Girke p'ə̌mci hissə: 42-72-ci Ǐvel mə̌ğurxo.
42
42-ci Ǐvel mə̌ğ
Fark'alxoy dəst'in kalat'aynak'. Goraxi ğarmoğon śampi ögüd-nəsyət tadala Ǐvel mə̌ğ.
1 Marali turmoğon içu xe tağala ganu eçala k'inək',
Bez ük'enal za Vaçe eşt'a, ay Buxačux!
2 İz ük' xeneynak' bok'ala amdaren xe qə̌věğala k'inək'ez qə̌věsa Va!
Dirist' bakala Buxačuğoz qə̌věsa!
Vi bakala gala hari Va bul k'os'bseynak' ğiz bǒq'ə̌le!
3 Za hər dəfə "p'oy maya vi Buxačux?" uk'at'an
Üşe-ğena ǒnepi neğen tapanez boşevk'i zu.
4 Axsibay c'ovakest'ala azuk'i aranexun c'ovaki
Vi ı̌vel gala taysun bez eyex baft'at'an ük'e q'aç̌e bezi.
Amdarxon Va alxışp'at'an c'eğala mǔq səsurxoy həsrətəz zap'e.
5 Het'aynak'en xə̌xə̌yesa, ay bez ük'?
Het'aynak'en q'ubarbsa?
Buxačuğost'a ak'a umudi ganu hun!
Vi Çark'est'al bakala, vi şükürbi İz s'iya alabala Buxačuğost'a!
6 Xə̌xə̌ne bez ük',
Vane çuresa me İordan oç̌ala,
Me Xermon q'a Miśar uk'ala buruxmoğo.
7 Şot'oğoxun barala xenen za haq'i taşala k'inək'ez hisbsa za!
Bito Vi dalğoox, bito Vi ləpooxe hari bez belxun c'ovaki.
8 Ğenaxun Q'ončuğone za İz nu badalbakala çuresuna ak'est'a,
Üşemoğo isə Şot'o k'alpi afırıpsunen,
Za yəşəyinş tadi Buxačuğoy s'iya alabala mə̌ğur mə̌ğpsunenez c'ovakest'a zu.
9 Zaynak' sa q'aya bakala Buxačuğo metər uk'oz: «Het'aynak'en za eyexun c'evk'i?
Het'aynak'en za düşməni turin oq'a tadi neğ śipest'i?»
10 Axšumi gaz bake düşmənxoynak',
Za hər dəfə "maya p'oy vi Buxačux?" uk'at'an
Bez ük'e xançal badala k'inək'e baksa.
11 Het'aynak'en xə̌xə̌yesa, ay bez ük'?
Het'aynak'en q'ubarbsa?
Buxačuğost'a ak'a umudi ganu hun!
Vi Çark'est'al bakala, vi şükürbi İz s'iya alabala Buxačuğost'a!