1 ಹಮೆ ಇವ್ಣುನ ಮೋಕ್ಲಿನ್ ಇನಪಾರ್ ಜ಼ಹಾಜ಼್‌ಪರ್ ಛ಼ಡಿನ್ ಕೋಸ್ ಟಾಪಾಮ ಆಯ. ಪಾಛ಼್‌ಲ್ಯದನ್ನೆ ರೋದ ಟಾಪನ ಜೈ಼ನ್ ಹಿಜ್ಜಾ಼ಥ ಪತರ ಖ್ಹಯೇರ‍್ನ ಆಯ. 2 ಹಿಜ್ಜಾ಼ ಫೊಯಿನಿಕೆ ಜಾ಼ವಾನಿ ಜ಼ಹಾಜ಼್‌ನ ದೇಖಿ ಇನಾಪರ್ ಚ಼ಢೀನ್ ಗಯ. 3 ಖ್ಹಾಮ್ಣೆ ಕುಪ್ರ ಟಾಪು ದೆಖಾಯು. ಇನ ಡಾವಿಬಾಜು಼ ಮ್ಹೆಂದಿನ್ ಸಿರಿಯ ದೇಖ್ಹ್‌ ಭಣಿಕರಿ ಚಾ಼ಲ್ತಹುಯಿನ್ ತೂರ್ ಖ್ಹಯೇರ‍್ನ ಐನ್ ಉತ್‍ರ‍್ಯ. ಶನಕತೊ ಹಿಜ್ಜಾ಼ ಜ಼ಹಾಜ಼್‌ನು ಜಿನಖ್ಹ್‌ ಅಖ್ಖು ಉತಾರ‍್ನು ಥೂ. 4 ಹಿಜ್ಜಾ಼ ವಿಶ್ವಾಸಿಖ್ಹಾರನ ಢೂಂಡಿಕಾಡಿನ್ ಖ್ಹಾತ್‍ದನ್ ರ‍್ಹಿಯ. ಇವ್ಣೆ ಪವಿತ್ರಾತ್ಮನಿ ಖ್ಹಯಾಲ್‌ಥಿ ಪೌಲನ, “ತೂ ಯೆರೂಸಲೇಮ್ಮ ಗೋಡೊ ನಕೊ ಮ್ಹೇಲಿಶ್” ಕರಿ ಬೋಲ್ಯು. 5 ಕತೋಬಿ ಹಮಾರಿ ಭೇಟಿ ಖ್ಹತಮ್ ಕರೀನ್, ಹಿಜ್ಜಾ಼ಥ ನಿಕ್ಳಾನಿ ವಖ್ಹತ್‌ಮ ಯೊ ವಿಶ್ವಾಸಿ ಖ್ಹಾರು ಖ್ಹಯೇರ‍್ನ ಭಾರ್‌ಲಗು ಐನ್ ಇವ್ಣ ಬಾವಣ್‍ ಲಡ್ಕಾವ್‌ನಿ ಜೋ಼ಡ್ಮ ಮ್ಹೇಲಾನ ಆಯು.ಅಜು಼ ಹಮೆಖ್ಹಾರು ದರ‍್ಯಾವ್‍ನಿ ಕನಾರೆ ಢುಕ್‍ಣ್ಯಮೇಟೆ ಹುಯಿನ್ ಪ್ರಾರ್ಥನೆ ಕರೀನ್, 6 ಬಾದ್ಮ ಹಮೆ ಏಕ್‌ಥಿ ಏಕ್‌ ಖ್ಹರ್ತಿನಿ ಖ್ಹಲಾಮ್ ಕರೀನ್ ಜ಼ಹಾಜ಼್ ಚ಼ಢೀನ್ ಇವ್ಣೆ ಪಾಛು಼ಫರಿ ಇವ್ಣ ಘರೆಗಯು. 