119
119-ci Ǐvel mə̌ğ
1 He bəxt'əvərt'un Q'ončuğoy laxi k'anunaxun nu c'eri
Düzgün yaq'en tağalorox!
2 He bəxt'əvərt'un Şot'o ük'in qə̌věśi,
Şot'ay bürüşit'oğo əməlbalorox!
3 Şuk'k'ala pisluğ nu balorox,
Şot'ay laxi yaq'en tağaloroxe şorox.
4 Ögüd-nəsyət tadiyonu Hun yax,
Şot'oğo əməlbsuna əmirbiyonu.
5 Ç̌omə̌yinq'uz baki zu Vi laxi q'aydoğon nu tağayiz,
6 Vi bürüşit'oğo əməlbsunene bez ç̌oya mas'ibsa.
7 Təmiz ük'en Vi s'iya alaboz zu
Vi düzgün q'ərarxo ak'at'an.
8 Vi laxi q'aydoğon tağoz zu,
Vi ç̌oya zaxun ma tarada sal sa vədine Hun.
9 Cəyili düz yaq'a baksuna het'ine ak'est'a?
Şot'ay Vi əyitəxun nu c'eysunen!
10 Ük'enez qə̌věsa Va zu,
Barta Vi laxi yaq'en taśi
Vi buyruğxo əməlbes bakaz zu.
11 Vi piyes günax bakala əş nu biq'seynak'
Vi pit'oğoynak' bez ük'e gazbi zu.
12 Alxışq'an baki Va, ay Q'ončux!
Za Vi q'aydoğon taysuna zomba,
13 Vi ǰomoxun c'eri bito q'ərarxo
Soğo-soğo bez muzelez eşt'a zu.
14 Kala sa var-dövlətə mǔqbakala k'inək'ez mǔqbaksa zu
Vi bürüşit'oğo bex p'ap'esp'at'an.
15 Vi tadi ögüd-nəsyətxoy loxole bez fikir,
Vi laxi yaq'ane qə̌věsa bez piin.
16 Mǔqluğe eşt'a zaynak' Vi laxi q'aydoğon,
Vi pit'oğo eyexun tez c'evk'on zu.
17 Vi ük' bok'ospsuni k'ə baksuna ak'est'a me Vi k'ula ,
Barta yəşəyinşi Vi əyitə əməlbes bakaz.
18 Qaypa bez pulmoğo,
Barta Vi k'anunen bes bakalt'oğo ak'es bakaz.
19 Q'onağzu zu me dünyəne,
Ma barta bezi Vi bürüşit'oğon zombalt'oğo nu ak'i k'ač'i manst'una.
20 Vi q'ərarxoxunez fikirbsa zu üşe-ğena,
Bez ük'əz xebi zu şot'oğoynak'.
21 İçoğoy galan arśest'i Hun Vi buyruğxo hik'k'albi içoğoy ǰomoy tüşen tağalt'oğo,
Vi q'arğişi k'ə baksuna ak'iyoroxe şorox.
22 Mǔqmada şot'oğo,
Vi bürüşit'oğo əməlbalt'u
Ç̌omə̌yin, biyaburbaksuni k'ə baksuna ak'esmada.
23 Mone, kalaluğbalxon gireśi bez əleyinəl əyitk'ayt'un
Bez fikir Vi laxi q'aydoğoy loxole.
24 Vi bürüşit'oğone za mǔqst'a,
Şoroxe za yaq' ak'est'alo.
25 Mone, p'uri k'inək'zu ene zu,
Çurpa Vi əyiti loxol, za yəşəyinşa qayda.
26 Bezi hər lə̌ngən avabaki Hun, Va k'alk'at'an za inbaki,
Zomba za Vi laxi q'aydoğon taysuni k'ə baksuna.
27 Vi ögüd-nəsyətxon tades bakalt'oğo zomba za,
Barta Vi biq'i əşurxoy heq'ədər kala əşur baksuna q'amişakaz zu.
28 P'ine ǒnene bez ük'en,
Ük' tada za, çurpa Vi əyiti loxol.
