2
Hametər, Buxačuğon göyə q'a göynul bakalt'oğo, oç̌ala q'a oç̌ali ç̌oyel bakalt'oğo bitova yaratmişi çarek'i. Buxačuğon me ǔq ğinast'a İz biq'ala əşurxo bitova çark'i vǔğǔmci ğine isə İçu əşlə tene duği. * Buxačuğon vǔğǔmci ğina xeyir-bərəkət tadi şot'o t'iyə̌mi ğimxoxun üst'üne laxi, şot'o görə ki, t'e ği İzi me yaratmişbsuni əşurxo çark'i dincəyinşakala ğine baki.
Q'ončux Buxačuğon göyə q'a oç̌ala yaratmişbsun metəre bakey.
Adam q'a Yeva Eden uk'ala ganu
Q'ončux Buxačuğon göyə q'a oç̌ala yaratmişat'an oç̌ali ç̌oyel nə sa dənə xod uk'ala şey tene buy, nəəl sa dənə göyün o, şot'o görə ki, Q'ončux Buxačuğon oç̌ali loxol hələ ağala tene śipey. Oç̌ala bəcərişes bakala amdaral tene yaratmişey hələ. Saycə oq'axun c'eğala xene lafst'ay oç̌ala.
Q'ončux Buxačuğonal eçeri k'ulaxun amdare düzbi. Şot'ay bǒxmǒğoxun fupi İzi elmux tadala nəfəsəne bapi şot'ay boş, amdaral diriləyinşebaki. §
Oşa Q'ončux Buxačuğon běğc'eğala tərəf bakala Edena sa gane lasaki, eçeriyal İzi yaratmişi amdara t'iya arśevek'i. Q'ončux Buxačuğon t'etəre bi ki, t'e ganu cürbəcür xodure c'eri: ham içoğoy loxol běğat'an ük' qayeğala, hamal içoğoy c'ek'ala meyvoğo çuki ukes bakala. Gane bı̌yex isə yəşəyinş tadala xode buy saal şaat'-pis k'ə baksuna avabakest'ala xod. *
10 Me Eden uk'ala ganuxun oqe taysay, me oç̌ala xe duğsun c'ovaki taśiyal bip' galane cöybaksay. 11 Me cöybaki tağala oqe sunt'ay s'i Pişone, manu ki, dirist' Xavila bölginəxune c'ovaki taysa. Miya hələ q'ızılal baneksa, 12 içal şaat' q'ızıle miyanin q'ızıl. Me bölginə xodurxoxun c'eğala şaat' adeğala mətəl baneksa, oniks uk'ala toyexlu ǰěyal. 13 P'ə̌mci oqe s'i Gixone. Şo K'uş bölginəxune c'ovaki taysa. 14 Xibimci oq T'igre, şo Aşşur uk'ala şəhəri běğc'eğala tərəfəxune c'ovaki taysa. Bip'imciyo isə Yevfrat uk'ala oqe.
15 Q'ončux Buxačuğon amdara me Eden ganu arśeveki ki, şot'o əşp'i běğeq'an. 16 Q'ončux Buxačuğon amdara metəre tapşurbi: «Ganu bakala bito xodurxoy meyvinəxun çuki ukes bankon, 17 saycə şaat'a q'a pisa avabakest'ala xodin meyvinəxun başq'a. T'e xodin meyvinəxun çuki uksunen bisun eçale».
18 Oşa Q'ončux Buxačuğon metəre pi: «Amdari savsa baksun şaat' tene, barta şot'aynak' içuxun biq'ala soğo yaratmişaz, iz kula alabeq'an». 19 Q'ončux Buxačuğonal eçeri oç̌ali k'ulaxun bito ə̌qnə heyvanxo q'a göynul purk'ala q'uşurxone yaratmişi. Oşa şot'oğo amdari t'ǒğǒle eçeri ki, běyn şot'oğo hetər s'iya tast'a, amdarenal şot'oğo hetər s'i tanedisa, şorox hat'etərəl k'aleśi. 20 Hametər, amdaren k'ojin heyvanxoy, göynul purk'ala q'uşurxoy saal ə̌qnə heyvanxoy bitot'u s'ine tadi, ama me heyvanxoy boşt'an içuxun biq'ala, iz kula alabes bakala köməyçi tene bə̌ğə̌yeśi.
21 T'e vədə Q'ončux Buxačuğon t'etəre bi ki, amdara bə̌ğə̌loy nep'ene taşeri, nep'ax vədineyal şot'ay t'ok'mašin sunt'u c'evk'i iz ganu yeq'en but'ek'i. 22 Q'ončux Buxačuğon me t'ok'mašinaxun çuux düzbi şot'o amdari t'ǒğǒle eçeri. 23 Amdarenal pine:
«İsə pes bazkon ki,
İz ǔq'en bez ǔq'enaxun,
İz yeq' bez yeq'axun bakalt'u bə̌ğə̌zbi.
Barta ko çuuxq'an k'aleśi,
Şot'o görə ki, işq'araxune haq'eśe».
24 Mot'o görəne oşa işq'ar iz bava-nanaxun cöybaki iz çuğo ğaç̌eśi, p'ǒğǒ sa bədən baki. §
25 Adamal, * iz t'ǒğǒl bakala çuuxal çuplaxt'un taraney, ama içoğost'a ot' buteney.
* 2:2 Əbr. 4:4,10 2:3 C'eys. 20:11 2:7 Əbrani muzin "adam" yəni "amdar" əyit "k'ul" əyitəne oşq'ar. Əbrani muzin k'ula "adamat'un" nex. § 2:7 1 K'or. 15:45 * 2:9 Burq. 3:22; Qay. əyit 2:7; 22:2,14 2:17 - Miya bakala "bisun" əyit hamal "Buxačuğoxun ə̌xil bist'un" upsune. 2:23 Əbrani muzin "işq'ar" saal "çuux" əyitmux suna oşq'are, şot'o görəne metər nex. T'e muzin "iş" işq'ar, "işşa" isə çuux upsune. § 2:24 Mat'. 19:4-5; Mrk'. 10:7-8; 1 K'or. 6:16; Ef. 5:31 * 2:25 Adam - Miya samci kərəme ki, əbrani muzin "amdar", yəni "adam" əyit, sa s'i k'inək'e əşesa.