2
Müdrikluği xeyir
1 Bez ğar, əgər hun bezi əyitmoğo q'abulbi
Bezi əmirxo vi ük'e efayin,
2 Müdrikluğa ǔmǔxlaxi,
Maslaat haq'sunal üst'ün biq'ayin,
3 Hun, həgigiyal, haq'ıla qə̌věśi,
Ost'aar səsen q'amişaksuna k'alk'ayin,
4 Şot'oğo gümüş k'inək',
C'ap' xəzinə k'inək' çureğayin,
5 T'e vədə hun Q'ončuğoy şu baksuna q'amişakalnu,
Buxačuğo çalxalnu.
6 Şot'aynak' ki, Q'ončuğone müdrikluğ tast'a,
Şot'ay ǰomoxun c'eğala əyitmoğon avabaksun q'a q'amişaksune eşt'a.
7 Şot'in düzgünt'oğo q'ələbəne q'azayinşest'a,
Şot'in ük' təmizt'oğo q'orişebsa.
8 Şot'in düzgünt'oğo enefsa,
İçu ğaç̌ bakalt'oğoy yaq'a q'orişebsa.
9 Kot'o görə za ǔmǔxlaxa,
T'e vədə düzluği, haq'q'e saal insafi k'ə baksuna q'amişakalnu,
Bütüm şaat' yaq'urxo çalxalnu.
10 Müdrikluğ vi ük'e bağale,
Avabaksunenal vaynak' irəətluğ eçale.
11 Ə̌xilaksunen va q'orişale,
Q'amişaksunenal va efale.
12 Müdrikluğen va pis amdarxoy yaq'axun,
Əfçi əyitk'alxoxun çark'est'ale.
13 Şot'oğon bayinq' yaq'moğo fırıpseynak'
Düz yaq'moğo bot'unst'a,
14 Şər əşurxo biq'at'an mǔqt'unbaksa,
Xayinluğaxun şot'oğoy xoşele eysa.
15 Me amdarxoy yaq'mux k'orine,
Şorox azmişaket'un.
16 Müdrikluğen va q'ert'ay çuğoxun,
Tarak'ala çuğoy muč'a muzaxun çark'esedon.
17 Me çuğon iz cəyil vədine taśi işq'ara bosi,
Buxačuğoxun ğaç̌eśi irəziluğa eyexun c'evk'ene.
18 Şot'ay k'oya baysuni axır bisune,
İz yaq'urxon gərəmzoğone taşt'a.
19 İz t'ǒğǒl tağalo qoş tene qaybaksa,
Ene yəşəyinşi yaq'a tene p'ap'sa.
20 Metərluğen, şaat't'oğoy yaq'en taki,
Düzgünt'oğoy yaq'a baka.
21 Şot'aynak' ki, düzgün amdarxo me ölkinə yəşəyinşalt'un,
Ük' təmizorox memiya mandalt'un.
22 Pis amdarxo isə me ölkinəxun boseğale,
Xəyanət'kərxoy tum memiin əfçibakale.