56
56-küy •••• Ziyankeshlikke uchrighuchining duasi
1 Neghmichilerning béshigha tapshurulup, «Xilwettiki dub derexliridiki paxtek» dégen ahangda oqulsun dep, Dawut yazghan «Mixtam» küy (Filistiyler Gat shehiride uni esirge alghanda yézilghan): —
I Xuda, manga shepqet körsetkeysen,
Chünki insanlarning nepsi yoghinap méni qoghlimaqta;
Kün boyi ular men bilen jeng qilip méni basmaqta;
2 Méni közligen reqiblirimning nepsi yoghinap kün boyi méni qoghlimaqta;
Manga heywe qilip jeng qilghuchilar intayin köptur!
3 Men qorqqan künümde,
Men Sanga tayinimen.
4 Men söz-kalamini ulugh dep medhiyeleydighan Xudagha,
Xudaghila tayinimen;
Men qorqmaymen;
Nahayiti bir et igisi méni néme qilalisun?
5 Ular kün boyi sözlirimni burmilaydu,
Ularning barliq oyi manga ziyankeshlik qilishtur;
6 Ular top bolup ademni qestiliship, yoshurunidu;
Péyimge chüshüp, jénimni élishni kütidu.
7 Gunah bilen gunahni yépip qachsa bolamdu?
Gheziping bilen ellerni yerge urghaysen, i Xuda!
8 Méning sersanliqlirimni özüng sanap kelgen;
Közdin aqqan yashlirimni tulumunggha toplap saqlighaysen;
Bular deptiringde pütüklük emesmu?
9 Shuning bilen men Sanga nida qilghan künde,
Düshmenlirim chékinidu;
Men shuni bildimki — Xuda men tereptidur!
10 Xudani — Uning söz-kalamini ulughlaymen!
Perwerdigarni — Uning söz-kalamini ulughlaymen!
11 Xudanila tayanchim qildim —
Men qorqmaymen, nahayiti shu bir insan méni néme qilalisun?
12 Sanga qilghan wedilirimge wapa qilimen, i Xuda;
Sanga teshekkür qurbanliqlirini sunimen.
13 Chünki Sen jénimni ölümdin qutuldurghansen;
Sen putlirimni putlishishtin saqlimamsen?
Shuning bilen men Xudaning huzurida, tirikler turidighan yoruqluqta mangimen.