☰ Mikaⱨ 3
3
Bexarǝtlǝr 2-ⱪatar •••• Yetǝkqilǝrning ⱨaliƣa way!
1 Mǝn mundaⱪ dedim: «Anglanglar, i Yaⱪupning ⱨakimliri,
Israil jǝmǝtining ǝmirliri!
Adil ⱨɵkümni bilix silǝrgǝ has ǝmǝsmu?□
2-3 I yahxiliⱪni ɵq kɵrgüqi,
Yamanliⱪni yahxi kɵrgüqilǝr —
Silǝr Ɵz hǝlⱪimdin terisini,
Ustihanliridin gɵxini yulidiƣan,
Ularning gɵxini yǝydiƣan,
Terisi soyulƣuqǝ üstidin sawaydiƣan,
Ustihanlirini qaⱪidiƣan,
Ularni ⱪazanƣa tǝyyarliƣandǝk,
Daxⱪazandiki gɵxni toƣriƣandǝk toƣraysilǝr!
4 Buningdin keyin ular Pǝrwǝrdigarƣa nida ⱪilidu,
Biraⱪ U ularni anglimaydu;
Ularning ⱪilmixliridiki ⱨǝr türlük ⱪǝbiⱨliki üqün,
U qaƣda U yüzini ulardin ⱪaqurup yoxuridu!».
 
Sahta pǝyƣǝmbǝrlǝrning ⱨaliƣa way!
5 Pǝrwǝrdigar Ɵz hǝlⱪini azdurƣuqi pǝyƣǝmbǝrlǝr toƣruluⱪ mundaⱪ dǝydu: —
(Ular qixliri bilǝn qixlǝydu,
«Aman-tinqliⱪ!» dǝp warⱪiraydu,
Kimǝrkim ularning gelini maylimisa,
Xularƣa ⱪarxi urux ⱨazirlaydu!)□  ■
6 — Xunga silǝrni «alamǝt kɵrünüx»ni kɵrmǝydiƣan bir keqǝ,
Pal salƣili bolmaydiƣan ⱪarangƣuluⱪ basidu;
Pǝyƣǝmbǝrlǝr üqün ⱪuyax patidu,
Kün ular üstidǝ ⱪara bolidu;■
7 «Alamǝt kɵrünüxni kɵrgüqilǝr» xǝrmǝndǝ bolidu,
Palqilar yǝrgǝ ⱪaritilidu;
Ularning ⱨǝmmisi kalpuklirini tosup yüridu;
Qünki Hudadin ⱨeq jawab kǝlmǝydu.□
8 Biraⱪ mǝn bǝrⱨǝⱪ Pǝrwǝrdigarning Roⱨidin küqkǝ tolƣanmǝn,
Yaⱪupⱪa ɵzining itaǝtsizlikini,
Israilƣa uning gunaⱨini jakarlax üqün,
Toƣra ⱨɵkümlǝrgǝ ⱨǝm ⱪudrǝtkǝ tolƣanmǝn.
9 Buni anglanglar, ɵtünimǝn, i Yaⱪup jǝmǝtining ⱨakimliri,
Israil jǝmǝtining ǝmirliri!
Adil ⱨɵkümgǝ ɵq bolƣanlar,
Barliⱪ adalǝtni burmilaydiƣanlar,■
10 Zionni ⱪan tɵküx bilǝn,
Yerusalemni ⱨǝⱪⱪaniyǝtsizlik bilǝn ⱪuridiƣanlar!□  ■
11  Zionning ⱨakimliri parilar üqün ⱨɵküm qiⱪiridu,
Kaⱨinlar «ix ⱨǝⱪⱪi» üqün tǝlim beridu;
«Pǝyƣǝmbǝrlǝr» pul üqün palqiliⱪ ⱪilidu;
Biraⱪ ular «Pǝrwǝrdigarƣa tayinar»mix tehi,
Wǝ: — «Pǝrwǝrdigar arimizda ǝmǝsmu?
Bizgǝ ⱨeq yamanliⱪ qüxmǝydu» — deyixidu.□
12 Xunga silǝrning wǝjǝnglardin Zion teƣi etizdǝk aƣdurulidu,
Yerusalem dɵng-tɵpilik bolup ⱪalidu,
«Ɵy jaylaxⱪan taƣ» bolsa ormanliⱪning otturisidiki yuⱪiri jaylardǝkla bolidu, halas.□