7 ಹಮೆ ತೂರ್ ಖ್ಹಯೇರ್‌ಥಿ ನಿಕ್ಳಿನ್ ಪ್ತೊಲೆಮಾಯ ಖ್ಹಯೇರ‍್ನ ಜೈ಼ನ್ ದರ‍್ಯಾವ್‍ನಿ ಚಾ಼ಲ್ ಖ್ಹತಮ್ ಕರ‍್ಯಾ. ಹಿಜ಼್ಜಾಥೂತೆ ವಿಶ್ವಾಸಿಖ್ಹಾರನ ಖ್ಹಲಾಮ್ ಕರೀನ್, ಇವ್ಣಿ ಜೋ಼ಡೆ ಏಕ್‍ರೋಜ಼್ ರ‍್ಹೀನ್, 8 ಇನವ್ಹಾಣೆ ನಿಕ್ಳಿ ಕೈಸರೈನು ಖ್ಹಯೇರ‍್ನ ಆಯ. ಹಿಜ್ಜಾ಼ ಹಮೆ ಫಿಲಿಪ್ಪನ ಘರ್‌ಮ ರ‍್ಹಯ. ಸುವಾರ್ತೆ ಖ್ಹಮ್‍ಜಾ಼ಡನೂಸ್ ಫಿಲಿಪ್ಪನು ಕಾಮ್ ಹುಯಿರ‍್ಹುಥು. ಹೈರೋತೆ ಸೆಜರೇಯಮ ಮದತ್ ಕರಾವಾಳ ಖ್ಹಾತ್‍ಜ಼ಣಾಮ ಆಬಿ ಏಕ್‍ಜ಼ಣೊ ಹುಯಿರೋಥೊ. 9 ಇನ ಚಾರ್‌ಜ಼ಣಿ ಕವಾರಿ ಛೋ಼ರಿಯೇಥಿ. ಇವ್ಣೆ ಖ್ಹಾರಿಜ಼ಣಿ ದೇವ್ನ ವಾತೇನ ಪ್ರವಾದ್‌ನೆ ಕರಾವಳಿಯೆ ಹುಯಿರ‍್ಹಿಥಿ. 10 ಹಮೆ ಹಿಜ್ಜಾ಼ ಥೋಡದನ್ ರ‍್ಹವಾನವಾರ್ ಅಗಬ ಕರಿ ಏಕ್‌ ಪ್ರವಾದಿ, ಯೂದಾಯಥೊ ಮಾರಕನ ಆಯೊ. 11 ಯೊ ಹಮಾರಕನ ಐನ್ ಪೌಲನು ಕಂಬರ್‌ನು ಕಷ್‍ಬಂದ್‍ನ ಪಾಡಿನ್ ಇನ ಹಾತ್‌ಗೋಡಕೇಡೆ ಭಾಂಧಿಲೀನ್; ಆ ಕಷ್‌ಬಂದ್‌ ಕಿನೂಕಿ ಇನ ಯೆಹೂದ್ಯರ್‌ನ ಖ್ಹಾರು ಅಮ್ಮಸ್ ಯೆರೂಸಲೇಮ್ಮ ಭಾಂದಿನ್ ಯೆಹೂದ್ಯರ್‌ಕಾಹೆತೆ ಇವ್ಣ ಹಾತ್ಮ ದಿಶೆಕರಿ ಪವಿತ್ರಾತ್ಮ ಬೋಲುಕರಸ್ ಕರಿ ಬೋಲ್ಯೊ. 12 ಕದೆ ಆ ವಾತೆನ ಖ್ಹಮ್‍ಜ್ಯಾಕಿ ಹಮೇಬಿ ಯೋ ಗಾಮ್‍ವಾಳುಬಿ ತೂ ಯೆರೂಸಲೇಮ್‌ನ ನಕೊ ಜಾ಼ಕರಿ ಪೌಲನ ಗಿಂಗೈಲಿದ. 13 ಇನಖ್ಹಾಜೆ ಪೌಲನೆ, “ತುಮೆ ಆಂಝು಼ನಾಖಿನ್ ತುಮೆ ಶನ ಮಾರು ದಿಲ್‌ತೋಡಾವೊಸ್? ಮೆ ಯೇಸುನ ನಾಮ್ನಖ್ಹಾಜೆ ಯೆರೂಸಲೇಮ್ಮ ಭಂದಿಹುವಾನು ಕಾಹೆತೆ ಪ್ರಭುನಖ್ಹಾಜೆ ಮರನಾಬಿ ತಯಾರ್ ಛೂ಼” ಕರಿ ಬೋಲ್ಯೊ. 