2
2-ci Ǐvel mə̌ğ
1 Azuk'xoy nairəzi baksunal,
Millətxoy bul nu biq'ala fikirxoval içoğo mandale.
2 Mone, dünyəni padçağxone giresa,
Kalaluğbalxone sagala eysa.
Q'ončuğoy q'a Şot'ay c'ək'p'it'ay əleyinə ěqeśi
3 "Ekinan şot'oğoy yax ğaç̌p'i zincirxo k'as'k'en,
Beş loxol lavk'i k'andalxo bosen!" next'un.
4 Ala Arśit'in isə axšumene,
Axšumi galane laxsa şot'oğo Q'ončuğon.
5 Əcuğon biq'i töhmətbale şot'oğo,
İz hirsen vəlvəlinə badale,
6 "Bez ı̌vel burux bakala Siona
Zuz c'ək'p'i laxe Bez padçağa" uk'ale.
Padçağ:
7 «Mone, Q'ončuğoy əyitəz və̌x p'ap'espsa,
Za metəre pi: "Hun Bez ğarnu,
Zu ğeyinaxun vi Bava k'aleğoz.
8 Zaxun çureki,
Zuval azuk'xo vi kiyel tadaz,
Bito oç̌alxo vi baz.
9 Şot'oğo vi turin oq'a laxalnu,
Sa q'əlik'ə xoxp'ala k'inək' duği xoxp'alnu"».
10 Şot'o görəl, ay padçağxo, ef haq'ıla ef bel topbanan,
Müdrik bakanan, ay me dünyəne bakala kalaluğbalxo!
11 Q'ončuğo çalxi
Şot'o bul k'os'bsuni mǔqluğa aç̌espsunaxun q'ı̌banan!
12 K'os'baki Ğare turin oq'axun muçp'anan!
Tene İz əcuğ bəc'ük'eğon,
Ef tağala yaq'a və̌x k'as'p'i śinek'on,
Axıri Şot'ay əcuğ kološ bəc'ük'eğala k'inək'e bəc'ük'esa!
İzi hər şeya Şot'ost'a ak'alo he bəxt'əvəre!