3
Bambiri ba libwunu li Nzaami
1 Ndagha yi yili yi a ngaŋma: Kala ti mbwuru dzyi okala mumbiri a libwunu li Nzaami, ekye esala ki ebwe nde adzyi.
2 Me mu obo, mumbiri a libwunu li Nzaami faana okala mbwuru wuulu ka baabagha ndagha yi baasyeme nde o, mulumu a mukaha yini a mutsyini, wu li a nzya-nzyara yi a faana ya yi a budziri, akala mbwuru wu aakuru nyuru ya wu li a nzya-nzyara yi mbwe, akala mbwuru wu akabwana a banzyi, mbwuru wu kughu oluo.
3 Anyaã okala enkolo-mala, anyaã okala a nzuŋu, lo akala mbwuru wu aakasa kuulu ti baara bakala mu eyiẽ, mbwuru wu aakasa ti baara bakala mu edzuunu ya wu gwene a ntono a nzi.
4 Nde faana otumu nzo a ndeme bubwe ya baana ba nde bafaana okala mu litumu li nde mu budziri bwohono.
5 Mu kuulu, kala ti mbwuru ka soolo otumu nzo a ndeme o, bunu a bo nde aatumu Libwunu li Nzaami?
6 Nde anyaã okala mbwuru wu munyaghara mu enzaami, mfangolo ligwagha lidzwi nde mihi ya nde somo mu mumfwunu a dyabulu.
7 Ofaana si ti baara ba bali ku mbala a libwunu basuo bumpughulu bu bubwe mu nde, mpaala baara banyaã otsaala nde ya nde anyaã okogholo mu myere mi dyabulu.
Basala ba Nzaami
8 Bumõ si, basala ba Nzaami bafaana okala baara baba budziri ya banga a engaŋma. Banyaã okala binkolo-mala ya okadzyi busini bu baakabagha mu manzili ma mabi.
9 Bo bafaana okakebe mu bitsimi bibi tse-tse mansweghe ma kana ma ósuo Nzaami.
10 Nsomo, bafaana oluhu bo mu bigyeele ya ŋa nseele, kala ti ka babagha ndagha yi baasyeme bo o, bo bakughu osala esala e Nzaami.
11 Bakaha si bafaana okala baba budziri, ba bagwene a makuhu, ba bali a nzya-nzyara yi faana ya yi a budziri. Bo bafaana okala baara baala mu nswe ndagha bakughu osa kana mu bo.
12 Musala a Nzaami faana okala a mukala yini a mutsyini, ya nde faana okatumu baana ya nzo a nde bubwe.
13 Mu kuulu, baara ba baakasala esala e Nzaami bubwe, sa bagwa bo budziri ya bo sa bakala a emiini ki elagha mu kana li lili mu Yiisu-Kriste.
Mansweghe ma mpaana a enzaami
14 Me nsono we mandagha ma mu emiini kiili ti edzi-dzighi me sa ngyamono we.
15 Lo kala ti me ka mbaangya o, we sa soolo bunu a bo we aadzyara munsa nzo a Nzaami, yili Libwunu li Nzaami wu a mweẽ, kwii li linene ya li ookasiŋi engaŋma.
16 Ya oli ngaŋma ti mansweghe ma mpaana a enzaami mali ma manene:
Yiisu-Kriste ámoŋono ti anga mbwuru,
bási nde mbwuru wu bunsumu mu Mufulu a Ngili,
nde ámoŋono kundaa bangye-yulu,
bátsala nsia a nde kundaa bikaana byehene,
baara ba nsie bási kana mu nde,
Bágyene a nde ku yulu munsa nsia.