6
Onyana makumu masemene mama nsomo
1 Ya me áamono ŋa ónyana Mwana a endoomo kumu lili nsomo mu makumu nsaama mama mukaana, oŋo me áangyughu ebuo kii mweẽ emo mu bibuo bibi mweẽ bina élyele mu likyi lili ti anga epama ti: Gya!
2 Ensihibi, me áamono syevale wu a peŋeme. Munde wu áabwi-nsini ŋa yulu a nde ákwara kpala, bágwi nde kagha ya nde ágyene wu aalughulu ya mu ofirilughulu.
3 Ŋa ányana nde kumu lili muolo, me áangyughu ebuo kii mweẽ kii byele ki élyele ti: Gya!
4 Oŋo syevale mukimi wu a bie ti anga mbaa áyapala. Bágwi kundaa munde wu áabwi-nsini ŋa yulu a nde lipee li linene ya lileene lili omaha edzuunu ŋa nsie, mu kuulu baara bakatsyiri bana mabolo bo-a-bo.
5 Ŋa ányana nde kumu lili matere, me áangyughu ebuo kii mweẽ kii bitere ki élyele ti: Gya! Me áamono syevale wu a pyini. Munde wu áabwi-nsini ŋa yulu a nde ákwara egyeele mu kwogho e nde.
6 Ya me áangyughu ti anga likyi ŋa kara li bibuo bibi mweẽ bina li lílyele ti: Kilo li farine lili bele mu denali mumõ, bakilo batere baba farine lili orodze mu denali mumõ. Lo we ka byihi maala ya bviini o.
7 Ŋa ónyana Mwana a endoomo kumu lili mana, me áangyughu ebuo kii mweẽ kii bina ki élyele ti: Gya!
8 Ya me áamono syevale wu a laã lili madza ma ngakuo. Nkwumu a mbwuru wu áabwi-nsini ŋa yulu a syevale lilo Lipfu, ya nsie a ba bápki yíkabulunama nde ŋa mbihi. Bágwi bo lileene mu odzwa kaba limõ mu makaba mana ma baara ba nsie mu lipee, mu munzyala, mu byene bibi kughu ogyabiri lipfu ya mu banyama baba musuru ba bali ŋa nsie.
9 Ŋa ádzubulu nde kumu lili mataana, me áamono ŋa nsie a ebini ki baakagwa mikaba, miwumunu mi babo ba bádzwi mu nkooro a ndagha a Nzaami ya mu nkooro a bumpughulu bu básuo bo mu yo.
10 Bo bákehe bingubu ti: Muluo wu-a-ngili ya wu-a-ngaŋma, tee nki matala we aakebe mu olamana ya mu obvurulu etere kundaa baara ba nsie mu makili ma bihi ma baatsala?
11 Bágwi kundaa nswe mbwuru mu bo enkuru ki ela kii peŋeme, ya bályele bo ti bafirikebe mana matala, tee ku ookughu mutala a bambaala ba bo mu esala ya bandughu mu kana ba akala baadzwa ti anga bo.
12 Ŋa ányana nde kumu lili masemene, me áamono munyiĩ a nsie wu munene. Tala lípyini ti anga mupa a eko wu bágyighili mupfu a nyama, ya ngoono ndehene ábie ti anga makili.
13 Baŋomaŋomo baba ku yulu bábwi ŋa nsie ti anga ŋa ookabwa bimburu bi finge bibi munka ŋa ookanyihi efulu ki enene mufinge.
14 Yulu lídzimini ti anga mukaana wu bali mu okadzyi, minguo myehene ya bilyi bámaha bye mu bibini bi bye.
15 Mikogho mi nsie, baara baba budziri, bakwuru ba bambumbulu, bisini ya banga-a-lileene, baara bwohono, bankana ya ba bali bumpoholo, báyisweme kunsa mangala ya kunsa mameẽ ma manene mama minguo.
16 Bo bákalyele kundaa minguo ya kundaa mameẽ ma manene ti: Libwa ŋa yulu a bihi ya lisweghe bihi la ya edzili e munde wu aabwi-nsini ŋa yulu a likubu, ya nkehe a Mwana a endoomo yinyaã obwa mu bihi!
17 Mu kuulu, etsughu ki enene kii nkehe a bo eegyi, ya nande kughu obvwughu?