್ ಖ್ಹಯೇರ್‌ಮ ಪಳ್ಯೊಹುಯೊ.ಯೆರೂಸಲೇಮ್ಮ ಮೇ ಗಮಲಿಯೇಲನೊ ಶಿಷ್ಯಹುಯಿನ್, ಹಮಾರ ಗುರುಗುರಬ್‌ಲ್ಯನು ಧರ್ಮಶಾಸ್ತ್ರನು ಖ್ಹಾರೂಸ್ ಶಿಕಿರಾಖ್ಯೊಸ್; ಹಮ್ಕೆ ತುಮೆಖ್ಹಾರು ಛಾ಼ತೆ ತಿಮ್ಮಸ್ ಮೇಬಿ ದೇವ್‌ನೊ ದಿಲ್‌ಲಾಗ್ಯೊತೆ ಹುಯಿರ‍್ಹೋಥೊ.
4 ಆ ಮಾರಗ್‌ಪರ್‌ ಚಾ಼ಲವಾಳಾನ ಖ್ಹತಾವ್‍ತೊಹುಯಿನ್ ತಯೇಡ ಪರ್ಖ್ಹಾ ಖೇಚಿಲಾಯಿನ್ ಜೇಲ್‌ಮ ಧಕೆಲಿನ್ ಇವ್ಣುನ ಮರ್‌ನಾಖನಾಬಿ ಕಚ಼್ ಖಾದೊಕೊಯ್ನಿ.
5 ಅನಿಬಾರೇಮ ಗಲ್‌ಢಯಾಜಕ್‌ಬಿ ಮೋಟಿಸಭೆವಾಳು ಖ್ಹಾರು ಸಾಕ್ಷಿ ಹುಯಿರ‍್ಹುಸ್. ಇವ್ಣೇಥಿಸ್ ದಮಸ್ಕಮ ಥೂತೆ ಯಹೂದಿ ದೋಸ್ತಿನ ದ್ಯವಾನಖ್ಹಾಜೆ ಅವ್ಣಕನ ಥೂತೆ ಚಿಟ್ಟಿನ ಮಾಂಗಿಲೀನ್ ಇವ್ಣುನ ಬೇಡಿ ಘಾಲಿನ್ ಖ್ಹತಾವನ ಯೆರೂಸಲೇಮ್ಮ ಖೇಚಿಲಿ ಆವಾನ ದಮಸ್ಕಮ ಮೇ ವಳ್ಯೊಜಾ಼ತೋಥೊ.
ಪೌಲನೆ ಇನು ಮನ್ ಫರಾವನಿ ಬಾರೇಮ ಬೋಲ್ಯೋತೆ
(ಅಪೊ 9:1-19; 26:12-18)
6 ಖ್ಹುಮಾರ್ ಭಾರಘಂಟಾನಿ ವಖ್ಹತ್‌ಮ ಮೇ ದಮಸ್ಕನ ಖನ್ನೆ ಜೈ಼ರ‍್ಹೂಥು. ತದೆ ಅಪ್‌ಗುಪ್‌ಥೀಸ್ ಆಕಾಶ್‌ಮಾಥು ಏಕ್‌ ಉಜಾ಼ಳು ಮಾರ ಅಶ್‌ಪಿಶ್‌ ಉಜಾ಼ಖ್ಹ್‌ಥಿ ಝ಼ಮ್‍ಕ್ಯು.
7 ಮೇ ಜ಼ಮೀನ್‌ಪರ್ ರಡ್ಕಿಗಯೊ. ತದೆ ‘ಸೌಲ’ ಸೌಲ, ಮನ ಶನ ಖ್ಹತಾವಸ್? ಕರಿ ಮನ ಬೋಲ್ಯುತೆ ಏಕ್‌ ಆವಾಜ಼್‌ನ ಖ್ಹಮ್‍ಜ್ಯೊ.
8 ಇನ ಮೇ, ‘ಪ್ರಭು ತೂ ಕೋಣ್?’ ಕರಿ ಪುಛಾ಼ವದೀನ್, ‘ತೂ ಖ್ಹತವ್‍ಕರಸ್ತೆ ನಜ಼ರೇತ್‌ನೊ ಯೇಸುಸ್ ಮೇ’ ಕರಿ ಇನೆ ಮನ ಬೋಲ್ಯೊ.
9 ಮಾರಿ ಜೋ಼ಡೆ ರ‍್ಹವಾಳು ಉಜಾ಼ಳಾನ ದೇಖ್ಯುಪಣ್ಕಿ ಮಾರಿ ಜೋ಼ಡೆ ವಾತೆಬೋಲ್ಯುತೆ ಯೋ ಅವಾಜ಼್ ಖ್ಹಮ್‍ಜ್ಯುಕೊಯ್ನಿ.