14 ಯೋ ಖ್ಹಮ್‍ಜ್ಯೊಕೊಂತೆ ದೇಖಿನ್ ಪ್ರಭುನಿ ಮರ್ಜಿ ಕಿಮ್ ಛಾ಼ಕಿ ತಿಮ್ ಚಾ಼ಲಾದೆ ಕರಿ ಹಮೆ ಖ್ಹೊಪ್‌ ರ‍್ಹೀಗಯ. 15 ಆ ಖ್ಹಾರದನ್ ಹುವಾನಪಾರ್ ಹಮೆ ಖ್ಹುದ್ರೀನ್‌ ಯೆರೂಸಲೇಮ್ನ ನಿಕ್‍ಳ್ಯ. 16 ಕೈಸರೈಥು ಥೋಡ ಶಿಷ್ಯರ್‌ ಹಮಾರಿ ಜೋ಼ಡ್ಮ ಐನ್, ಮ್ನಾಸೋನಕರಿ ಏಕ್‍ಜ಼ಣಾನ ಘರ್‌ಮ ಹಮೂನ ರ‍್ಹವಾನಖ್ಹಾಜೆ ಬುಲೈಲಿನ್ ಗಯು. ಯೋ ಕುಪ್ರಥು ಆಯುತೆ ಪಹಿಲ ಶಿಷ್ಯರ್‌ಮ ಏಕ್‍ಜ಼ಣೊ ಥೊ.

17 ಹಮೆ ಯೆರೂಸಲೇಮ್ ಆವಾದಿನ್ ವಿಶ್ವಾಸಿಖ್ಹಾರು ಹಮೂನ ಖುಷಿಥಿ ಬುಲೈಲಿದಾ. 18 ಅಗಲ್ಯದನ್ನೆ ಪೌಲನೆ ಹಮುನಖ್ಹಾರನ ಬುಲೈಲಿನ್ ಯಾಕೋಬನ ಮಳಾನ ಗಯ. ತದೆ ಸಬೇನು ಖ್ಹಾರಾಸ್ ಗಲ್‌ಢಬಿ ಹಿಜ್ಜಾ಼ಸ್ ಥಾ. 19 ಪೌಲನೆ ಇವ್ಣುನ ಖ್ಹಲಾಮ್‍ಕರೀನ್ ಇನಿ ಸೇವೆಥಿ ದೇವ್ನೆ ಕರ‍್ಯೊತೆ ಪೂರ ಕಾಮ್ನ ಯೆಹೂದ್ಯರ್‌ಕಾಹೆತೆ ಅದ್ಮಿಖ್ಹಾರಾನ ಬೀಚ್ಮ ಯೊ ಬೋಲಿವತಾಳ್ಯೊ. 20 ಇವ್ಣೆ ಯೋಖ್ಹಾರು ಖ್ಹಮ್‌ಜಿನ್‌ ದೇವ್ನ ಖ್ಹರಾಯು. ತದೆ ಇವ್ಣೆ ಪೌಲನ, “ಭೈ, ಹಜಾ಼ರೊ ಅದ್ಮಿ ಯೆಹೂದ್ಯರ್‌ಖ್ಹಾರು ವಿಶ್ವಾಸಿ ಹುಯಿರ‍್ಹುತೆ ತೂ ದೇಖಾಸ್ನಿ, ಇವ್ಣೆಖ್ಹಾರು ಧರ್ಮಶಾಸ್ತ್ರನ ದಿಲ್‌ಲಗಾಡವಾಳು ಹುಯಿರ‍್ಹುಸ್. 