Burqesun
Běšin əyit
Bibliin ç̌oya qayk'at'an süft'ə "Burqesune" eysa. Me girk Moiseyen śampi samci girke, insani tarixast'al ən damna girkurxoxun soğone. Bibliin boş me girkəxun oşa eğala bip' girkəl Moiseyene śampe, "Burqesun" girkəl izi boş me qo girkə sagala "Taurat"t'un nex.
İzi s'iyaxunal ak'esa ki, girke boş hər şeyi hetər burqesunaxune exlət taysa: Buxačuğon göyə q'a oç̌ala yaratmişbsunaxun, oç̌ali loxol bitk'iyox, heyvanxo saal amdar yaratmişbsunaxun, İzi yaratmişi samci amdarxoy günax əşp'est'unaxun, metərluğenal Buxačuğon noxsansuz yaratmişi me dünyəne bisun uk'ala cazin eysunaxun.
Adam q'a Yevan günax əşp'est'it'uxun oşa Buxačuğoxun içoğoy arane duğeśi, Buxačuğonal şot'oğo İzi arśest'i t'e gözəl ganuxun, Edenaxun şəp'eśi. Ama Buxačuğon p'urumal amdarxo çark'est'un çureśi şot'oğoynak' Çark'est'al yaq'absunane əyit tadi, me Çark'est'alen bito amdarxoy günaxxo os'k'i taşaley, şot'oğoynak' həmişəluğ yəşəyinş q'azayinşest'aley (3:15).
Düze, oşa amdarxo t'eq'ədərt'un içoğoy əşp'est'ala günaxxoy boş batk'i ki, Buxačuğoy əcuğon biq'i İzi yaratmişi k'ə bunesa bitova əfçibsune çureśi. Ama p'urumal İzi ük'en tene bi... Şot'in Noya q'a Noye külfətə çark'est'i, oşal şot'oğoxun irəziluğe ğaç̌eśi ki, ene sal sa vədə oç̌ali ç̌oyel bakalt'oğo əfçitenebal.
Girke 12-ci bulaxun oşa Avrahamaxun q'a Avrahamaxun törəyinşakitoğoxune exlət taysa. Buxačuğon Avrahama c'ək'p'i şot'o əyite tast'a ki, şot'oxun kala sa azuk' əmələ eğale, "Kənan oç̌al" uk'ala gaal p'ə̌bulla şot'oğoy bakale. Buxačuğon hələ Adama q'a Yeva əyit tadi Çark'est'alal hame Avrahamaxun əmələ hari azuk'i boşt'an c'eğaley.
Girkə dirist' k'alpit'uxun oşa ayanksa ki, Buxačuğon pit'oğoy q'a əyit tadit'oğoy sayco t'ağay-mağay bateneksa. Beşi "bakes tene bakon" nəəl "metər bayiz, metər bakale" upsunen tene, Buxačuğon hetər laxenesa, İzi ǰomoxun hetər c'erenesa hat'etərəl bakale.
Girke boş bakalorox:
1:1-2:25 Buxačuğon dünyənə q'a amdara yaratmişbsun
3:1-24 Adam q'a Yevay günax əşp'est'un
4:1-5:32 Adamaxun burqi Noyal śirik' bakiyorox
6:1-10:32 Buxačuğoy Noya c'ək'psun q'a oç̌ala xenen ç̌axpsun
11:1-9 Vaviloni k'üllə
11:10-32 Şemaxun burqi Avramal śirik' bakiyorox
12:1-35:29 Avraham, İsaak' saal İak'ov
36:1-43 Esavaxun törəyinşakiyorox
37:1-45:28 İosif q'a izi viçimux
46:1-50:26 İak'ovi q'a içuxun törəyinşakit'oğoy Misirə köçp'i taśit'uxun oşa bakiyorox saal İosifi bisun
1
Dünyəni yaranmişaksun
1 Burqesunast'a Buxačuğon süft'ə göyə q'a oç̌alane yaratmişi.
2 Dünyə ams'inaxunal ams'iney. Oç̌ali ç̌oyel bakala bə̌ğə̌loy xeyurxoy loxolal bayinq'luğaxun q'erəz hik'k'al buteney, saycə Buxačuğoy nəfəse hari taysay t'e xeyurxoy loxol.
3 Buxačuğon pine: «Barta işiğq'an baki». İşiğal baneki.
4 Buxačuğon anek'i ki, işiğ şaat' şeye, eçeriyal şot'o bayinq'luğaxun cöyebi.
5 Şot'in işiği s'iya "ğenaxun", bayinq'luği s'iya isə "üşene" laxi. Biyənebaki, oşa saal işiğe biti - mo samci ği.
6 Oşa Buxačuğon pine: «Barta xene qı̌yo alaq'an laśi, me p'ə̌ xeyurxo sunaxun cöybseynak'al içoğoy arane zahmanq'an baki».
7 Haketərəl baneki, Buxačuğon havinaxun bakala sa zahman yaratmişi xeyurxoy qǐt'u me zahmanaxun ala, qǐt'uval oq'ane efi.
