25
25-ci Ǐvel mə̌ğ
Davidi Ǐvel mə̌ğ
1 Ay Q'ončux, bez ük'ə qaypi Vi běšez laxsa zu.
2 Vaz bač'an tarast'a, ay Buxačux!
Za ç̌omə̌yin ma ba,
Düşmənxoy turin oq'a ç̌axç̌uxeśi taysa ma barta!
3 Va bač'an taradalt'oğoy bač'an sal sa vədə k'os'tenebakon,
Vaxun nahaq' gala ç̌o taradiyorox isə ç̌omə̌yint'un mandon.
4 Ay Q'ončux, za Vi yaq'en taşa,
Za Vi tağala cığırxo çalxest'a.
5 Barta Vi düzgünluği q'a Vi laxi yaq'en taysuni k'ə baksuna zombakaz.
Axıri za çark'est'ala Buxačux Hunnu,
Vi za kul boxost'unaz yaq'běğsa həmişə zu.
6 Ay Q'ončux, Vi nu badalbakala çuresuna q'a ük' bok'ospsuna zaxun kammaba,
Me p'ə̌ şeye Vast'a nu es'esuna avazu.
7 Bezi cəyilluğast'a əşp'est'i günaxxo q'a taxsırxo eyex ma bada,
Vi nu badalbakala çuresuna saal ak'est'a,
Axıri Hun şaat' bakalonu, ay Q'ončux!
8 Düzgün bakalo, şaat' bakalone Q'ončux,
Günaxkərxo düz yaq'a laxalone Şo.
9 İzi əyitəxun nu c'eğalt'oğo yaq' ak'est'alo,
Şot'oğo İz laxi yaq'en taysuni k'ə baksuna zombalone Şo.
10 İçuxun ğaç̌eśi irəziluğa əməlbalt'oğoxun İzi çuresuna kamtenebon Q'ončuğon
Şot'oğo qı̌ yaq'a tene efon Şot'in.
11 Ay Q'ončux, Vi Şu baksuna ak'est'a,
Bez taxsırxo kalal bakayin, şot'oğo bağışlayinşa.
12 Q'ončuğon İçu çalxalt'oğo
Mani yaq'en taysuna ak'est'ale.
13 Şot'oğo hər şeyi ən şaat't'u tadale,
Şot'oğoxun bakala nəsilen miras koft'i oç̌ala tum sakale.
14 İçu çalxalt'oğone Q'ončuğon İz məsləətə tadon,
Şot'oğone İzi irəziluğa əməlbsuni k'ə baksuna ak'est'on.
15 Q'ončuğoz qə̌věsa həmişə zu,
Şone za baft'i təloğoxun c'evk'alo.
16 Bezi loxol běğa, Vi ük' bok'ospsun k'ə baksuna ak'est'a,
Axıri bezi şuk'k'al butene, əzyətez aksa zu.
17 Bez ük' buye, q'ubarezbsa zu,
Za me zülüməxun çark'est'a.
18 Za çətinluğxoy, dərde boş ma efa,
Bezi günaxxo os'k'a taşa.
19 Běğa heq'ədər düşmənzax bu,
Za ak'ala pul tene bu şot'oğoy!
20 Bez elmoğo haq'sa ma barta, za çark'est'a,
Axıri Vaz bač'an taradi,
Za ç̌omə̌yin ma ba.
21 Barta bezi təmizluğen q'a düzgünluğen za q'orişeq'an,
Vaz güvəyinşaksa zu.
22 Ay Buxačux, c'evk'a israilluğo bito çətinluğxoxun!