30
30-ci Ǐvel mə̌ğ
Davidi Ǐvel mə̌ğ
Xrame qayesunast'a şot'ay ı̌vel baksuna ak'est'eynak' śameśi Ǐvel mə̌ğ.
1 Ay Q'ončux, Vi s'iyaz alabsa,
Şot'aynak' ki, Hun za çark'esendi,
Za düşmənxoy turin oq'a ten saki, şot'oğo mǔqtendi.
2 Ay Q'ončux, bez Buxačux,
Vaz k'alpi zu,
Hunal za q'olayenbi.
3 Za p'uri ganuxunen qaydi, ay Q'ončux,
Gərəmzinəxunen zapi c'evk'i za.
4 Ay Q'ončuğoy laxi yaq'axun nu c'eğalorox,
Şot'o tərifləyinşanan,
Şot'ay ı̌vel s'iya alabala mə̌ğur mə̌ğpanan.
5 Axıri Şot'ay əcuğ c'ovaki tağala,
Yaynak' bala şaat'luğxo isə həmişəluğe.
Üşe piyexun barala neğ
Savaxt'an hari mǔqluğane fırık'on.
6 Şaat' ğimxost'a bez turin oq'axun tez aksay,
Lamandi bist'axun tez q'ı̌bsay.
7 Ay Q'ončux, zaxun Vi şaat'luğa nu kambat'an burux k'inək' ost'aarzuy zu,
Zaxun Vi ç̌oya tarast'un q'a za q'ı̌yen haq'sun sane baki.
8 Ay Q'ončux, zu Vaz k'alpi,
Ala Arśit'u metərez xoyinšp'i:
9 «Bezi p'uri taysunen k'ə xeyirə eçon?
Oç̌ala gərbaki bədənen nə Vi s'iyane alabes bakon,
Nəəl Vi pi əyiti loxol həmişə çurpsuna bayanbes.
10 İbaka za, ay Q'ončux, gorox eki,
P'ap'esp'a Va, çark'est'a za, ay Q'ončux»!
11 Hun za yasaxun c'evk'i mǔqexun əçipsun k'ə baksunan ak'est'i,
Mə̌yin paltara c'evk'i śampi lapsunan q'ısmat bi.
12 Mone, zuval şip' tez çurk'al,
Va tərifləyinşala əyitmux bez ǰomoxun tene bital.
Həmişə Vi s'iya alabala mə̌ğur mə̌ğk'oz,
Ay bez Buxačux bakala Q'ončux!