135
135-ci Ǐvel mə̌ğ
1 "Q'ončuğo halalq'an baki" upanan!
Q'ončuğoy s'iya alabi Şot'o "halalq'an baki" upanan,
Ay Q'ončuğoy nökərxo, Şot'o "halalq'an baki" upanan!
2 Ay Q'ončuğoyxrama,
Beşi Buxačuğoy xrame məəlne q'ulluğbalorox,
3 "Q'ončuğo halalq'an baki" upanan!
Şot'aynak' ki, şaat' bakalone Şo,
Amdarane mǔqst'a Şot'ay s'iya alabsunen!
4 Axıri Q'ončuğon İak'ovi nəsilə İçeynak'e c'ək'p'i,
İsraila İzi azuk'e bi Şot'in.
5 Avazu ki, Q'ončux kalane,
Beş Q'ončux bito buxačuxxoxun üst'üne.
6 Göyurxo, oç̌ali ç̌o, dənizxo, bə̌ğə̌loyluğxo -
Morox bito beşi Buxačuğoy kiyele,
İzi çureğala k'inək'e baksa miya hər sa şey.
7 Asoyxone eşt'a Şot'in oç̌ali t'e belxun,
Ağala eğat'an duğala s'ə̌q'al Şot'ay əşe.
Fupi taşala muşal Şot'ine yaq'absa İz girbi efi ganuxun.
8 Şot'in misirluğoy boş k'ə k'ojin kala ğar bunesa bitova besebi,
İnsani eçeri süft'in ğar əyləxun burqi heyvani süft'in ərkəy balinal śirik'.
9 Nu ak'eśi, beyne nu p'aq'ala əşure biq'i Şot'in vi oç̌ala, ay Misir,
Faraonen q'a izi sarayi amdarxont'un mot'oğo içoğoy loxol hisp'i.
10 Gele azuk'xone əfçibi Şot'in,
Zorba padçağxone k'as'p'i śipi.
11 Emorluğoy padçağ Sixona,
Başani padçağ Oga,
Saal Kənani bito padçağxone əfçibi.
12 Şot'oğoy oç̌alxo içoğoy kiyexun ext'i
İzi azuk' bakala israilluğone həmişəluğ tadi.
13 Vi s'i həmişə t'ap'eğale, ay Q'ončux,
Nəsilxoval hari badalbakayin Vi kalaluğ eyexun tene c'eğal.
14 Q'ončuğon İçin İz azuk'i taxsırsuz baksuna ç̌oyel c'evk'ale,
İzi ük' bok'ospsuna kamtenebal İz k'ulurxoxun .
15 İçoğoy kiin düzbi binik' buxačuxxot'unbul k'os'bsa q'erəz millətxon,
Q'ızılen, gümüşen düześi binik'xone şorox.
16 J̌omo bune, ama əyittet'unne,
Pulmux bune, ama atet'unksa.
17 Ǔmǔxxo bune, ama tet'un ibaksa,
J̌omo bune, ama nəfəs tet'un haq'sa.
18 Barta mot'oğo düzbalt'oğoy q'a
Mot'oğo umudbakalt'oğoy axıral hametərq'an baki.
19 Ay İsrailaxun bakiyorox, Q'ončuğo tərifləyinşanan!
Ay Aaronaxun bakiyorox, Q'ončuğo tərifləyinşanan!
20 Ay Levinaxun bakiyorox, Q'ončuğo tərifləyinşanan!
Ay Q'ončuğo çalxalorox, Şot'o tərifləyinşanan!
21 Barta Siona bakalt'oğon,
Barta Yerusalima bakala ı̌vel gala bul k'os'balt'oğon
T'iya məsk'ən saki Q'ončuğoy s'iya duği Şot'o tərifləyinşeq'at'un.
"Q'ončuğo halalq'an baki" upanan!