21 ಯೆಹೂದ್ಯರ್‌ಕಾಹೆತೆ ಅದ್ಮಿನ ಬೀಚ್ಮ ರ‍್ಹವಾಳು ಖ್ಹಾರೂಸ್ ಯೆಹೂದ್ಯರ್‌ನ, “ತುಮೆ ತುಮಾರ ಲಡ್ಕಖ್ಹಾರನ ಖ್ಹತ್ನ ನಾಕರಾವ್ಣು ಇವ್ಣು ಪದತ್ತಿನಿಘೋಣಿ ನಾಚಾ಼ಲಿಲೇವ್ಣು ಕರಿ ಮೋಶೆ ಧರ್ಮಶಾಸ್ತ್ರನಿ ಘೋಣಿ ನಾಚಾ಼ಲ್ನುಕರಿ ಬೋಲಾನು ಶಿಕಾಡುಕರಸ್ ಕರಿ ತಾರಿ ಬಾರೇಮ ಬೋಲುಕರಸ್. 22 ಅಮ್ ರ‍್ಹವಾನಪರ್ ಶಾತ್ ಕರ‍್ನು? ತೂ ಹಜ಼್ಜ ಅಯಿರ‍್ಹೊತೆ ವಾತೆ ಇವ್ಣುನ ಕಿಮ್‍ತೋಬಿ ಮಾಲುಮ್ ಪಡ್‌ಶೆ. 23 ಇನಖ್ಹಾಜೆ ಹಮೆ ತುನ ಬೋಲ್‍ಯೇತೆ ಕಾಮ್ ಕರ್‌, ಹಮಾರಮ ಶಪತ್ ಕರ‍್ಯುಹುಯು ಚಾರ್ ಅದ್ಮಿಛಾ಼. 24 ತೂ ಇವ್ಣುನ ಬುಲೈಲಿ ಜೈ಼ನ್ ಇವ್ಣಿಜೋ಼ಡ್ಮ ತುನಾಬಿ ಶುದ್ದಿಕರಿಲೀನ್, ಇವ್ಣಿ ಇವ್ಣಿ ಮುಡಪ್‍ ಖ್ಹತಮ್ ‍ಕರಾನಖ್ಹಾಜೇಥಿ ತೂ ಪೈಶಾ ಖರ್ಚಿಕರ್, ಅಮ್ ಕರ‍್ಯೊತೊ ಖ್ಹಾರುಜ಼ಣುಬಿ ತಾರಿಬಾರೇಮ ಇವ್ಣೆ ಖ್ಹಮ್‍ಜ್ಯುತೆ ಖಬರ್ ಖ್ಹಾಚು಼ ಕಾಹೆಕರೀಬಿ, ತೂಬಿ ಮೋಶೇನು ಧರ್ಮಶಾಸ್ತ್ರ ಪಾಡಿನ್ ಚಾ಼ಲವಾಳೊಕರಿ ಮಾಲುಮ್ ಕರ್ಶೆ. 25 +ಯೆಹೂದ್ಯರ್‌ಕಾಹೆತೆ ಅದ್ಮಿಮ ಯೇಸುನ ವಿಶ್ವಾಸ್ ಕರವಾಳನಿ ಬಾರೇಮಾತೊ, ಮೂರತ್ನ ಝಾ಼ಳ್ ಉತಾರಹುಯನಾಬಿ, ಲ್ಹೋಯಿನಾಬಿ, ನ್ಹೇಟಿ ಭೀಚಿನ್ ಮಾರ‍್ಯಹುಯ ಜಿನಾವರ್‌ನಬಿ ನಾಖಾವ್ಣು ಅಜು಼ ವ್ಯಬಿಚಾರ್‌ಥಿ ದೂರ್ ರ‍್ಹೇವ್ಣುಕರಿ ಹಮೆ ನ್ಯಾವ್‌ ಕರ‍್ಯಾತೆ ಲೀಖ್ಯ” ಕರಿ ಬೋಲ್ಯು. 