8 Buxačuğon me zahmani s'iya "göye" laxi. Biyənebaki, oşa saal işiğe biti - mo p'ə̌mci ği.
9 Oşa Buxačuğon pine: «Barta göye oq'a bakala xeyurxo sagala gireśeq'an ki, q'ariluğq'an ak'eśi». Haketərəl baneki.
10 Buxačuğon q'ariluği s'iya "oç̌al", gireśi xeyurxoy s'iya isə "dənizxone" laxi. Buxačuğon anek'i ki, mo şaat'e.
11 Oşa Buxačuğon pine: «Barta oç̌ali ç̌oye bitk'iyoxq'an c'eri: iz śil iz loxol bakala oyurxoxun burqi śilurxo iz c'ek'ala meyvin boş bakala hər cür xodurxol śirik'». Haketərəl baneki.
12 Oç̌alen bitk'iyoxe əmələ eçeri: iz śil iz loxol bakala oyurxoxun burqi śilurxo iz c'ek'ala meyvin boş bakala hər cür xodurxol śirik'. Buxačuğonal anek'i ki, mo şaat'e.
13 Biyənebaki, oşa saal işiğe biti - mo xibimci ği.
14 Oşa Buxačuğon pine: «Barta göynul üşe işiğ sakseynak' cöy, ğenaxun işiğ sakseynak' cöy çırağq'an baki, barta şot'oğon useni mi xaşurxo q'a gam xaşurxo, ğimxoy boxoybaksuna q'a gödəybaksuna, useni burqsuna q'a çarksunaq'at'un ak'est'i.
15 Barta şorox göynul bok'ala çirağ baki oç̌ali ç̌oyel işiğq'at'un saki». Haketərəl baneki.
16 Buxačuğon p'ə̌ dənə kala çirağe yaratmişi. Kalat'in ğenaxun c'eri kalaluğbaley, samal mis'ik't'in isə üşe. Şot'in hamal muč'uliğone yaratmişi.
17 Oşa Buxačuğon şot'oğo göynul t'ak'epi ki, oç̌ali ç̌oyel işiğq'at'un saki.
18 Şot'oğonal burt'unqi hərt'in içeynak' laxeśi vədine c'eri şünə ğenaxun, bayinq'luğa işiğaxun cöybsa. Buxačuğonal anek'i ki, mo şaat'e.
19 Biyənebaki, oşa saal işiğe biti - mo bip'imci ği.
20 Oşa Buxačuğon pine: «Barta xeyurxo hari iz boş elmux bakala cürbəcür heyvanxon buybakeq'an, barta oç̌ali ç̌oyelxun ala, göynul q'uşurxoq'an purpi».
21 Buxačuğonal kakala çəliyox q'a xene boş ǰalk'ala hər cür heyvanxone yaratmişi, göynul purpes bakala hər cür q'uşurxoval yaratmişebi. Buxačuğon anek'i ki, mo şaat'e.
22 Oşa şot'oğo xeyir-bərəkət tadi pine: «Avuzbakanan, gelebaki dənizi xeyurxo buybanan, barta q'uşurxoval gelebakeq'an».
23 Biyənebaki, oşa saal işiğe biti - mo qomci ği.
24 Oşa Buxačuğon pine: «Barta oç̌ali ç̌oyel hər cür heyvanq'an baki: beliğoxun q'a eğelxoxun burqi xoreğala heyvanxoxun q'a çöle bakala hər cür ə̌qnə heyvanxol śirik'». Haketərəl baneki.
25 Buxačuğon hər cür ə̌qnə heyvan, beliyox q'a eğelxo saal oç̌ali ç̌oyel xoreğala cürbəcür heyvanxone yaratmişi. Buxačuğonal anek'i ki, mo şaat'e.
26 Oşa Buxačuğon pine: «Yallarik' saal yax oşq'ardala amdar yaratmişen. Barta şot'in dənizi boş bakala çəliğoy, göynul purk'ala q'uşurxoy, oç̌ali ç̌oyel tarak'ala q'a xoreğala bito heyvanxoy saal oç̌ali iziyal loxol kalaluğq'anbi».
27 Metərluğen, Buxačuğon amdare yaratmişi, şot'o İçu oşq'are yaratmişi. Buxačuğon ham çuux, ham işq'are yaratmişi.
28 Buxačuğon şot'oğo xeyir-bərəkət tadi pine: «Avuzbakanan, gelebaki oç̌ali ç̌oya buybanan. Dənizi boş bakala çəliğoy, göynul purk'ala q'uşurxoy, oç̌ali ç̌oyel tarak'ala q'a xoreğala bito heyvanxoy q'a oç̌ali iziyal loxol kalaluğbanan».
29 Oşa Buxačuğon pine: «Mone, oç̌ali ç̌oyel iz śil iz loxol bakala bito oyurxoxun q'a śilurxo iz c'ek'ala meyvin boş bakala bito xodurxoxun çuki ukalnan və̌n.
30 İz boş nəfəs taśi eğala heyvanxoy bitot'in isə, göynul purk'ala q'uşurxon, oç̌ali ç̌oyel tarak'ala q'a xoreğala k'ə heyvan bunesa bitot'in, göyün oyaxun ukale». Haketərəl baneki.
31 Buxačuğonal anek'i ki, İz yaratmişi hər şey gele şaat'e. Biyənebaki, oşa saal işiğe biti - mo ǔqǔmci ği.