18
18-ci Ǐvel mə̌ğ
(2 Şam. 22:1-51)
Fark'alxoy dəst'in kalat'aynak'. Q'ončuğon iz k'ul bakala Davida bito düşmənxoy q'a Şauli kiyexun çark'est'at'an Daviden Şot'aynak' mə̌ğpi Ǐvel mə̌ğ.
1 Şot'in metəre mə̌ğpi:
Va çurezsa, ay Q'ončux! Za zor tadalo Hunnu.
2 Q'ončux zaynak' sa q'aya, alloy q'ala, çark'est'ale bezi Şo!
Buxačux bezi bač'an, umudi ga,
Bezi zorba çark'est'al, za q'orişalone Şo.
3 Tərifləyinşbsuna laft'ala Q'ončuğo k'alk'oz,
Şot'ine za düşmənxoxun çark'est'ey.
4 Bisun ı̌šalayinşakeney za,
Acal hari bez q'oq'exun ləçəq'eśeney.
5 Sa p'uri k'inək'zuy zu,
Bez sa tur gərəmzoğoney.
6 T'arnu baft'i Q'ončuğoz k'alpi zu,
Bezi Buxačuğoz xoyinšp'i,
Şot'inal İz ı̌vel ganu inebaki za,
Bez haray p'anep'i Şot'o.
7 T'e vədə Q'ončuğoy əcuğ bəc'ük'eśi:
Oç̌ale ǰı̌k'eśi, buruxmuxe iz ganuxun galpi.
8 Şot'ay bǒxmǒğoxun k'üün,
İz ǰomoxun hər şeya bok'osp'i śik'ala aruxe c'eri,
Bok'ala s'ile bari ǰomoxun Şot'ay.
9 Göyurxone t'ağaybi śiri Şo,
Boç̌u asoyxoney turin oq'a Şot'ay.
10 Angeli loxole purpi Şo,
Muşane əmirbi, şot'inal İçu iz q'ənədi loxole ext'i taşeri.
11 Boç̌u bayinq'luğene bəc'ürpi İçu,
Mə̌yin asoyxone İz loxol lap't'i.
12 Şot'ay s'alst'unaxun asoyxo qı̌baki təəre bari,
Şot'ay sakala işiğaxun s'ə̌q'ene duği.
13 Q'ončuğoy səsəxun göyene gürupi,
Oç̌ala Ala Arśit'ay səsene haq'i.
14 Şot'in İz oxurxo tərbi düşmənxone irap't'i,
S'ə̌q'e duğsunaxun içoğoy yaq'at'un aç̌esp'i şot'oğon.
15 Oqurxoy tume ak'eśi t'e vədə,
Oç̌ali binorane ç̌oyel c'eri!
Dünyənə q'ı̌ya badala Vi səsene bi mot'oğo, ay Q'ončux,
Bǒxmǒğoxun c'eğala nəfəsi zorene bi!
16 Q'ončuğon alaxun za kule boxodi,
Batk'i tağala ganuxun zapi c'evek'i.
17 Za zorba düşməni kiyexune çark'est'i,
Zaxun zorba bakala düşməni kiyexun!
18 Bez bist'una ak'i, bez loxol hariyoroxey şorox,
Ama Q'ončuxe bez bač'ane çurpi.
19 Q'ı̌ nu bakala galane eçeri za Şot'in,
İz piyes şaat' ak'eśit'u çark'esedi.
20 Bezi düzgün baksuna görəne köməybi za Şot'in,
Bez kiin saycə təmiz əşur biq'suni əvəzəne tadi.
21 Axıri Q'ončuğoy yaq'enez taysa zu,
Şot'oxun ç̌o taradi pisluğ tezbsa.
22 Şot'ay k'anunxo bitova bez ǔmǔğo sırığanez bi,
İz buyruğxoxun tez c'eri.
23 Şot'ay běš bez ç̌o mas'ine,
Günaxa za ı̌ša bist'a tez barte zu.
24 Bez düzgün baksuni əvəzəne tadi za Q'ončuğon,
Bez kiin saycə təmiz əşur biq'suna aneksa Şot'in.