26 ತದೆ ಪೌಲನೆ ಯೋ ಖ್ಹಾರ ಅದ್ಮಿನ ಅಗ್‍ಲ್ಯದನ್ನೆ ಬುಲೈಲಿನ್ ಇವ್ಣಿಜೋ಼ಡೆ ಇನು ಯೋ ಶುದ್ದಿಕರಿಲೀನ್, ಮುಡಪ್‍ನ ದನ್ ಖ್ಹತಮ್ ಹುಯಿಗುಕರಿ ಖ್ಹಮ್‍ಜಾ಼ಡ್ತೊ ಹುಯಿನ್ ದೇವ್ನಿಮಂದಿರ್‌ಮ ಗಯೊ. ಹರೇಕ್‌ನಖ್ಹಾಜೆ ಕದೆ ಬಲಿದೇವ್ಣುಕರಿ ಹಿಜ್ಜಾ಼ ಮಾಲುಮ್ ಕರಾಯೊ.

27 ಯೊ ಖ್ಹಾತ್‍ದನ್ ಖ್ಹತಮ್ ಹುವಾನಿ ವಖ್ಹತ್‌ಮ ಏಷ್ಯಾ ತಬರ್‌ಖಾಥು ಆಯಿರ‍್ಹುಥೂತೆ ಯೆಹೂದ್ಯರ್‌ನೆ ಪೌಲನ ದೇವ್ನಿಮಂದಿರ್‌ಮ ದೇಖಿನ್, ಝೂ಼ಂಡ್‌ ಭರೈರ‍್ಹುಥೂತೆ ಅದ್ಮಿಖ್ಹಾರಾನ ಎಕ್ಕೋಸ್ಏಕ್‌ ಕರಿನ್ ಇನ ಧರೀನ್, 28 “ಇಸ್ರಾಯೇಲ್‌ನ ಅದ್ಮಿವೊ, ಹಮೂನ ಮದತ್ ಕರೊ, ಅಪ್ಣ ಅದ್ಮಿನಾಬಿ, ಧರ್ಮಶಾಸ್ತ್ರನಾಬಿ ಆ ಝ಼ಗೋನಾಬಿ ವಿರೋದ್ ಹುಯಿನ್ ಖ್ಹಾರಾಸ್ ಅದ್ಮಿನ ಬೋಧನೆ ಕರಾವಾಳೊ ಯೋ ಅದ್ಮಿ ಆಸ್! ಅತ್ರೇಸ್ ಕಾಹೆ, ಆ ಗ್ರೀಕ್‍ವಾಳಾನ ದೇವ್ನಿಮಂದಿರ್‌ಮ ಬುಲೈಲಾಯಿನ್‌ ಹೈರಿತೆ ಪವಿತ್ರಝ಼ಗೋನ ಮೈಲು ಕರಿನಾಖ್ಯೊ.” ಕರಿ ಚಿಕ್‌ರ‍್ಯು. 29 ಇವ್ಣೆ ಪಹಿಲೆ ಖ್ಹಯೇರ್‌ಮ ಎಫೆಸವಾಳೊ ತ್ರೊಫಿಮಕರಿ ಏಕ್‍ಜ಼ಣೊ ಪೌಲನಿ ಜೋ಼ಡ್ಮ ರ‍್ಹವಾನು ದೇಖ್ಯುಥೂತೆ ಇನಖ್ಹಾಜೆ ಪೌಲನೆ ಹಮ್ಕೆ ಇನ ದೇವ್ನಿಮಂದಿರ್‌ಮ ಬುಲೈರಾಖ್ಯೊ ಉಷೆಕರಿ ಲ್ಹಾಜ್ಯೊ಼. 30 ತದೆ ಅಖ್ಖೀಸ್ ಬಾಜು಼ ಕಲಾವ್ಣಿ ಹುಯಿನ್ ಫೈಲೈಗಯು. ಅಜು಼ ಅಖ್ಖಾಸ್ ಖ್ಹಯೇರ್‌ಥು ನಾಶಿ ಐನ್ ಪೌಲನ ಧರಿಲೀನ್ ದೇವ್ನಿಮಂದಿರ್‌ಮಾಥು ಭಾರ್‌ ಖೇಚಿಲಾಯಿನ್ ತದ್ನುತದೇಸ್ ಬಾಕಲ್ ಮೂಚಿನಾಖ್ಯು. 