10 ತದೆ ಮೆ ‘ಪ್ರಭು ಮೇ ಶಾತ್‍ಕರ್ನು?’ ಕರಿ ಪುಛಾ಼ಯೊ. ತದೆ ಪ್ರಭುನೆ, ತೂ ಉಠೀನ್‌’ ದಮಸ್ಕಮ ಜಾ಼, ತೂ ಶಾತ್ ಶಾತ್ ಕರ್ನುಕಿ ಯೋ ಖ್ಹಾರು ತುನ ಹಿಜ್ಜಾ಼ ಮಾಲುಮ್ ಪಡ್‌ಶೆ; ಕರಿ ಬೋಲ್ಯೊ.
11 ಯೋ ಉಜಾ಼ಳಾನಿ ಮಹಿಮೆಥಿ ಮಾರ ಡೋಳ ಕಾಣಹುಯಿಗಾತೆ ಇನಖ್ಹಾಜೆ ಮಾರಿಜೋ಼ಡೆ ರ‍್ಹವಾಳುಖ್ಹಾರು, ಮಾರೊ ಹಾತ್‍ಧರೀನ್ ದಮಸ್ಕಮ ಬುಲೈಲಿನ್ ಗಯು.
12 ಹಿಜ್ಜಾ಼ ಧರ್ಮಶಾಸ್ತ್ರನಿ ಬಾರೇಮ ಬರೋಬರ್ ಚಾ಼ಲಿಲ್ಯವಾಳೊ ದೇವ್‌ನೊ ಭಕ್ತಾಬಿ ಯೋ ಝ಼ಗೋನು ಯೆಹೂದ್ಯರ್ ಖ್ಹಾರಾಥಿ ಅಛ್ಛೊ಼ಕರಿ ನಾಮ್ ಕಮಾಯೊಹುಯೊ ಅನನೀಯಕರಿ ಏಕ್‍ಜ಼ಣೊ ಮಾರಕನ ಆಯಿ ಭೀರಿನ್,
13 ಇನೆ, ‘ಮಾರೊ ಭೈ ಸೌಲ, ತುನ ಡೋಳ ದೆಖವಾದೆ’ ಕರಿ ಬೋಲ್ಯೊ. ತದ್‌ನು ತದೇಸ್‌ ಮನ ಡೋಳಾನಿ ಜೋ಼ತ್ ಆಯಿನ್ ಮನ ದೇಖವಲಗ್ಯು. ಮೇ ಇನ ದೇಖ್ಯೊ.
14 ತದೆ ಅನನೀಯನೆ, ‘ತುಮಾರೊ ಗುರುಖ್ಹಾರಾನೊ ದೇವ್ ಘಣ ದನ್ನ ಪಾರಸ್ ತುನ ಚೂ಼ಣಿಲಿದೊ. ತೂ ದೇವ್ನಿ ಖ್ಹಯಾಲ್ನ ಮಾಲುಮ್ ಕರಿಲ್ಯವಾನಾಬಿ ನೀತಿವಾಳೊಸೇವಕ್ನ ದೇಕ್ಣುಕರಿಬೀ, ಯೊ ಇನಿ ಶೊಂತ್ ಅವಾಜ಼್‌ನಿ ವಾತೆನ ಖ್ಹಮಜ಼್‌ಣುಕರಿ ದೇವ್ನೆ ತುನ ನೇಮ್‌ಶಾಯೋತೆ.
15 ತೂ ದೇಖಿನ್‍, ಖ್ಹಮ್‍ಜ್ಯೊತೆ ಬಾರೇಮ ಖ್ಹಾರಾಸ್ ಅದ್ಮಿನ ಖ್ಹಾಮ್ಣೆ ಇನಿ ಸಾಕ್ಷಿ ಬೋಲ್‌ನು.
16 ತೂ ಹಮ್ಕೆ ಶನ ಖ್ಹೊಪ್‍ರ‍್ಹೇಸ್ ಉಟ್? ಪ್ರಭುನ ನಾಮ್ನ ಬೋಲವಾಳೊಹುಯಿನ್, ಬ್ಯಾಪ್ತಿಸ್ಮ ಕರೈಲೀನ್ ತಾರ ಪಾಪ್ನ ದ್ಹೋಯಿಲೆ ಅಜು಼ ತು ಇನಖ್ಹಾಜೆ ಪ್ರಾರ್ಥನೆ ಕರ್‌ ಕರಿ ಬೋಲ್ಯೊ.