25 Vaxun ç̌o nu taradalt'uxun Hunal Vi ç̌oya taratenst'a,
Şaat' bakalt'aynak' Hunal Vi şaat'luğa kamtenbsa.
26 Ük' təmizt'uxun iz muzinen əyite,
Bic'luğ əşp'est'alt'uxun iz muzin.
27 İçu oq'a biq'i əyit běğalt'u çark'esendon Hun,
İçu ala biq'i içoğoxun irəzi bakalt'oğoynak' oq'a bist'uni k'ə baksunan ak'est'on.
28 Hun bezi yəşəyinşə işiğ sakalonu, ay Q'ončux!
Za bayinq'luğa ašt'a nu bark'alonu, ay Buxačux!
29 Vi köməyenez q'oşuni loxol tağon zu,
Hunen za q'aloğo śarpest'i şəhərmoğo ext'est'es bakon.
30 Buxačuğoy laxi yaq'ast'a k'ori ga,
İz əyitəst'al noxsan butene,
İçu umudbakalt'oğo q'orişi efalone Şo.
31 Q'ončuğoxun başq'a Buxačux bune ki?
Şuva beşi Buxačuğoxun başq'a yax q'orişi efalo?
32 Buxačuxe za zor tadalo,
Bez yaq'a hamavar balo.
33 Marali turmoğoxune tadi za Şot'in,
Bez turmoğo oç̌ala lafst'a tene barti.
34 Bez kulmoğo davineynak'e həzirbi,
Lap misə k'oribala zore tadi za.
35 Ay Q'ončux, Vaxun eğala çark'esunene za q'orişi,
Vi sa kul həmişə bez loxole baki,
Vi ük' bok'ospsune bez s'iya alabalo.
36 Bez tağala yaq'an gengbi Hun,
Lə̌ngbat'an lamandalatezu zu.
37 Bez düşmənxoy bač'anexun baft'i bizq'i şot'oğo zu,
Əfçibinut'al qoş qaytezbaki.
38 K'as'p'i śizpi şot'oğo zu, hayzalatet'un ene,
Bez turin oq'at'un past'eśi şorox.
39 Hun za davineynak' zoren tadi,
Bez loxol ěqeśit'oğo bez turin oq'an saki.
40 Bez düşmənxo fırıpi t'it'alat'un baki,
Za nifrətbalt'oğo əfçizbi zu.
41 Şot'oğon şivanbi köməyt'un çureśi, ama çark'est'al tene baki,
Şot'oğon Q'ončuğot'un k'alpi - Şot'inal İz kula tene boxodi,
42 Şot'oğo č'ak'p'i muşen taşala tozez bi,
Bezi turin oq'a oč'i bi ç̌axç̌uxezpi.
43 Hun bez loxol ěqeśi azuk'axunen za çark'est'i,
Millətxoy loxol kalon laxi za.
Bez nu çalxala azuk'xo hari bez q'ulluğane çure,
44 Bezi sa əyitə p'ə̌tet'unbsa.
Q'erəz oç̌alxoxun bakalt'oğon bez turin oq'axunt'un muçe,
45 Ük' tene mande şot'oğost'a,
İçoğoy c'ap'baki ganuxun c'eğat'an t'ut'uk'at'un c'eysa.
46 Həmişə dirist' bakala Q'ončuğo,
Zaynak' sa q'aya bakalt'aynak' alxışq'an baki!
Za çark'est'ala Buxačuğoy s'iya alabanan!
47 Şo za pisluğbalt'oğoxun həyif haq'ala Buxačuxe,
Bito azuk'xo bez kiyel tadala Buxačuxe.
48 Hun za bez düşmənxoxunen çark'est'i,
Bezi loxol ěqeśit'oğoy běš za alanbi,
Q'əddar amdari kiyexunen za ext'i Hun.
49 Zuval bito azuk'xoy boş Va alxışp'oz,
Vi s'iya alabala mə̌ğur mə̌ğk'oz!
50 Q'ončuxe İz c'ək'p'i padçağa düşmənxo saki ç̌axç̌uxp'est'alo,
Şone Davideynak' q'a iz nəsileynak' nu badalbakala çuresun ak'est'alo!