31 ಇವ್ಣೆ ಇನ ಮಾರಿನಾಕ್ಣುಕರಿ ಕೋಶಿಶ್ ಕರುಕರಾನಿ ವಖ್ಹತ್‌ಮ ಯೆರೂಸಲೇಮ್ಮ ಖ್ಹಾರಿಸ್ ಬಾಜು಼ ಗಲಿಬಿಲಿ ಹುಯುಕರಿ ಹಿಜ಼್ಜಾಥೂತೆ ರೋಮ್ನ ಹಜಾ಼ರ್‌ ಶಿಪಾಯಿನ ಮೋಟಾನ ಖಬರ್ ಆಯಿ. 32 ಇನೆ ತದ್ನುತದೇಸ್ ದಂಡುದಳವೈನ ಲೀನ್ ಅದ್ಮಿನ ಝೂ಼ಂಡ್‌‍ಕನ ನಾಶಿಆಯೊ. ಇವ್ಣೆ ಖ್ಹೋಶಿಪಾಯಿನೊ ಮೋಟಾನ ಅಜು಼ ಶಿಪಾಯಿಖ್ಹಾರಾನ ದೇಖಿನ್ ಪೌಲನ ಮಾರಾನು ಭೀರಾಖ್ಯು. 33 ಶಿಪಾಯಿನೊ ಮೋಟೊ ಖನ್ನೆ ಐನ್ ಇನ ಧರೀನ್ ಬೇ ಖ್ಹಂಕ್‌ಳಿಥಿ ಭಾಂದ್‌ಣುಕರಿ ಹುಕುಮ್‌ ದೀನ್; ಇವ್ಣುನ ಬೋಲ್ಯೊ, ಆ ಕೋಣ್, ಅನೆ ಶಾತ್‌ಕರ‍್ಯೊ? ಕರಿ ಪುಛಾಯೊ. 34 ತದೆ ಝೂ಼ಂಡ್‌‍ಮಥೂತೆ ಥೋಡುಜ಼ಣು ಏಕ್‌ಥರ ಬಿಜು಼ ಥೋಡುಜ಼ಣು ಬಿಜೇಕ್‌ತರ ಚಿಕ್ರುಕರ್ತುಥು. ಯೋ ಗಲಾಟ್‌ಥಿ ಖ್ಹಾಚು಼ಶಾತ್‍ ಕರಿ ಹಜಾ಼ರ್‌ ಶಿಪಾಯಿನ ಮೋಟಾನ ಖ್ಹಮ್‌ಜಾ಼ನ ಕೋ ಹುಯುನಿ ಇನಖ್ಹಾಜೆ ಪೌಲನ ಖ್ಹಾರ್ಕೊಟ್‌ಮ ಲೀನ್ ಜಾ಼ವಾನ ಹುಕುಮ್ ದಿದೊ. 35 ಪೌಲ ಪಾಯಿರಿಯೇಕನ ಆವಾದಿನ್ ಅದ್ಮಿಖ್ಹಾರಾನಿ ಧಕ್ಕಾಮುಕ್ಕಿಥಿ ಶಿಪಾಯಿಖ್ಹಾರನೆ ಇನ ಢೊಯಿಲೀನ್ ಜಾ಼ವಾನು ಪಡ್ಯುಥು. ಶನಕತೊ ಹಿಜ಼್ಜಾನು ಅದ್ಮಿನು ಝೂ಼ಂಡ್‌ ಜಾ಼ಖ್ಹತ್ ಚ಼ಂಢಾಳ್‌ವಾಳು ಹುಯಿರ‍್ಹುಥು. 36 ಇನಖ್ಹಾಜೆ ಧಕೇಲ್‍ತು ವಳ್ಯಾವ್‌ತುಥೂತೆ ಅದ್ಮಿನು ಝೂ಼ಂಡ್‌, ಇನ ಮಾರಿನಾಖೊಕರಿ ಚಿಕ್ರುಕರ್ತುಥು.