29 Ma barta za əfçi yaq'en taysa,
Vi ük' bok'ospsuni k'ə baksuna ak'est'a,
Vi laxi k'anunxon taşa za.
30 Bez ç̌oya Vaxun tez taradon zu,
Vi q'ərarxonez taysa zu.
31 Vi bürüşit'oğoz biq'i çurpe zu, ay Q'ončux,
Za ç̌omə̌yin ma ba.
32 Vi buyruğxon taysune bez çureğalo,
Şot'oğo əməlbsunene za q'amişaksun tast'a.
33 Vi q'aydoğon taysuni k'ə baksuna ak'est'a za, ay Q'ončux,
Barta həmişə Vi laxi yaq'en tağaz.
34 Za Vi k'anunen taysuna zomba ki, zuval şot'oğo əməlbaz,
Şot'oğo bez ǔmǔğo sırığan baz zu.
35 Za Vi buyruğxon ak'est'ala yaq'en taşa,
Şot'oğoxunez mǔqbaksa zu.
36 Barta Vi bürüşit'oğo əməlbsunq'an baki bezi ük'exun c'ovakalo,
Var-dövlət girbsun təə.
37 Ams'i şeyurxoy bač'anexun t'ist'a ma barta za,
T'etər ba ki, Vi laxi yaq'en taysunenq'an c'ovaki bezi yəşəyinş.
38 Va bač'an taradit'oğo tadi əyiti loxol çurpa,
Barta mo Vi k'uleynak'al q'ısmat bakeq'an.
39 Za ç̌omə̌yin bi bez pula haq'alt'oğoxun ə̌xilba,
Vi q'ərarxoxun şaat'o butene zaynak'.
40 Bez cicirxone ç̌ane Vi ögüd-nəsyətxoynak',
Ak'est'a Vi düzgünluği k'ə baksuna, yəşəyinşest'a za.
41 Ak'est'a Vi nu badalbakala çuresuni k'ə baksuna, ay Q'ončux,
Vi tadi əyiti loxol çurpi çark'est'a za!
42 Barta bezi loxol içoğoy muz c'eğalt'oğoy coğaba tades bakaz,
Axıri Vi tadi əyitəz bač'an tarast'a zu.
43 Barta Vi düzgünluğa ak'est'ala əyitmux bez ǰomoxun maq'an biti,
Vi q'ərarxon bes bakalt'oğo avazu zu.
44 Vi laxi k'anunxoxun sal sa vədə tez c'eğal zu,
Şot'oğo həmişə əməlboz.
45 Tur ǰena tene laft'al bezi,
Axıri Vi tadi ögüd-nəsyətxon laxi yaq'en tağoz zu.
46 Vi bürüşit'oğoxun exlətp'oz zu padçağxoynak',
Bez ç̌oya mas'ibale şot'oğon.
47 Vi buyruğxo əməlbsunast'az aksa zu bez mǔqluğa,
Şot'oğoz çuresa zu.
48 Bez ük'el bask'i Vi buyruğxo əməlbes bakseynak'ez k'alpi xoyinšpsa Va,
Vi laxi q'aydoğoy loxole bez fikir.
49 Me Vi k'ula tadi əyitə eyexun ma c'evk'a,
Axıri za umud tadiyonu Hun.
50 Vi tadi əyitene za yəşəyinşest'a,
Za ük' tadalone şo bezi tar ğine.
51 Axšumt'unne bez loxol içoğoxun irəzi bakalt'oğon,
Ama tez c'eysa zu Vi laxi k'anunxoxun.
52 Vi hələ damna döörəst'ə c'evk'i q'ərarxoxunez fikirbsa zu,
Şot'oğone za arxayinbsa, ay Q'ončux.
53 Vi laxi k'anunxoxun c'erit'oğo
Ak'ala pul tene bu bezi.
54 Ǐvel mə̌ğě baki zaynak' Vi laxi q'aydoox,
Şot'oğoz mə̌ğpi zu bezi q'onağ bakala me dünyəne.
