5
5-ci Ǐvel mə̌ğ
Mə̌ğk'alxoy dəst'in kalat'aynak'. T'üt't'əyen farpi mə̌ğěğala Davidi Ǐvel mə̌ğ.
1 Ay Q'ončux, bezi afırına ibaka!
Bezi xoyinša coğabsuz ma efa!
2 Ay bezi Padçağ, bezi Buxačux, bezi haraya p'ap'a,
Zu Vaz afırıpi xoyinšpsa!
3 Ay Q'ončux, işiğ bitat'an Vi běš afırınenez eysa,
Bezi afırına ibakamin Vi běš çökt'iz baksa!
4 Hun pisluğa nu portp'ala Buxačuxnu,
Vi t'ǒğǒl pist'aynak' ga butene!
5 İçu ala biq'alo Vi běš çurpes batenekon,
Düz yaq'axun c'erit'oğo nifrətenbsa Hun.
6 Şər bosalxo əfçinbsa, ay Q'ončux,
Amdar besp'alxoxun q'a bic'luğ əşp'est'alt'oğoxun irit'enne Hun.
7 Ama zu, Vi nu badalbakala çuresuna görə Vi k'oya bayes bakoz,
Vi s'iye q'a kalaluği běš bakala hörmətə ak'est'i Va bul k'os'boz t'e gala.
8 Ay Q'ončux, za Vi laxi düzgünluği yaq'en taşa,
Bezi tağala yaq'a hamavar ba, axıri bez düşmənxo gelene.
9 Şot'oğoy ǰomoxun c'eğala əyiti sayco düz tene,
İçoğoy ük'e bakala fikir bespsune.
Şot'oğoy xirt't'əyəxun c'eğala nəfəsenal amdara gərəmzoğone taşon,
Muzna bel eğala əyitmoğoy bito əfçine!
10 Şot'oğoy taxsırkər baksuna ç̌oyel c'evk'a, ay Buxačux!
Barta içoğoy pis niyətxo görə əfçibakeq'at'un!
Me günaxkərxo Vi piin běšt'an ə̌xilba!
Axıri şorox Vi əleyinət'un ěqeśi!
11 Va bač'an taradalorox isə barta mǔqbakeq'at'un,
Vi içoğoynak' bač'an baksuna görə barta içoğoy ük' mǔqluğen buybakeq'an!
Va çureğalt'oğoy ç̌oyan axšumst'a Hun!
12 Axıri Hun düzgün amdaraxun Vi xeyir-bərəkətə kamtenbsa, ay Q'ončux!
Şot'oxun irəzi mandi Vi kula içuxun zaptenne!