5
God imi Yesus ulaa dula mitam numi tinum amem miton ko age hetpris kesa uta ko
(Mat 26:39,41, Hib 2:17-3:2, 7:15-28)
1 Kale tinum mitam tinum amem miton ko age hetpris kemin bomi kuguup uyo ki, tam tinum amem bilip iyo tebe ilimi tinum iyo ulaa dulip mitam tinum amem miton ke unang tinum imi sang uyo God iyo aman duga-e-bala dong daga-emin ita kale, bemi ogok uyo ki, unang tinum, deng tebe-bom mufekmufek koyo misiim God imi kobelum o age kulep tal tolip tinum amem beta tebe God imi kuga-e-bom-nala e minte, nuyo fenga-bulup kalaa age mufekmufek kulep tal tolip tinum amem beta tebe ano fuula ken tebe-bom tang kuun-bulu unang tinum imi fengmin uyo God tebe takan ke-e-bom no kemin tinum ita ko.
2 Kale tinum amem miton beyo unang tinum kek kek ilitap ke begal mungkup tii fenga ko-nama kale, kanube tinum iyo maak utamata, boyo fengmin kalaa age-nalata ba kale, maagalo fenga kola umdii, tinum amem miton beyo tebe yuut olsak kupka-eman-temaala ko.
3 Tinum amem miton beyo tii fenga ko-nama kale, beyo mufekmufek fuuli ken tebe-bulu, God iyo tebe fengmin takan ke-emak o agela uyo, unang tinum imi mufekmufek so ilami mufekmufek so uyo fuu God iyo kobela fengmin takan ke-emin ko.
4 Kale ise tinum amem miton ko age hetpris imi ogok uyo, win so ke-nalata, ogok kiim boyo kemin kale, tinum iyo maak ilami aget fugunin uta kup tebe-nalata, ise ogok boyo ku-nalata, win so kem-nuubaala binim kale, God yagal sugayok Moses imi fik Aron imi olabela mitam tinum amem miton ke-se ulutap ke tinum iyo olabelata, ogok boyo ku-nalata kemin ko.
5 Ulutap kale, Krais iyo ilami win uyo kufo-nalata, mitam tinum amem miton kesaala binim kale, God yagal ulaa dulata, ogok boyo ke-boma kale, God iyo bogobe-nala e,
“Kabo nimi man kale, kamano koyo kaalap niyo ulaa kamduli mitam nimi ogok uyo waafuu kwep unon-temap o,”
age-se kale minte,
6 God imi suuk kon tem maak ugol bogo-nulu,
“Kabo tinum amem ke-nalapta, Melkisedek imi tinum amem ke-se ilatap ke-nalapta, suun kup tinum amem imi ogok uyo waafulan-temap o,”
age no kesu ko.
7 Kale siin uyo Yesus imi kafin diim tinum ke-bii-se kota, God iyo fomtuup aman duga-e-bilita, yagal tebe dong dogopne-nalata, kaanan-temi umi ilep boyo tagaa nimkan kelak o age-nalata, fomtuup aman duga-e-bom ame-bom ke-bom-nala e, ilami aget fugunin uyo kupka-nala e, God imi afak tem iinata, kanubela kalaa age-nalata, God iyo imi beten ke-be boyo tinangkusa ko.
8 Kale Yesus beyo God ilami man kuta, kaal fuyap uyo ku yakyak kelata, kaal fuyap bota tebe Yesus iyo kafale-buluta, God imi weng kup tinangkamin umi kuguup uyo utam tigin ke-se kuba.
9 Kale aalap imi aget fugunin, “Bota kanubelal o,” ageba uyo alugum binimanu kupka-nalata, yagal mitam unang tinum imi dong daga-emin miit kayaak ke-se kale, alugum waantap ita ilami weng tinangkamip umdii, yagal tebe bilip iyo dong dogobelata, suun kup suun kup tambaliim nan-temip ko.
10 Kale God iyo ulaa du bogobe-nala e, “Kabo tinum amem miton ko age hetpris ke-nalapta, Melkisedek imi tinum amem miton ke-nala bii-se ilatap kelap o,” age-nalata, bogobe-se ko.
Ipmi aget fugunin yuut utaman-temaalip umi sang uta ko
(Mat 21:32, Jon 10:25-38, 2 Kor 4:4, Hib 3:7-4:13, 10:26-31, 1 Fit 2:8)
11 Kale Melkisedek imi sang uyo kwiin tagang albu kale, nuyo ibo baga-eman agin kuta, ipmi aget fugunin uyo yuut utaman-temaalip kale, nuyo weng bomi magam uyo bong faga-bom-nulupta, kafaleman-temup ko.
12 Kale ipmi mitam dagaa ku kafalemin tinum kelan agin umi taem uyo siin biniman-suu kuta, ipmi aget fugunin uyo duumatan-suu kale, tinum iyo maak tebe-nalata, asok ibo God imi weng magam uyo kafale-balata, utamin o ageta ko. Kale ibo tii iman titil tebesu uyo unanbaalip kale, muuk uta kup unan-bilip ko.
13 Kale nugol utamsup kale, alugum unang tinum muuk uta kup unan-kalip iyo man kangkang ilitap bom-nilipta, utamta, boyo kuguup tambal kalaa, mafak kalaa age utaman-nuubaalip binim kuta,
14 unan-kalin titil tebesu boyo tinum bisel imi kale, ulutap mungkup, unang tinum God imi ilak dolin bilip imi aget fugunin uyo, boyo kuguup tambal kalaa, kuguup mafak kalaa age kupkek kupkek ke-bilip bii, utam tigin kesip ko.