92
92-ci Ǐvel mə̌ğ
Xrama şamat' ğine hari Buxačuğo bul k'os'bat'anmə̌ğeğala Ǐvel mə̌ğ.
1 Q'ončuğo şükürbsun,
Vi s'iya alabala mə̌ğur mə̌ğpsun he şaat'e, ay Ala Arśiyo!
2 Savaxt'an hayzeri Vi nu badalbakala çuresuna,
Biyəsin Vi beş bač'ane çurpsuna muzel eşt'un,
3 Mot'oğo vis' simlə arfin q'a tare faren mə̌ğpi bayanbsun he şaat'e!
4 Şot'o görə ki, Vi biq'i əşure za mǔqt'alo, ay Q'ončux,
Vi kiyexun c'eriyoroxe bez muza qaypi Va tərifləyinşest'alo!
5 Vi biyorox nu ak'eśi əşure, ay Q'ončux,
Vi fikirbi bex c'evk'iyorox beyne p'aq'est'ala şey tene!
6 Hik'k'alaxun iz xavar nu bakala q'ammazen avatene,
İçuxun irəzi axmağenal q'amiştene ki,
7 Həysə pisorox göyün o k'inək' ěqeśi,
Şər bakalorox vard k'inək' qayeśiyal bakayt'un, axır butene şot'oğoy,
Əfçibaki tağalt'un bito!
8 Ama Hun, ay Q'ončux, həmişəluğ bitot'uxun üst'ün bakalonu!
9 Avazu ki, Vi düşmənxo k'as'eśi baralt'un, ay Q'ončux,
Şər bakalt'oğoy śaresuna avazu.
10 Za isə çölnə öküzi zoren tast'a Hun,
Bez bel təzə zeyt'uni c'əyin lə̌ə̌mdi mǔqenst'a!
11 Bez düşmənxoy q'ı̌yexun c'eri t'ist'unaz ak'i zu,
Bez loxol ěqeśit'oğoy k'alpi xoyinšpsunaz ibaki.
12 Xurmin xod k'inək't'un düzgünorox, hevaxt' běğayin vardt'un qaye,
Livana bakala şame xod k'inək't'un, bito xodurxoxun alloyt'un ěqesa.
13 Q'ončuğoyxrama tum sakit'oğon
Buxačuğoy k'ojin məəlnene göyünbaki s'is'ik' qayk'on.
14 Q'ojabakat'anal bar tadalt'un şot'oğon,
Həmişə göyün, vərkər mandalt'un.
15 Bayanbalt'un şot'oğon içoğoynak' q'aya bakala Q'ončuğoy düzgün baksuna,
Şot'ost'a sal sa haq'suzluğ nu baksuna!