7
Baara ba bási elyimi e Nzaami
1 Ŋa mbihi oŋo, me áamono bangye-yulu bana ba bátemene mu manto mana ma nsie. Bo bádzarala bifulu bina bi nsie, mu kuulu efulu si emõ enyaã oluru, ngu okala ŋa nsie, ngu okala ŋa yulu a mubu, ngu okala ŋa yulu a muti si mumõ.
2 Ya me áamono ngye-yulu mukimi wu áakapala ku nkolo yi ookapala tala. Nde ákwara enyeme e Nzaami wu a mweẽ. Nde ákehe engubu kundaa bangye-yulu bana ba ágwi nde lileene lili osa nsie ya mubu bubi.
3 Nde ályele ti: Ka lisa nsie bubi o, ngu okala mubu, ngu okala miti, tee mu matala ma lisa bihi elyimi ŋa yulu a mambwi ma basala ba Nzaami a bihi.
4 Ya me áangyughu mutala a baara ba bási elyimi. Bo báli baara mapfwunu nkama ya makwumu mana bana (144 000) ba báfi mu bikaana bi baana ba Isarayele byehene:
5 Mu ekaana e Yuda, mapfwunu kwumu ya muolo (12 000) ma baara ba bási elyimi,
mu ekaana e Rubene, mapfwunu kwumu ya muolo (12 000) ma baara,
mu ekaana e Ngade, mapfwunu kwumu ya muolo (12 000) ma baara.
6 Mu ekaana e Asere, mapfwunu kwumu ya muolo (12 000) ma baara,
mu ekaana e Nefetali, mapfwunu kwumu ya muolo (12 000) ma baara,
mu ekaana e Manase, mapfwunu kwumu ya muolo (12 000) ma baara,
7 mu ekaana e Simeõ, mapfwunu kwumu ya muolo (12 000) ma baara,
mu ekaana e Lebvi, mapfwunu kwumu ya muolo (12 000) ma baara,
mu ekaana e Isakare, mapfwunu kwumu ya muolo (12 000) ma baara,
8 mu ekaana e Dzabulõ, mapfwunu kwumu ya muolo (12 000) ma baara,
mu ekaana e Dzodzefe, mapfwunu kwumu ya muolo (12 000) ma baara,
mu ekaana e Benzamẽ, mapfwunu kwumu ya muolo (12 000) ma baara ba bási elyimi.
Mpwumu a baara yi nene ŋa nkulu a likubu
9 Ŋa mbihi oŋo, me áamono mpwumu a baara yi nene yiili mbwuru si mumõ ka kughu otala o, baara baba mansie mwohono, baba madzumu mwohono, baba bikaana byehene, ya baba mandiŋi mwohono. Bo bátemene ŋa nkulu a likubu ya ŋa nkulu a Mwana a endoomo. Bo bálaha binkuru bi bila bibi peŋeme ya bákwara matswene ma maba ŋa myaã.
10 Bo bákakehe bingubu ti:
Obvwughu oli kundaa Nzaami a bihi wu aabwi-nsini ŋa yulu a likubu ya kundaa Mwana a endoomo!
11 Ya bangye-yulu bwohono ba badzyi likubu mu mutele, bakwuru ya bibuo bibi mweẽ binsa bina, bákunu mabuo ŋa nkulu a likubu, masu mu nsie, bákasamana Nzaami
12 ya bákalyele ti:
Aamene! Nyaã masyighi, nsia, bunsughu, matuono, budziri, lileene ya mpini bikala kundaa Nzaami a bihi mu mibvu ya mibvu! Amene!
13 Mu obo, mumõ mu bakwuru áfwulu me ti: «Baara ba, ba baalaha binkuru bi bila bi bipeŋeme, bana bali? Bo kunu-ako baafi?»
14 Me áamvuhulu nde ti: «Mfumu a me, ngu we soolo!» Nde ályele kundaa me ti:
«Ba me ba baafi ku kimini li lilagha.
Bo baaswagha binkuru bi bo mu makili ma Mwana a endoomo,
me obo binkuru bi bo biipeŋeme.
15 Me mu obo bo bali ŋa nkulu a likubu li Nzaami,
ya bali mu okasamana nde mwiĩ ya mpyibi ŋa ebini e nde kii ngili.
Munde wu aabwi-nsini ŋa yulu a likubu sa akala bo.»
16 Bo ka bafirikala a nzala o, ka bafiribagha nyoro o, ka bafirimono kyaŋana ya mbaa a mwiĩ o.
17 Mu kuulu Mwana a endoomo wu li ŋa kara-a-kara a likubu sa akala munkaala a bo,
ya sa abiri bo ku oli mikele mi madza ma maakagwa laama,
ya Nzaami sa agyala mansaŋa mwohono mu mihi mi bo.