«Ǐvel mə̌ğurxo» girk Bibliin boş bakala ən gözəl girkurxoxun soğone. Miya sa amdaren təə, cöy-cöy amdarxon śampi mə̌ğure bu. Ama şorox bito t'ema gözəle śameśe ki, me girkə k'alpit'uxun oşa me mə̌ğurxoy ük'e nu basksun, Buxačuğoy kalaluğa p'urum ç̌oyel c'evk'i Şot'ay běš bul nu k'os'bsun mümkün tene!

Girke boş bakala mə̌ğur cürbəcür s'iyen śameśi mə̌ğure: Buxačuğoy s'iya alabala mə̌ğur, Buxačuğo k'alpseynak' bakala mə̌ğur, p'urin loxol mə̌ğk'ala mə̌ğur, Yerusalima tağat'an mə̌ğbseynak' q'a t'e gane ı̌velluğa ak'est'eynak' bakala mə̌ğur, Buxačuğo şükürbala saal padçağ laxat'an mə̌ğěğala mə̌ğur. Bəzi mə̌ğurxon isə şot'o śampit'ay mǔqluğa, q'ı̌ya, dərde boş baksuna nəəl izi taxsıra q'amişakit'uxun oşa Buxačuğon içu bağışlayinşeq'an pi Şot'o hetər afırıpi xoyinšpsunane ak'est'a.

Me girke boş İsus Xrist'osi me dünyəne sa Çark'est'al k'inək' eysuna ak'est'ala mə̌ğural bune. Buxačuğon amdarxoynak' laxi padçaği barada śameśi 2-ci q'a 109-ci mə̌ğal, me dünyəni günaxa os'k'i taşt'uni barada śameśi 21-ci mə̌ğal İsusi barada saturběš avabakest'i məğurxoxune hesabbaksa. Ama běğanan me mə̌ğur İsus Xrist'osi nanaxun baksunaxun heq'ədər běše śameśe! Metər, Buxačuğon yaynak' Çark'est'al yaq'absuna cürbəcür yönurxon ak'est'i mot'o yax avabakest'un çuresun p'urum ç̌oyel c'erine baksa.

Girk qo hissinəne cöybaksa (1-41; 42-72; 73-89; 90-106; 107-150). Hər hissəl xeyir-bərəkət tadala mə̌ğene çarksa. Ama hissox içal sunaxun ğaç̌e: süft'in mə̌ğ dirist' girkeynak' sa běšin əyit k'inək'e, qomci hissin axırınci mə̌ğ isə dirist' girke axırınci xeyir-bərəkət tadala mə̌ğ k'inək'e.

Girke boş bakala bulurxoy nömroox urusin muzin bakala girkəxun c'ək'esa. Moval girkə mani damna ı̌vel śama běği muza tarast'axun asulune. Me girke boş bakala nömroox damna əbrani muzin bakala ı̌vel śame nömroğoxune sa eysa.

Me girke boşal, «C'eysun» girke boş bakala k'inək', gele gala Buxačuğon İçu İzi azuk'a çalxest'at'an pi s'ine śamesa. Buxačuğon İçu «C'eysun» girke 3:15-ci bəndəst'a "Yahve" pine çalxest'ey, me əyitəl əbrani muzin "Həmişə Bakalo" upsune. Ama me "Yahve" s'iya beş muza "Həmişə Bakalo" k'inək' taradat'an hər gala əşp'est'un çətin baksuna görə, yan maya ki, əbrani muzin "Yahve" əyit bune, kala tarurxon Q'ončux k'inək'yan śampe. Mis'ik' tarurxon "Q'ončux" k'inək' śameśi ganxo isə əbrani muzin Buxačuğoy t'iyə̌min s'iyurxoxun soğo bakala "Adonai" śameśi ganxone.

Bəzi mə̌ğurxo hələ burqat'an şot'o şine śampe, şot'o hetər mə̌ğbsuni, mani ət't'əcen farpi mə̌ğpsuni barada śamure bu. T'iya bakala əyitmoğoy gelo həysə əştenesa, şot'oğoy k'ə upsuni barada sal alimxon dəgig tet'un ava, şot'o görəl bəzi ganxo ef běš nu çalxala, beşi muza nu tarades bakala əyitmux c'eğale.