55 Üşe bakat'an Vi s'iya eyex badi
Vi şu baksuna lap şaat'ez aksa zu, ay Q'ončux,
Vi laxi k'anunxoxun c'etezğon zu.
56 Vi tadi ögüd-nəsyətxonez yəşəyinşbsa,
Şot'oğoz c'ək'p'i zu.
57 Bez paynu koft'i, bez k'odoğo śameśi neymətnu Hun, ay Q'ončux,
Vi pit'oğoxun nu c'eysunaz əyit tade zu.
58 Va k'alpi xoyinšpsune bez ük'exun c'ovakalo:
Vi tadi əyiti k'ə baksuna ak'est'a,
Vi ük' bok'ospsuna kammaba zaxun.
59 Bezi tağala yaq'az fikir tadi zu,
Vi bürüşit'oğon taśi Vi piyes şaat' ak'eğala yaq'az c'ək'p'i.
60 Vi buyruğxo əməlbseynak'ez kape zu,
Mot'oğo bseynak' vaxt' tez aç̌espsa.
61 Pist'oğon zaynak' laxi təloğo bafaldayiz,
Vi laxi k'anunxoxun tez c'eri zu.
62 Lap üşeyal hayzeri Vaz şükürbsa,
Vi düzgünluği k'ə baksuna ak'est'ala q'ərarxoynak'ez şükürbsa.
63 Va çalxalt'oğoxun,
Vi tadi ögüd-nəsyətxon tağalt'oğoxunez arśi-hayst'a zu.
64 Vi nu badalbakala çuresunen buye me dünyə, ay Q'ončux,
Zomba za Vi laxi q'aydoğon taysuna.
65 Vi tadi əyiti loxol çurpi
Şaat'luğen bi Hun me Vi k'uleynak' , ay Q'ončux.
66 Hər şeya q'amişaksuni q'a ə̌xilaksuni k'ə baksuna zomba za,
Vi laxi buyruğxon bes bakalt'oğo avazu zu.
67 Vi laxi yaq'axun c'erezuy zu,
Ama Hun ak'esendi mot'ay cazin k'ə baksuna,
İsə mone, əməlezbsa Vi əyitə zu.
68 Hun şaat' bakalonu, Vi biq'ala əşural şaat'e,
Zomba za Vi laxi q'aydoğon taysuna.
69 İçoğoxun irəzit'oğon bezi s'iyat'un ləkələyinşbsa,
Ama zu Vi tadi ögüd-nəsyətxo bez ǔmǔğo sırığanez be.
70 Hik'k'al t'ə̌q'tenesa şot'oğo, ǰě biq'ene içoğoy ük'en,
Ama zu Vi k'anunxo əməlbsunast'az aksa bez mǔqluğa.
71 Şaat'e ki, za Vi cazin k'ə baksuna ak'esendi,
Vi laxi q'aydoğon taysunaz zombaki zu.
72 Sahəkət q'ızılaxun q'a gümüşəxunsa,
Vi ǰomoxun c'eğala k'anun şaat'e zaynak'.
73 Za Vi kiinen düzbi yaratmişi Hun,
İsə q'amişaksun tada ki, Vi buyruğxoy k'ə baksuna ak'az.
74 Va çalxalt'oğonal bez loxol běği mǔqbakalt'un,
Axıri Vi tadi əyitəz bač'an taradi zu.
75 Ay Q'ončux, avazu ki, düzgün q'ərarxone Vi q'ərarxo,
Za cazina hat'etər gala ten zapest'e Hun.
76 İsə çurpa Vi tadi əyiti loxol,
Barta Vi nu badalbakala çuresuna ak'i arxayin bakeq'an me Vi k'ul .
77 Kammaba zaxun Vi ük' bok'ospsuna, barta yəşəyinşaz,
Vi k'anunxo əməlbsunast'az aksa bez mǔqluğa zu.
78 İçoğoy za nahaq' gala ç̌omə̌yin c'evksuna görə
Barta içoğoxun irəzit'oğoy ç̌oyenq'an ot'p'i;
Bez fikir isə Vi tadi ögüd-nəsyətxoy loxol bakale.
