31
31-ci Ǐvel mə̌ğ
Fark'alxoy kalat'aynak'. Davidi Ǐvel mə̌ğ.
1 Ay Q'ončux, zu Vaz bač'an tarast'a,
Ç̌omə̌yin tez bakon zu.
Vi düzgünluği k'ə baksuna ak'est'a, çark'est'a za!
2 Za ibaka, eki za kul boxoda.
Zaynak' sa q'aya baki bez bač'ane çurpa,
Çark'eseynak' bakala sa q'ala baka zaynak'.
3 Bez q'alal, q'ayal Hunnu,
Za düzgün bakala yaq'en taşeri Vi şu baksuna ak'est'a!
4 Vaz bač'an tarade,
Zaynak' c'əp'k'in laxeśi təloğoxun ə̌xilba za.
5 Bez urufa Vaz tapşurbsa,
Za çark'est'a, ay Q'ončux, ay za eyexun nu c'evk'ala Buxačux.
6 Ams'i şeymoğo, binik' buxačuxxobul k'os'balxo nifrətezbsa,
Zu tək Q'ončuğoz umudbaksa.
7 Vi nu badalbakala çuresunene mǔqst'a za, ç̌oyane axšumst'a bezi,
Şot'o görə ki, bez əzyətən ak'i Hun,
Bez boş zap'k'ala dərdən avabaki.
8 Za düşməni kiyel ten tadi Hun,
Q'ı̌ nu bakala galan eçeri za.
9 Koruğazu zu, ay Q'ončux, Vi zaynak' ük' bok'ospsuna ak'est'i bağışlayinşa za.
Dərdəxun bez piin işiğe mə̌yinbake, elmuxal tene mande zast'a,
Bədənəl q'aribakene bezi.
10 Bez ömürəz uksa dərde boş,
Koruğxon bez usenxone haq'sa.
Bez taxsırxoy kiyexun elmuxe c'eri bezi,
Ǔq'enxonal za tene efsa.
11 Bez düşmənxo gele baksuna görə q'onşiğonal za nifrətt'unbsa,
Bez ı̌šat'oğoy ak'ala pul tene bu za,
İçoğoy běš c'eğat'an t'it'unst'a zaxun.
12 P'uri taśi amdar k'inək' eyexun c'erezu,
Xoxbaki sa q'ə̌lik' k'inək'zu zu.
13 Bitot'ay za böht'an bost'unaz ibaksa,
Bez bip' t'ǒğəl pisluğen haq'layinşene.
Mone, za düşmən pi əyitə sabet'un,
Bez elmoğo haq'seynak't'un giresa şorox.
14 Ama zu Vaz umud, ay Q'ončux,
"Bez Buxačux Hunnu" nexzu.
15 Zaynak' bot'i ömür Vaxun asulune,
Za bez düşmənxoy kiyexun,
Bez bač'anexun baft'it'oğoy kiyexun çark'est'a.
16 Ay Q'ončux, barta Vi ük'e bask'az!
Vi nu badalbakala çuresuna me Vi k'ulaxun kammaba, çark'est'a za!
17 Vaz k'ale, ay Q'ončux,
Za ç̌omə̌yin ma ba!
Barta pist'oğoy ç̌oyenq'an ot'p'i,
Barta bisunen içoğoy səsə bot'eq'an!
18 Barta t'iyə̌mint'oğoy loxol alaxun oq'a běğalt'ay,
Düzgünt'u nifrətp'i şot'ay loxol böht'an bosalt'ay muz lalq'anbaki!
19 Vast'a bakala şaat'luğ sa neyməte!
Va çalxalt'oğoynak' efi,
Va bač'an taradit'oğo pay k'inək' tadat'an bitot'in ak'es bakala sa neymət!
20 Şot'oğo Vi xojina efi pist'oğoy niyətəxunen q'orişbsa,
Vi bakala gala eçeri şər bakalt'oğoy ǰomo bafst'axunen çark'est'a.
21 Q'ončuğo alxışq'an baki,
Zu düşmənxon iz hərrəminə biq'est'i şəhəre mandi bakat'an
Şot'in za İzi nu badalbakala çuresuni k'ə baksunane ak'est'i.
22 Vəlvəlinə baft'i "zaxun ç̌on taradi" nexzuy,
Ama bez xoyinša coğabsuz ten efi,
Za kulen boxodi Hun.
23 Ay Q'ončuğo çalxalorox, Şot'o çurekinan!
Q'ončuğon İz laxi yaq'en tağalt'oğo q'orişebon,
İçoğoy ǰomon tağalt'oğo isə mot'ay əvəzə xirt't'əyəl śirik'e tadon.
24 Şot'o görəl ef ük'ə buz k'inək' efanan,
Ost'aar çurpanan, ay Q'ončuğo bač'an taradiyorox bito!