41
41-ci Ǐvel mə̌ğ
Fark'alxoy dəst'in kalat'aynak'. Davidi Ǐvel mə̌ğ.
1 Kəsibxoy ğina ǒnek'alo he bəxt'əvəre!
Şo t'arnu baft'at'an Q'ončuğon şot'o kule boxodon.
2 Q'ončuğon şot'o q'orişi enefon,
Bəxt'əvərluğe eçon şot'aynak' t'e oç̌ala,
Düşmənxoy kiyel bafst'a tene bark'on şot'o.
3 Azari běšinə̌mə haq'seynak' elmuxe tadon şot'o Q'ončuğon,
Bask'i ganuxun hayzevk'i turelebon şot'o.
4 Metərez afırıpi xoyinšp'i: «Ay Q'ončux, avazu, günaxkərzu zu,
Za gorox eki, q'olayba za».
5 Mone, bez pisat'un çuresa bez düşmənxon,
"Mo hevaxt' p'uri tağale, iz s'i əfçibakale" pi ğit'un bǒq'ə̌le.
6 Za lafst'a eğat'an bez ç̌oye axšumalk'ayt'un,
İçoğoy ük' şəren buye:
Ç̌omoxun c'eysun q'a bitot'ay t'ǒğǒl bez pisə əyitpsun sane baksa.
7 J̌omoz baft'i zu şot'oğoy,
İçoğoy əş bez bač'anexun əyitpsune.
8 "İz sa tur gərəmzoğone,
Mandala tene, azaren sakene şot'o" next'un.
9 Lap bezi ǐša dost' k'inək' çalxiyo,
Bez ük'ə iz t'ǒğǒl ams'ibiyo,
Bezi šuma kəyi bez loxolxun ç̌axp'i c'ovakiyone baki.
10 Ama Hun za gorox eki, ay Q'ončux!
Za turelba, barta mot'ay əvəzə şot'oğoxun c'eğaz.
11 Düşməni turin oq'a ç̌axç̌uxeśi nu tağayiz,
Bezi Vi piyes şaat' ak'esuna avabakoz.
12 Vi za kul boxost'una,
Bezi düzgün baksuna görə za q'orişi efsuna avabakoz.
Vaxun eğala şaat'luğen həmişəluğ mǔqt'ale za!
13 İsraili Buxačux bakala Q'ončuğo alxışq'an baki!
Nəyniyal, ğeyal, əyc'əl - həmişə alxışq'an baki!
Ammen! Ammen!