Udi Bible Ǐvel mə̌ğurxo 120

120

120-ci Ǐvel mə̌ğ

Sion buruğoy bel bakala Yerusalima lağat'an mə̌ğěğala Ǐvel mə̌ğ *

1 Bez t'ar ğine Q'ončuğoz k'alpi zu,

Şot'inal za inebaki.

2 Zu pizu: "Ay Q'ončux, za amdarxoy ǰomo bafst'a ma barta,

Za əfçiduğalxoxun ə̌xilba".

3 Ay əfçiduğal, t'etəren ava ki, Buxačuğon va cazasuz efale?

Şor běnğsa viyo va tene tadeğal?

4 Q'oççaği bosala şiş xişt'ik'xo t'ə̌q'ěğale va,

Bok'ala s'il barale vi bel!

5 Goroxez baki miya zu, me vǔğ buruğoy bač'ane,

İnsanluğaxun pay nu bakalt'oğoy aranez baksa zu. †

6 Bəse bezi me serluğ hik'ə nu avabakalt'oğoy arane bakiyo!

7 Zu içoğo "ekinan sunaxun muč'a baken" nexzu,

İçan isə davat'un qə̌věsa.

* 120: Me mə̌ğurxo (120-134) axsibayxost'a Yerusalima bakala Buxačuğoy xrama bul k'os'bseynak' tağalt'oğont'un mə̌ğěy. † 120:5 Ǐvel mə̌ğə̌ śampit'in miya əbrani muzin "Meşek'" uk'ala gane q'a "K'edar" uk'ala tayfin s'iyane duğsa.