115
115-ci Ǐvel mə̌ğ
1 Beşi s'iya təə, ay Q'ončux, beşi s'iya təə, Vi s'iya alaba!
Ak'est'a Vi ük' bok'ospsuni q'a Vi nu badalbakala çuresuni k'ə baksuna!
2 Barta q'erəz millətxon
"Maya p'oy mot'oğoy Buxačux?" pes maq'at'un baki.
3 Göynule beş Buxačux,
Bito İz kiin oq'ane!
4 İsə běğanan şot'oğon şut'un bul k'os'bsa:
İçoğoy kiin düzbi binik' buxačuxxo,
Q'ızılen, gümüşen düześi binik'xo!
5 Mone, ǰomo bune, ama əyittet'unne,
Pulmux bune, ama atet'unksa.
6 Ǔmǔxxo bune, ama tet'un ibaksa,
Bǒxmǒğ bune, ama ad tet'un ava.
7 Kulmux bune, ama histet'unbsa,
Turmux bune, ama taratet'unne,
Muz bune, ama muzen əyit tene biq'sa.
8 Barta mot'oğo düzbalt'oğoy q'a
Mot'oğo umudbakalt'oğoy axıral hametərq'an baki.
9 Ay israilluyox, Q'ončuğo umudbakanan,
Şone yax q'orişi yax kul boxodalo!
10 Ay Aaroni nəsil, Q'ončuğo umudbaka,
Şone yax q'orişi yax kul boxodalo!
11 Ay Q'ončuğoy laxi yaq'en tağalorox, Q'ončuğo umudbakanan,
Şone yax q'orişi yax kul boxodalo!
12 Q'ončuğoy pul beş loxole:
Yax xeyir-bərəkət tadale Şot'in,
İsrailaxun bakit'oğoxun,
Aaroni nəsiləxun İz xeyir-bərəkətə kamtenebal Şot'in.
13 Mis'ik't'uxun burqi kalat'uval śirik',
İçu çalxalt'oğoy bitova barabar xeyir-bərəkət tadale Şot'in.
14 Barta Q'ončuğon efi saya gelebeq'an,
Barta efiyal, efi əyloğoyal nəsil avuzbakeq'an.
15 Barta göyə q'a oç̌ala yaratmişi Q'ončuğonq'an
Və̌x xeyir-bərəkət tadi.
16 Q'ončuğoy ga ala, göynule,
Oç̌ala isə Şot'in amdarxone tapşurbe.
17 P'urit'oğon təə,
Oç̌alin oq'a bask'it'oğon təə,
18 Yanyan alabsa Q'ončuğoy s'iya!
Həysəəl, meyin oşa həmişəəl!
Q'ončuğo halalq'an baki!