79 Barta Vi bürüşit'oğo q'amişaki Va çalxaloroxq'an
Bez bel gireśi.
80 Barta Vi laxi q'aydoğo hetər lazıme əməlbes bakaz ki,
Bezi ük'əl arxayinq'an baki,
T'e vədə bezi ç̌oyenal tene ot'p'on.
81 Bezi cicirxone ç̌ane Vi tades bakala çark'esuneynak',
Ama Vi tadi əyitəxun bezi umuda tez bost'a zu.
82 Bezi pulmuxe c'irap'eśi Vi tadi əyiti bex p'ap'suna yaq'běğsunaxun,
"Bezi loxol hevaxt' běğalnu" uk'a çurpezu.
83 Ǔğǔl k'üüni boş biti meşik' k'inək'zu zu,
Ama Vi laxi q'aydoğoxun tez c'eysa.
84 Heq'ədər yaq'běğala bakale hələ me Vi k'ul ?
Hevaxt' Vi q'ərara c'evk'i bez bač'anexun baft'it'oğoy cazina zapest'alnu?
85 Běğa, bezi turin oq'axunt'un kaše
İçoğoxun irəzi baki Vi k'anunxo hik'k'al balt'oğon.
86 Taxsır tene bu bezi, ama p'urumal kul tet'un haq'sa zaxun,
Çark'est'a za şot'oğoy kiyexun,
Bač'an tarades bakala buyruğxone Vi buyruğxo.
87 Male manst'a ki, za tumexun əfçibat'un,
Ama Vi tadi ögüd-nəsyətxo eyexun tez c'evksa zu.
88 Ak'est'a Vi nu badalbakala çuresuna, barta yəşəyinşaz,
Barta Vi muzin bürüşit'oğo əməlbes bakaz.
89 Həmişəluğ c'ovakala əyite Vi pi əyit, ay Q'ončux
Göyürxone ibake Vi pit'oğo.
90 Nəsilxoval hari badalbakayin beşi bač'ane çurpiyonu Hun,
T'etəren laxi ost'aarbe ki me oç̌ala, iz ganuxun tene galk'on şo.
91 Vi q'ərarxone efe bitova ğeyin ğinal śirik',
Şot'o görə ki, Vi pit'oğo əməlbseynak'e hər şey.
92 Vi k'anunxoxunez mǔqbaksa zu,
Şorox nu bakiyniy, isə p'urezuy dərd zapsaxun.
93 Vi tadi ögüd-nəsyətxo sal sa vədə eyexun tez c'evk'on zu,
Bezi şot'oğo əməlbsunene yəşəyinşest'a za.
94 Çark'est'a za, axıri zu Vizu,
Vi tadi ögüd-nəsyətxon laxi yaq'en tağoz zu.
95 Əfçibsunt'un çuresa za pist'oğon,
Ama bez fikir Vi bürüşit'oğoy loxole.
96 Tam noxsansuz hik'k'al butene,
Saycə Vi bürüşiyoroxe noxsansuzaxunal noxsansuz bakalo.
97 Gelez çuresa zu Vi k'anunxo,
Şot'oğoy loxole bez fikir üşe-ğena.
98 Vi buyruğxon za bez düşmənxoxun ə̌xilak'ale bi,
Şot'oğo sal sa vədə bez piyexun t'ǒǒxtezbi zu.
99 Bezi bito məəlimxoxun müdrikzu,
Şot'o görə ki, Vi bürüşit'oğoy loxole bez fikir.
100 Zu ağsaq'q'alxoxun gelez q'amiş,
Şot'o görə ki, Vi tadi ögüd-nəsyətxonez taysa.
101 Za pis yaq'en taşes bakala hər şeyaxun ə̌xilez tarane zu,
Şot'o görə ki, Vi əyitenez taysun çuresa.
102 Vi q'ərarxo nu aksuna tez laxsa zu,
Axıri Hunnu za hər şeya zombalo.
103 Muč'ane zaynak' Vi ǰomoxun c'eğala hər əyit,
Uč'axunal muč'ane şorox zaynak'.
