137
137-ci Ǐvel mə̌ğ
1 T'iya, Vavilona bakat'an,
Oqe börine arśi ǒneyanney yan Siona eyex badat'an,
2 Beşi arfoğoxun səs tene c'eysay ene,
Ext'i söyüdnə xodurxoy loxolyan suruk'p'ey şot'oğo.
3 Yax beş oç̌alxoxun c'evk'i taşerit'oğon yaxun mə̌ğt'un çuresay,
Yax zülüm tadalt'oğon içoğoy ük'q'an qayeśi pi
"T'e Sioni mə̌ğurxoxun sunt'u mə̌ğpanan" next'uniy.
4 P'oy hetəryan mə̌ğk'on yan Q'ončuğoynak' bakala mə̌ğurxo
Me buxačuxsuzt'oğoy ölkinə?
5 Bez yön kulq'an q'aribaki, ay Yerusalim,
Əgər va eyexun c'evk'ayiz.
6 Bezi muzq'an lalbaki əgər va eyexun c'evk'ayiz,
Əgər Yerusalim bezi ən kala mǔqluğ tenesa.
7 Edomluğoy bit'oğo Vi eyex bada, ay Q'ončux,
Eyexun ma c'evk'a vavilonluğon Yerusalima içoğoy kiyel badat'an şot'oğoy pit'oğo:
"Śarpanan kot'o, śarpi oç̌alen sabanan".
8 Ay vavilonluyox, ği tenan ak'al və̌n,
Xeyir-bərəkət haq'ale efi yax zapest'it'u və̌x zapest'alt'in!
9 Xeyir-bərəkət haq'i bakale efi körpoğo ext'i ǰěna duği śark'alt'in!