37 ಶಿಪಾಯಿಖ್ಹಾರು ಪೌಲನ ಖ್ಹಾರ್ಕೊಟ್‌ಮ ಲೀಜಾ಼ವನಿ ವಖ್ಹತ್‌ಮ ಇನ ಶಿಪಾಯಿನೊ ಮೋಟಾನ, “ಮೇ ತಾರಿ ಜೋ಼ಡೆ ದರ್ರಾಶಿ ವಾತೆ ಬೋಲಾನ ಹುಕುಮ್‌ ಮಳ್‍ಶೇಕಿ ಶು?” ಕರಿ ಪುಛಾ಼ವದೀನ್ ಇನೆ ತುನ ಗ್ರೀಕ್‌ವಾತೆ ಆವಸ್ಕಿ ಶು? 38 ಇಮ್‍ಕತೊ ಥೋಡದನ್ನಪಾರ್ ಲಡೈಉಠಾಡಿನ್ ಚಾರ್ ಹಜಾ಼ರ್ ಢಾಕುನ ಜ಼ಂಗಳ್‌ಮ ಬುಲೈಲಿನ್ ಗಯೋತೆ ಈಜಿಪ್ಟ್‌ವಾಳೊ ತೂಸ್ ಕಾಹೆಕಿ ಶು? ಕರಿ ಬೋಲ್ಯೊ. 39 ಇನ ಪೌಲನೆ, “ಮೆ ಏಕ್‌ ಯೆಹೂದ್ಯವಾಳೊ ಅಜು಼ ಕಿಲಿಕ್ಯ ತಬರ್‌ಖಾನು ತಾರ್ಸಕರಿ ಪ್ರಸಿದ್ದಿನು ಹುಯಿರ‍್ಹುತೆ ಖ್ಹಯೇರ್‌ವಾಳೊ, ಗೋರ್‌ಕರೀನ್ ಆ ಅದ್ಮಿನಿ ಜೋ಼ಡೆ ವಾತೆಬೋಲಾನ ಮನ ಹುಕುಮ್‌ ದೆ” ಕರಿ ಬೋಲ್ಯೊ. 40 ಸಿಪಾಯ್ನೊಮೋಟಾನೆ ಹುಕುಮ್‌ ದ್ಯಾವದೀನ್ ಪೌಲನೆ, ಪಾಯಿರಿಪರ್ ಭೀರಿನ್, ಅದ್ಮಿನಝೂ಼ಂಡ್‌ನ ಖ್ಹೊಪೊರ‍್ಹೇವೊಕರಿ ಹಾತ್‌ನೊ ಇಷಾರ್ಕೊ ದಿದೊ. ಇವ್ಣೆ ಜ಼ರ ಖ್ಹೊಪ್‍ಪಡಾದಿನ್ ಇವ್ಣುನ ಇನೆ ಇಬ್ರಿಯ ವಾತೆಮ ಬೋಲಾನ ಶುರುಕರ‍್ಯೊ.