Mat'feyen
śampi Mǔq Xavar
Běšin əyit
Mat'feyen śampi Mǔq Xavar girkəst'a İsus Xrist'osi əyit tadeśi Çark'est'al baksuni baradane exlətesa. Memiya Mat'feyen Şot'ay eysunen Buxačuğoy Bisi İrəziluğast'a İz azuk'a tadi əyitmoğoy bex p'ap'sunane ak'est'un çuresa. Me Mǔq Xavar saycə İsus içoğoy boşt'an c'eri əbrani azuk'eynak' tene, bito amdarxoynak'e.
Girk İsusi nanaxun baksunaxun, k'unuk' baksunaxun saal sinəyinşaksunaxune burqesa. Oşa Mat'feyen İsusi karoozbsuni, zombsuni saal Galileyina amdarxo q'olaybsuni baradane exlətpsa. Mat'feyen śampi Mǔq Xavar İsusi Galileyinaxun Yerusalima taysunen, Şot'ay yəşəyinşi axırınci şamat'ast'a baki hadisoğon, xaçe loxol t'ə̌q't'esunen saal běyinbaksunene çarksa.
Mat'feyen śampi Mǔq Xavar girken İsusa k'anunxo q'andırişbsuna saal Buxačuğoy padçağluği barada zombsuna ext'iyər bakala kala sa məəlim k'inək'e ak'est'a. Me girke boş və̌n İsusi amdarxo həmişəluğ yəşəyinş tades bakala t'e əyitmoğo kalp'es bakalnan.
Girke boş bakalorox:
1:1-2:23 İsusi əsil saal nanaxun baksun
3:1-12 K'unuk'bal İoani İsuseynak' yaq' həzirbsun
3:13-17 İsusi k'unuk' baksun
4:1-11 Şeytani İsusa sinəyinşbsun
4:12-18:35 İsusi Galileyina amdarxoynak' bi q'ulluğ
19:1-20:34 Galileyinaxun Yerusalima eysun
21:1-27:66 İsusi Yerusalima baki axırınci ğimxo
28:1-20 İsusi běyinbaksun
1
İsus Xrist'osi əsil
(Luk'. 3:23-38)
1 Avrahami nəsiləxun bakala, Davidi Ğar İsus Xrist'osi bavoox-kalboox moroxe bake:
2 Avrahamaxun İsaak'e bake. İsaak'axun İak'ove bake. İak'ovaxun İuda q'a iz viçimuxe bake.
3 İudaxun Tamaren eçeri P'eres q'a Zerahe bake. P'eresaxun Xesrone bake. Xesronaxun Rame bake.
4 Ramaxun Amminadave bake. Amminadavaxun Naxşone bake. Naxşonaxun Salmone bake.
5 Salmonaxun Raxaven eçeri Boaze bake. Boazaxun Rut'en eçeri Ovede bake. Ovedaxun Yesseye bake.
6 Yesseyaxun David padçağe bake.
Davidaxun Solomone bake. Solomoni nana süft'ə Uriyay çuuxe bakey.
7 Solomonaxun Rexavame bake. Rexavamaxun Aviyane bake. Aviyaxun Asane bake.
8 Asanaxun Yehoşafat'e bake. Yehoşafat'axun Yehorame bake. Yehoramaxun Uzziyane bake.
9 Uzziyaxun Yot'ame bake. Yot'amaxun Axaze bake. Axazaxun Xizgiyane bake.
10 Xizgiyaxun Menaşşene bake. Menaşşenaxun Amone bake. Amonaxun Yoşiyane bake.
11 Vavilona sürgünə bakala vədinest'a Yoşiyaxun Yek'onya q'a iz viçimuxe bake.
12 Vaviloni sürgünəxun oşa Yek'onyaxun Şealt'iele bake. Şealt'ielaxun Zerubbabile bake.
13 Zerubbabilaxun Avihune bake. Avihunaxun Elyak'ime bake. Elyak'imaxun Azure bake.
14 Azuraxun Sadok'e bake. Sadok'axun Yaxime bake. Yaximaxun Yelihude bake.
15 Yelihudaxun Eleazare bake. Eleazaraxun Mat't'ane bake. Mat't'anaxun İak'ove bake.
16 İak'ovaxun Mariyay işq'ar İosife bake. Mariyaxunal Xrist'os k'aleğala İsuse bake.
17 Metərluğen, Avrahamaxun burqi hari David nanaxun bakamin bip'es's'e nəsil, Davidaxun burqi hari Vavilona sürgün baksunal śirik' bip'es's'e nəsil, Vavilona sürgün baksunaxun mağay, hari Xrist'os nanaxun bakaminal bip'es's'e nəsile badalbake.
İsus Xrist'osi nanaxun baksun
(Luk'. 2:1-7)
18 İsus Xrist'osi nanaxun baksun metəre baki. İsusi Nana Mariya İosifaxun nišanluney. Ama şorox hələ işq'ar-çuux bakamin Mariyay Ǐvel Urufi tərəfəxun bǐhi baksune ç̌oyel c'eri.
19 Mariyay nišanlu İosif düzgün amdarey, şot'ay biyaburbaksuna tene çuresay, şot'o görəl exlət taśi amdarxoy ǰomo baft'amin c'əp'k'incə şot'oxun iz nišana qayst'une çureśi.
20 Ama me fikirə harit'uxun oşa, mone, içu nep'e boş Q'ončuğoy sa angel ak'eśi pine: «Davidi ğar İosif! Mariya vaynak' çuux haq'sunaxun ma q'ǐba, şot'o görə ki, şot'ost'a bakala əyel Ǐvel Urufaxune.
21 Mariyan sa ğar eçale, Şot'ay s'iya İsus laxa, şot'aynak' ki, Şot'in İz azuk'a içoğoy günaxxoxun çark'est'ale».
22 Morox bito Q'ončuğonxavareçala pest'i me əyit bex p'ap'seynak'e baki:
23 «Mone, kul nu laft'i sa xuyər bǐhi baki Ğar eçale, İz s'iya Emmanuel laxalt'un».
24 İosif nep'axun muğurbakit'uxun oşa Q'ončuğoy angelen içu bürüşi k'inək'əl bine, Mariya haq'i içeynak' çuuxe bi.
25 Ama əyel nanaxun bakamin İosifen şot'oxun ı̌šaluğ tene bi. Nanaxun baki körpəy s'iyal İsuse laxi.