ಯೆಹೂದ್ಯರ್ ಕಾಹೆತೆ ಅದ್ಮಿನ ಇಚ಼್‌ಮ ಉಪದೇಶ್ ಕರಾನ ಪೌಲಾನಿ ಬುಲಾವ್ಣಿ
17 ಮೇ ಯೆರೂಸಲೇಮ್ಮ ಪಾಛೊ಼ ಫರೀನ್ ಐನ್ ದೇವ್ನಿ ಮಂದಿರ್‌ಮ ಪ್ರಾರ್ಥನೆ ಕರುಕರಾನಿ ವಖ್ಹತ್‌ಮ ಮೆ ಏಕ್‌ ದರ್ಶನ್ ದೇಖ್ಯೊ.
18 ಮೇ ಪ್ರಭುನ ದೇಖ್ಯೊ. ಇನೆ ಮನ, “ಒಗ್ಗಿ ಯೆರೂಸಲೇಮ್‍ಥು ನಿಕಳ್ ಮಾರಿ ಬಾರೇಮ ತೂ ಬೋಲಾನಿ ಸಾಕ್ಷಿನ ಆ ಖ್ಹಾರು ಅದ್ಮಿ ಮಾನಿಲೇಯಿ ಕೊಯ್ನಿ” ಕರಿ ಬೋಲ್ಯೊ.
19 ಇನ ಮೇ, ‘ಪ್ರಭು, ಮೇ ಅಖ್ಖಾಸ್ ಸಬೆನಿ ಝ಼ಗೋಮ ತಾರಾಮ ವಿಶ್ವಾಸ್ ರಾಖ್ಯಹುಯ ಅದ್ಮಿಖ್ಹಾರಾನ ಮೆ ಜೇಲ್‌ಮ ಧಕೆಲಿನ್ ಮರಾಯೊಹುಯೊ ಮೇಸ್ ಕರಿ,
20 ಅಜು಼ ತಾರಿ ಸಾಕ್ಷಿ ಹುಯಿರೋತೆ ಸ್ತೆಫನನು ಲ್ಹೋಯಿ ರಂಚಾ಼ವನಿ ವಖ್ಹ್‌ತೆ, ಮೇಬಿ ಇನ ಮಾನಿನ್ ಇನ ಮಾರವಾಳಾನು ಝ಼ಗ್ಗಾಕನ ಟಿವೈನ್ ಭೀಯೊಥೋನಿ, ಕರಿ ಇವ್ಣೆ ಮಾಲುಮ್ ಕರಿರಾಖವಳು ಹುಯಿರುಸ್.
21 ತದೆ ಪ್ರಭುನೆ; ಜಾ಼ ಮೇ ತುನ ದೂರ್ ಯೆಹೂದ್ಯರ್‌ಕಾಹೆತೆ ಅದ್ಮಿನ ತಬರ್‌ಖಾಮ ಮೋಕ್ಲುಸ್’ ಕರಿ ಮನ ಬೋಲ್ಯೊ.”
22 ಆ ವಾತ್ ಬೋಲಲಗು ಅದ್ಮಿಖ್ಹಾರು ಪೌಲನಿ ವಾತ್ನ ಕಾನ್‍ಲಾಗಾಡಿ ಖ್ಹಮ್‌ಜ್ಯು; ಅನಪಾರ್ ಇವ್ಣೆ “ಅಥ್ರಾನವಾಳಾನ ಜ಼ಮೀನ್‍ಪರ್ಥು ಕಾಡಿನಾಕ್; ಆ ಬಚಾ಼ವನ ಲ್ಹಾಯೇಕ್‍ ಕೊಯ್ನಿ” ಕರಿ ಚಿಕ್ರಿ ಬೋಲ್ಯು.
23 ಇವ್ಣೆ ಚಿಕ್ರಾಣ್ ಮ್ಹೇಲ್‍ತು, ಇವ್ಣು ಲುಂಗ್ಡಾನ ಫಾಡಿಲೇತು ಹುಯಿನ್, ಮಾಟಿ ಉಡಾವ್ತು ರ‍್ಹಯು.
24 ತದೆ ರೋಮ್‌ನೊ ಸೇನಾಧಿಪತಿನೆ ಪೌಲನ ಕೋಟೆನ ಮ್ಹೇಲಿಜಾ಼ವ್ಣುಕರಿ ಹುಕುಮ್ ದೀನ್, ಅದ್ಮಿಖ್ಹಾರು ಅಮ್ ಪೌಲನಿ ವಿರೋದ್ ಚಿಕ್ರಾಣ್ ಮ್ಹೇಲುಕರಾಸ್ತೆ ಕಾರಣ್ ಶಾತ್ ಕರಿ ಫುಚಾ಼ವ್ಣುಕರಿ ಸೆನಾದಿಪತಿನು ಆಖ್ಹ್ ಹುಯಿರ‍್ಹೀಥಿ.
