17
17-ci Ǐvel mə̌ğ
Davidi afırı
1 Ay Q'ončux, me taxsırsuz bakalt'u ibaka,
Bezi afırına coğabsuz ma efa,
J̌omoxun əfçi əyit nu c'eğalt'ay haraya p'ap'a!
2 Bezi əşlə Hun běğa,
Barta Vi piin haq' bakalt'u q'a nu bakalt'u ak'eq'an.
3 Üşe hari bez boş bakalt'oğon piyexun c'ovakest'i.
Bez ük'e bakalt'oğon yoxlayinşi, ama taxsır ten bə̌ğə̌bi,
Şot'o görə ki, bezi ǰomoxun günaxa taşala əyitmux tez c'evksa zu.
4 Pis amdarxoxun, şot'oğoy biq'ala əşurxoxun ə̌xilez tarane,
Vi əyiten, Vi ǰomoxun c'eri k'anunxonez taysa zu.
5 Vi laxi yaq'az c'ək'p'e,
Me yaq'axun c'eğalatezu zu.
6 Vaz k'ale, ay Buxačux, avaz ki, za ibakalnu,
Vi ç̌oya zaç tarada, bez afırına coğab tada.
7 Vi nu badalbakala çuresuni k'ə baksuna za ak'est'a,
Va bač'an taradalt'oğo içoğoy düşmənxoxun
Vi zorba kula alabi çark'est'uni k'ə baksuna ak'est'a.
8 Za Vi piin işiğ k'inək' q'orişa,
Za Vi q'ənədxoy oq'a ext'a.
9 Bezi əleyinə c'eri şər amdarxoxun,
Bez hərrəminə biq'est'i za bespsun çureğala düşmənxoxun çark'est'a.
10 Şot'oğost'a gorox eysun butene,
İçoğo tərifbsunaxun başq'a hik'k'al avatet'un.
11 Mone, bez bač'anexun baft'i za pes banekon biq'et'un,
Bezi hərrəminə biq'est'i saksuni hayext'un.
12 Busa şir k'inək't'un şorox,
Ǒxə̌lə c'eri aslan k'inək' busq'una arśi yaq't'un běğsa şot'oğon.
13 Şot'oğoy běš c'eki, ay Q'ončux, Vi şu baksuna ak'est'i saka şot'oğo!
Vi q'ılıncen şot'oğoy loxol taśi pist'oğoy kiyexun çark'est'a za!
14 Vi kiin za metər amdarxoxun çark'est'a, ay Q'ončux,
Me dünyənexun içoğoxun hik'k'al nu taşes bakalt'oğoxun çark'est'a za.
Barta Vi şot'oğoynak' həzirbi caza içoğoy xirt't'əyel śirik'q'an baki,
Barta me cazinaxun içoğoy əyloğo ukest'i
Mandit'u nəvoğoynak'al efes bakeq'at'un!
15 Ama zu taxsırsuz baksuna görə Vaxun ə̌xil tez bital,
Bez pula qayk'at'an Va bez t'ǒğǒl aksun bəsbakale za!