104 Vi ögüd-nəsyətxon za düzə q'a k'orina c'ək'p'es bakala q'amişaksune tast'a,
Şot'o görəl düz nu bakala yaq'a nifrətezbsa zu.
105 Çirağ k'inək'e Vi əyit bezi hər lə̌ngeynak',
İşiğe saksa şot'in bezi tağala yaq'a.
106 Elasp'i əyitez tade zu Vi düzgün q'ərarxo əməlbsuna,
Bezi əyiti loxolal çurk'oz.
107 Koruğez aksa zu, ay Q'ončux, yəşəyinşest'a za,
Ak'est'a Vi tadi əyiti loxol çurpsuni k'ə baksuna.
108 Ük'exun eğala əyitmuxe bez əyitmux, ay Q'ončux,
Vi upsuna görə təə, ük'exun c'ovaksuna görə eçala sa q'urban k'inək' q'abulba şot'oğo,
Vi q'ərarxo əməlbsuni k'ə baksunal zomba za.
109 Bez ǰomo kašp'iz tarast'a bez elmoğo zu Va nu çalxalt'oğoy kiyexun,
Ama p'urumal Vi k'anunxo əməlbsunaxun qoştezbaki zu.
110 Tələt'un laxi zaynak' pist'oğon,
Ama zu Vi tadi ögüd-nəsyətxo eyexun tez c'evk'i.
111 Piin işiğ bi efoz zu həmişəluğ Vi bürüşit'oğo,
Ük'e qayesa bezi şot'oğo əməlbat'an.
112 Vi laxi q'aydoğon tağoz zu həmişə,
Mot'ay badalbaksuna imkan tez tadal zu axıral śirik'.
113 Vi pit'oğo qı̌ ük'en əməlbalt'oğo nifrətezbsa zu,
Vi k'anuna isə çurezsa.
114 Vaz bač'an tarade zu, za q'orişalo Hunnu,
Vi tadi əyitəz umudbaksa zu.
115 Ə̌xilbakanan zaxun, ay pis amdarxo,
Bartanan bez Buxačuğoy buyruğxo əməlbes bakaz.
116 Ost'aarba bez elmoğo, barta yəşəyinşaz,
Ak'est'a Vi tadi əyiti loxol çurpsuni k'ə baksuna,
Bezi niyətxo bez boş efi za ç̌omə̌yin ma ba.
117 Za kul biq'a çark'eśes bakaz,
Vi laxi q'aydoğoy heq'ədər şaat' baksuna q'amişakaz.
118 Vi laxi q'aydoğoxun ç̌o taradalt'oğoxun Hunal Vi ç̌oya taranst'a,
Ams'inane taysa şot'oğoy əşp'est'ala bito bic'luğxo.
119 Ext'i bonst'a Hun me dünyəne bakala bito pist'oğo,
Fine tume arśi dördünə bosala k'inək',
Şot'o görəne Vi bürüşiyorox bez ük'e bask'e.
120 Bezi sa hik'k'al baksunaz aksa zu Vi kalaluği barada fikirbat'an,
Vi q'ərarxoy bes bakalt'oğo beyne p'aq'est'ala şey tene.
121 Düzgün q'ərarxoz c'evk'e zu, düz əşurez biq'e,
Za bez düşmənxoy kiyel ma tada.
122 Me Vi k'uleynak' şaat' ğimxo eysuna Vi ozane ext'a,
Ma barta içoğoxun irəzit'oğon za zülüm tadat'un.
123 Bezi pulmuxe c'irap'eśi Vi tades bakala çark'esuna q'a
Vi tadi haq' bakala əyiti bex p'ap'suna yaq'běğsunaxun.
124 Ak'est'a me Vi k'ula Vi nu badalbakala çuresuni k'ə baksuna,
Za Vi laxi q'aydoğon taysuna zomba.
125 Vi k'ulzu zu, za q'amişaksun tada,
Barta Vi bürüşit'oğo q'amişakes bakaz.
126 Hik'k'alt'unbsa Vi laxi k'anunxo, ay Q'ončux,
Mot'ay çarina běğa.
