116
116-ci Ǐvel mə̌ğ
Zu Q'ončuğo çurezsa,
Şot'aynak' ki, Şot'in bezi səsə, bezi xoyinša inebaki.
Za t'arnu tene barti Şot'in,
Şot'o görəl heq'ədər ki dirist'zu, Şot'o k'alpi xoyinšp'oz zu.
 
Sa tur gərəmzoğoney bezi,
T'e dünyənəz ak'i hari zu.
Dərde q'a koruği k'ə baksunaz q'amişaki!
T'e vədə "Q'ončuğoz k'alpi xoyinšp'i zu,
"Ay Q'ončux, çark'est'a za!" pizu.
 
Goroxeğale Q'ončux, düzgüne,
Ük' bok'al beş Buxačux.
İçoğoy ük'e pisluğ nu bakalt'oğo q'orişalone Q'ončux,
Zu elmoğoxun bitala vədine çark'est'iyone Şo za.
Ay bezi ük', arxayin baka,
Běğa, Q'ončuğon vaxun İz şaat'luğa kamtenebsa.
 
Ay Q'ončux, za bisunaxun çark'est'iyonu Hun,
Bez piin neğ nu barst'una,
Bez tur ǰěna nu lafst'una çureśiyonu.
İsə mone, me işiğlu dünyənezu zu, ay Q'ončux,
Barta bez tağala yaq' Vi piyes şaat'q'an ak'eśi.
 
10 Za dərden haq'at'an
Bez věluğa tez aç̌esp'ey zu.
11 Çarasuz mandiz metər pey:
«Amdarxo bito əfçiduğale».
 
12 Hetərez qaydes bakon zu
Q'ončuğon zaynak' bi şaat'luği əvəzə?
13 Bez çark'esuna şükürboz zu,
Mot'o Q'ončuğoynak' pay eşt'unen ak'est'oz,
İz s'iya duği tərifləyinşoz.
14 Dirist' azuk'en ak'ale
Bezi Şot'o tadi əyitmoğoy bex p'ap'espsuna.
 
15 Muč'ane Q'ončuğoynak' İz laxi yaq'en tağalt'oğoy elmux,
Şot'oğoy saycət'ay bisuna çurteneğon.
16 Ay Q'ončux, həgigiyal Vi k'ulzu zu,
Bez nanal Vi k'ule.
Hunen çark'est'i za bez kul-tura ğaç̌p'i zincirxoxun.
17 Va şükürbi q'urbanxo eçoz Vaynak' zu,
Vi s'iya duği tərifləyinşoz, ay Q'ončux.
18-19 Dirist' azuk'en ak'ale Yerusalimi bı̌yex, Q'ončuğoyxrame məəlne
Bezi Va elasp'i tadi əyitmoğoy bex p'ap'espsuna.
 
"Q'ončuğo halalq'an baki" * upanan!
* 116:18-19 - Miya əbrani muzin "Alleluya" əyite bu, mo Halal + Yah əyitəxune eysa, yəni halalq'an baki Yahvena.