26
26-ci Ǐvel mə̌ğ
Davidi Ǐvel mə̌ğ
1 Bezi taxsırsuz baksuna ç̌oyel c'evk'a, ay Q'ončux,
Axıri zu düzgünez yəşəyinşe.
Vaz bač'an tarade, ay Q'ončux,
Vi laxi yaq'axun tez c'ere.
2 Za sinəyinşa, ay Q'ončux, xaxalaxun c'ovakest'a,
Bez ük'e, bez fikire bakalt'oğo yoxlayinşa.
3 Vi nu badalbakala çuresuna həmişə azaksa,
Vi za nu efi taysunaxun şüpələyinştezbaksa.
4 Əfçiduğala amdarxoxun sagala artezst'a,
P'ə̌ç̌olat'oğoxunal dost'luğtezbsa.
5 Günaxkərxoy ç̌omoxun bona tez baysa,
Pis amdarxoy mərəkəyəl tez gərbaksa.
6 Zu bez taxsırsuz baksuna ak'est'oz, ay Q'ončux,
Bez kula os'k'i Vaynak' q'urban eçala gane hərrəmine fırık'at'an
7 Vi s'iya alaboz alloy səsen,
Vi bi nu ak'eśi əşurxoxun exlətp'oz.
8 Ay Q'ončux, Vi məsk'ən saki k'oja,
Vi s'iye kalaluğ ak'eğala ganu çurezsa zu.
9 Za günaxkərxoxun gərbi,
İçoğoy kul p'iyen bakalt'oğoxun sa biq'i bez elmoğo ma haq'a.
10 Vi laxi k'anunxoxun c'eğalt'oğoxun,
Rüşvət ext'i, rüşvət tadalt'oğoxun sa biq'i ma əfçiba za.
11 Düzgün yaq'enez taysa zu, bez əşurxost'a noxsan tezax bu,
Çark'est'a za, Vi ük' bok'ospsuni k'ə baksuna ak'est'a!
12 Düz galaz bez tura laxe zu,
Q'ončuğoy s'iya Şot'o bul k'os'bseynak' gireśit'oğoy boş alaboz zu.