127 Vi buyruğxo zaynak' q'ızılaxun,
Lap təmiz q'ızılaxunal dəyərlune.
128 Düz yaq'ene taşt'a Vi tadi bito ögüd-nəsyətxon,
Mandi əfçinen buy yaq'moğo nifrətezbsa zu.
129 Vi bürüşit'oğon bes bakalt'oğoxun əyitp'i çark'ala şey tene,
Bez ǔmǔğo sırığanez be zu şot'oğo.
130 Pulmuxe qayesa Vi pit'oğo ibaki q'amişakalt'oğoy,
Müdrik sa məəlime bsa Vi əyitmoğon hik'k'alaxun iz xavar nu bakalt'u.
131 Vi buyruğxo əməlbseynak'ez yəşəyinşbsa zu,
Hər hə̌vq'ala nəfəsəl kot'aynak'e bezi!
132 Bez loxol běğa, za gorox eki,
Axıri Va çureğalt'oğo gorox eğalonu Hun.
133 Barta Vi əyitq'an baki za yaq' ak'est'i bezi tura ǰena lafst'a nu bark'alo,
Barta bezi běš c'eğala sal sa pisluğen za sakes maq'an baki.
134 Za pul tadi işiğ nu tadalt'oğoy kiyexun çark'est'a ki,
Vi tadi ögüd-nəsyətxo əməlbes bakaz.
135 Barta Vi ük'e bask'eq'an me Vi k'ul ,
Zomba za Vi q'aydoğon taysuna.
136 Mone, bez piin neğ tene q'aribaksa,
Şot'o görə ki, amdarxon Vi laxi k'anuna hik'k'alt'unbsa.
137 Bitot'ay loxol sa piin běğalonu Hun, ay Q'ončux,
Düzgüne Vi q'ərarxo.
138 Vi bürüşit'oğost'a əfçi butene,
Tam bač'an tarades bakala buyruğxone şorox.
139 Bok'osp'i śinne za
Bezi düşmənxoy Vi pit'oğo hik'k'albsunen.
140 Xebi girbi q'ızıl k'inək'e Vi əyit,
Şot'o görəne şo me Vi k'ule ük'e bask'e.
141 Mis'ik' amdaral bakayiz, bezi loxol k'oriyal běğayt'un,
Vi tadi ögüd-nəsyətxo əməlbsunaxun kultezhaq'sa zu.
142 Vast'a bakala düzgünluğ həmişə c'ovakala sa düzgünluğe,
Vi k'anun seri sa k'anune.
143 Bez bel nu hari əş tene bu, dərde boşzu zu,
Saycə Vi buyruğxone za mǔqt'alo.
144 Düz yaq'ene taşt'a Vi bürüşit'oğon həmişə,
Za şot'oğo q'amişakes bakala müdrikluğ tada ki, yəşəyinşes bakaz.
145 Vane k'alpi xoyinšpsa bezi ük'en, ay Q'ončux, za ibaka,
Vi laxi bito q'aydoğo əməlboz zu.
146 Vaz k'ale, çark'est'a za,
Zuval Vi bürüşit'oğo bex p'ap'esp'oz.
147 İşiğ bitamin hayzeri Vaz k'alpi xoyinšpsa,
Vi tadi əyitəz umud zu.
148 Kəybakamin bez pula tez q'ic'e,
Vi tadi əyiti loxole bez fikir.
149 Ak'est'a Vi nu badalbakala çuresuni k'ə baksuna, ay Q'ončux, za ibaka,
Vi düzgün q'ərarxoy bes bakalt'oğo ak'est'i za yəşəyinşest'a.
150 Mone, pis əşurxoy bač'anexun tağalorox hari p'ap'et'un za,
Vi k'anunxoxun ə̌xil bakaloroxe şorox.
151 Ama Hun bez t'ǒğǒlnu, ay Q'ončux,
Vi buyruğxoval bito serine.