  ■
 
 
□ 3:1 «Mǝn mundaⱪ dedim: «Anglanglar, i Yaⱪupning ⱨakimliri, Israil jǝmǝtining ǝmirliri! ... » — 1-4-ayǝttǝ sɵzligüqi bǝlkim pǝyƣǝmbǝr ɵzi. «Yaⱪup» wǝ «Israil» muxu yǝrdǝ xübⱨisizki, ikki padixaⱨliⱪni tǝng kɵrsitidu. Muxu ayǝtkǝ ⱪariƣanda, qiriklixix mǝmlikǝtlǝrning ǝng yuⱪiri orunliriƣa wǝ sothaniliriƣa singip kirgǝnidi; biraⱪ u padixaⱨi Ⱨǝzǝkiyani tilƣa almaydu; Ⱨǝzǝkiya ihlasmǝn adǝm bolup, u ɵzi muxu gunaⱨlardin haliy bolƣan. □ 3:5 «Kimǝrkim ularning gelini maylimisa, ...» — ibraniy tilida «kimǝrkim ularning aƣziƣa bir nǝrsǝ salmisa,..». ■ 3:5 Mik. 2:11 ■ 3:6 Yǝr. 15:9; Yo. 2:10, 31; 3:15; Am. 8:9 □ 3:7 «Ularning ⱨǝmmisi kalpuklirini tosup yüridu...» — kalpuklarni tosux adǝttǝ hijilliⱪni bildürǝtti. Uning üstigǝ, Musa pǝyƣǝmbǝrgǝ berilgǝn muⱪǝddǝs ⱪanun boyiqǝ yuⱪumluⱪ kesǝl bolƣan adǝmlǝr ɵzining kǝlgǝnlikini agaⱨlandurux üqün kalpuklirini tosup «Napak, napak!» dǝp warⱪirixi kerǝk idi. Bu ayǝt bu sahta pǝyƣǝmbǝrlǝrning napak sɵzlirini etirap ⱪilixi kerǝk bolidiƣanliⱪini bildüridu. ■ 3:9 Am. 5:7; 6:12 □ 3:10 «Zionni ⱪan tɵküx bilǝn, Yerusalemni ⱨǝⱪⱪaniyǝtsizlik bilǝn ⱪuridiƣanlar!» — xübⱨisizki, Yerusalemda nurƣun ⱨǝywǝtlik imarǝtlǝr pǝyda bolƣanidi. Biraⱪ ⱨǝmmisi adalǝtsizlikkǝ tayinip yasalƣan. ■ 3:10 Əz. 22:27; Zǝf. 3:3 □ 3:11 ««Pǝyƣǝmbǝrlǝr» pul üqün palqiliⱪ ⱪilidu;...» — Hudaning pǝyƣǝmbǝrliri ⱨǝrgiz palqiliⱪ ixlirini ⱪilmaydu, ǝlwǝttǝ. Ⱨǝⱪiⱪiy pǝyƣǝmbǝrlǝrning hizmǝtliri bilǝn «palqiliⱪ»ning otturisidiki qong pǝrⱪlǝr toƣruluⱪ «Tǝbirlǝr»ni kɵrüng. □ 3:12 ««Ɵy jaylaxⱪan taƣ» bolsa ormanliⱪning otturisidiki yuⱪiri jaylardǝkla bolidu, halas» — Mikaⱨ ɵz dǝwridiki «muⱪǝddǝs ɵy» yaki «ibadǝthana» demǝydu — Ularning gunaⱨliri tüpǝylidin u pǝⱪǝt addiy bir «ɵy» bolup ⱪaldi. Bu ayǝttiki bexarǝt bǝlkim Ⱨǝzǝkiya padixaⱨni qongⱪur tǝsirlǝndürgǝn boluxi mumkin. Yüz yildin keyin ordidiki ǝmirlǝr bexarǝtning Ⱨǝzǝkiyaƣa bolƣan tǝsirini tilƣa elip, ɵz padixaⱨi Yǝⱨoakimƣa bexarǝtni nǝⱪil kǝltüridu («Zion teƣi etizdǝk aƣdurulidu, Yerusalem dɵng-tɵpilik bolup ⱪalidu»), xuning bilǝn Yǝrǝmiya pǝyƣǝmbǝr ɵlüm jazasidin ⱪutulup ⱪalƣan (Tǝwrat, «Yǝrǝmiya» 26-bab). «Yuⱪiri jaylar» degini kinayilik gǝptur. Qünki Yǝⱨudadikilǝr ⱨǝrdaim «yuⱪiri jaylar»da buthanilarni selip xu yǝrdǝ butlarƣa qoⱪunƣan. Lekin xu qaƣlarda Yerusalem butⱪa qoⱪunƣan jaydǝk «ⱨaram» bolup ⱪalidu, xuningdǝk ormanliⱪning kixilǝrning kɵzigǝ az-paz qeliⱪidiƣan bir ⱪismidin ibarǝt bolidu, halas! ■ 3:12 Mik. 3:12
☰