4
Maluo mama mpya
Ankoho, Mufulu a Ngili li mu olyele mu mpere ti mu matala mama masini, ndaama a baara sa batsili kana li bo mu onama mifulu mimi mpya ya maluo ma maakafa kundaa mifulu mi mibi, mu bumpibi bubu embili-a-mbili ki banga a mpya ba bási elyimi mu bitsimi bi bo mu esyeẽ ki ebie mu mbaa. Bo baakalighi baara okie ya baakagwa bo mangili maala banyaã okadza bilogho bibike, ankoho Nzaami ágyighili bye mu kuulu ba baakasa kana bakadza bye mu okabvurulu matuono bu basoolo engaŋma. Mu kuulu byehene bi ógyighili Nzaami bili bi bibwe, ya ka oli a si emõ ki baatsili o, lo bafaana odza kye mu okabvurulu matuono, mu kuulu mu ndagha Nzaami ya mu lisamana baakasa ti bye byehene bikala bibi ngili.
Nzaami li mubvwuhu a baara bwohono
Kala ti we luo mandagha mwohono ma kundaa bandughu mu kana, we sa kala musala a Yiisu-Kriste wu mubwe, wu baakabuŋunu mu mandagha mama kana ya mu maluo ma mabwe ma aakanama we matala mwohono. Lo we bihi masaba ma magwene a mupfunu maala ka mali mama kana o, masaba ma biŋmini bi bakaha.
Lo we sa mpini mu okala a enzaami ki ebwe. Mu kuulu bimpa bi biikagwa nyuru mpini ka bili a ndaana yi alagha o. Lo enzaami eli a mupfunu mu myehene: Kye eli a misiini mimi laama lili lolo ya lili bitsughu bi biigya. Ndagha yi yili yi a ngaŋma ya yiili baara bwohono bakughu okihi yo: 10 Kala ti bihi-a-be lili mu okamono mpara ya lili mu okadzwana mvulu, mu kuulu bihi-a-be liisi emiini mu Nzaami wu a mweẽ, wu li mubvwuhu a baara bwohono, ya bvulu-bvulu banga-a-kana.
11 Mamo mandagha ma faana otumu ya oluo we baara.
Efaana kundaa banga-a-kana
12 Mbwuru anyaã otsaala bufulu bu we! Lo we kala efaana kundaa banga-a-kana mu mbiili, mu nzya-nzyara, mu dzyi, mu kana ya mu mukolo wu a tse-tse.
13 Tee mu matala ma akala aangya me, sa makpa mu okantaã Bisono bibi ngili ŋa nkulu a baara bwohono, mu okagwa babake mpama ya mu okaluo. 14 Ka meŋene ekaba kii bwehe bu Nzaami ki eli mu we o, ekaba ki bágwi we mu nzili a libighi ya ŋa ónaã we emvuŋunu ki bakwuru ba libwunu myaã ŋa yulu a mutswi. 15 Sa mandagha mamo mu mukolo mumõ, gwa nyuru a we yohono mu esala ki mpaala okulu o we omoŋono ŋa mihi mi baara bwohono. 16 Kahala mihi mu nyuru a weme ya mu maluo ma we. Sa mukama munsa mandagha mamo. Mu kuulu, we bu si obo, we weme sa bvwuhu ya baara ba baagyughu wehe si sa babvwughu.