25 ಇವ್ಣೆ ಪೌಲನ ಡುಗೈನ್ ಭಾಂದಿನ್ ಮಾರಾನಿ ವಖ್ಹ್‌ತೆ ಇನ ಖನ್ನೆ ಭಿಯುಥೂತೆ ಖ್ಹೋಶಿಪಾಯಿನ ಮೋಟಾನ, “ರೋಮ್ ಪ್ರಜೆ ಹುಯಿರ‍್ಹವಾಳ ಅದ್ಮಿನ ಅಪರಾದಿ ಕರಿನ್ ತೀರ್ಪ್ ಹುವಾನ ಅಗಾಡಿಸ್ ಕೋಲ್ಡೆಖ್ಹು ಮಾರ‍್ವಾನು ನ್ಯಾವ್‌ಕಿ ಶು?” ಕರಿ ಪುಛಾ಼ಯೊ.
26 ಯೋ ಖ್ಹೋಶಿಪಾಯಿನ ಮೋಟಾನೆ ಅನ ಖ್ಹಮ್‌ಜಿನ್‌ ತದ್‌ನು ತದೇಸ್‌ ಸೈನಾಧಿಪತಿಕನ ಜೈ಼ನ್ “ತೂ ಶಾತ್ ಕರುಕರಸ್ ಕರಿ ತುನ ಮಾಲುಮ್‍ಕಿ ಶು? ಆ ಅದ್ಮಿ ರೋಮ್‌ನೊ ಪ್ರಜೆ!” ಕರಿ ಬೋಲ್ಯೊ.
27 ತದೆ ಸೇನಾಧಿಪತಿ ಪೌಲಕನ ಐನ್, “ಬೋಲ್ ತು ರೋಮ್‌ನೊ ಪ್ರಜೆಕಿಶು?” ಕರಿ ಪುಛಾ಼ವಮ, ಪೌಲನೆ “ಓಹೊ” ಕರಿ ಜ಼ವಾಬ್ ದಿದೊ.
28 ತದೆ ಸೇನಾಧಿಪತಿನೆ, “ಮೇ ರೋಮ್‍ನು ಪ್ರಜೆ ಹುವಾನ ಘಣು ಪೈಶಾದಿದೊ” ಕರಿ ಬೋಲ್ಯೊ. ಕತೋಬಿ ಇನ ಪೌಲನೆ, “ಮೇ ಪೈದಾಖ್ಹ್‌ಥೋಸ್‌ ರೋಮ್‍ನು ಪ್ರಜೆ” ಕರಿ ಬೋಲ್ಯೊ.
29 ಪೌಲನ ಪುಛಾ಼ವ್ಣು ಕರಿ ಆಯುಹುಯು ಖ್ಹಾರುಜ಼ಣು ತದ್‌ನು ತದೇಸ್‌ ಇನಕಂಥು ಚ಼ಲಿಗಯು. ಅತ್ರೇಸ್ ಕಾಹೆತೆ ಸೇನಾಧಿಪತಿನೆ ಪೌಲ ರೋಮ್‍ನು ಪ್ರಜೆಕರಿ ಮಾಲುಮ್ ಕರಿಲೀನ್, ಇನ ಭಂಧೈರಾಖ್ಯೊಥೋತೆ ಇನಖ್ಹಾಜೆ ಡರ‍್ಯೊ.
ನ್ಯಾವ್‍ನಿ ಸಬೆನ ಖ್ಹಾಮ್ಣೆ ಪೌಲ
30 ಪೌಲನ ಉಪ್ಪರ್ ಯೆಹೂದ್ಯರ್ ಖ್ಹಾರು ಶನ ಅಪರಾದ್ ನಾಖುಕರಸ್ ಕರಿ ಮಾಲುಮ್ ಕರಿಲ್ಯಾವಾನಖ್ಹಾಜೆ ಸೇನಾಧಿಪತಿನೆ ತೀರ್ಮಾನ್ ಕರೀನ್, ಇನವ್ಹಾಣೆ ಪೌಲನ ಬೇಡಿನ ಛೋ಼ಡಿನ್ ಮಹಾಯಾಜಕಬಿ ನ್ಯಾವ್ನಿಸಬೆವಾಳು ಖ್ಹಾರುಸ್ ಭರಾವ್ಣುಕರಿ ಹುಕುಮ್ ದೀನ್, ಪೌಲನ ಬುಲೈಲೀಜೈ಼ನ್ ಇವ್ಣಖ್ಹಾಮೆ ಭೀರಾಖ್ಯೊ.