152 Gele vaxt'axunez ava zu Vi bürüşit'oğoy həmişəluğ baksuna.
153 Běğa hetər əzyətez zap'e zu, çark'est'a za,
Axıri Vi laxi k'anunxo nu eyexun c'evk'i əməlbalozu zu.
154 Bez əşlə Hun běği çark'est'a za,
Vi tadi əyiti loxol çurpi za yəşəyinşest'a.
155 Tet'un ak'al Vaxun eğala çark'esuna pist'oğon,
Vi laxi q'aydoğon tet'un taysa şorox.
156 Çark'ala şey tene Vast'a bakala ük' bok'ospsun, ay Q'ončux,
Ak'est'a Vi düzgün q'ərarxoy bes bakalt'oğo, yəşəyinşest'a za.
157 Gelene bezi bač'anexun baft'i zaynak' düşmənçiluğ balorox,
Ama Vi bürüşit'oğoxun c'etezsa zu.
158 Vaxun ç̌o taradit'oğo ak'ala pul tene bu bezi,
Vi əyitə hik'k'al biyoroxe şorox.
159 Běğa heq'ədərez çuresa zu Vi ögüd-nəsyətxo, ay Q'ončux,
Ak'est'a Vi nu badalbakala çuresuni k'ə baksuna, yəşəyinşest'a za.
160 Serine Vi ǰomoxun c'eri əyitmoğoy bito,
Düzgün, həmişəluğ bakala q'ərarxone Vi q'ərarxo.
161 Za pul tadi işiğ tet'un tast'a kalaluğbalxon,
Hik'k'ali loxolt'un bezi bač'anexun baft'e şorox,
Ama saycə Vi ǰomoxun c'erit'oğoy bes bakalt'oğone bezi pula haq'es bakon.
162 Hetər ki, sa put q'ızıl bə̌ğə̌bi amdare mǔqbaksa,
Hat'etəre mǔqst'a za Vi əyitmoğon.
163 Nifrətezbsa zu əfçinə, irit'ezne şot'oxun,
Vi k'anunxone bezi çureğalo.
164 Ğine vǔğ kərəm Vi s'iyaz alabsa zu Vi düzgün q'ərarxo görə.
165 Şaat' ğit'un aksa Vi k'anunen tağalt'oğon,
Tur ǰěna tene laft'on şot'oğoy.
166 Vi za çark'est'unane bezi umud, ay Q'ončux,
Vi bito buyruğxo əməlezbsa zu.
167 Sırığanez bi zu bez ǔmǔğǒ Vi bürüşit'oğo,
Bezi ük'ene bask'e şorox bito.
168 Vi tadi ögüd-nəsyətxonez taysa zu,
Vi bürüşit'oğo bitova əməlezbsa,
Anksa Hun bezi mani yaq'en taysuna.
169 İbaka bezi Va k'alpi xoyinšpsuna, ay Q'ončux,
Çurpa Vi tadi əyiti loxol, za q'amişaksun tada.
170 Barta Vi ǔmǔğo p'ap'eq'an bezi xoyinši səs,
Çurpa Vi tadi əyiti loxol, çark'est'a za.
171 Tərif barale bez ǰomoxun Vaynak',
Vi laxi q'aydoğo za zombalonu Hun.
172 Vi əyitmoğo bez muzel eçeri mə̌ğk'oz zu,
Düzgünluği k'ə baksuna ak'est'ala buyruğxone Vi buyruğxo.
173 Barta Vi kul bez loxolq'an baki,
Vi tadi ögüd-nəsyətxonez taysa zu.
174 Cicirxone ç̌ane bezi Vi tades bakala çark'esuneynak', ay Q'ončux,
Vi k'anunxo əməlbsunast'az aksa bez mǔqluğa zu.
175 Efa za, barta dirist' mandi Vi s'iya alabes bakaz,
Barta Vi düzgün q'ərarxonq'an za yaq' ak'est'i.
176 Sürünəxun təkləyinşaki, iz yaq'a aç̌esp'i eğel k'inək'zu zu,
Bə̌ğə̌ba me Vi k'ula , Vi buyruğxo eyexun tene c'evk'e şot'in.