50
Yaaq'ubna ak'
Yusuf dekkılqa k'yorzul geşşe-geşşe mang'us ubbabı ha'a. Mang'vee cune g'ulluxçiy-doxturaaşilqa dekkın mayit mumyelamişe'ecenva əmr haa'a. Doxturaaşed İzrailin mayit mumyelamişa'an. Mana iş doxturaaşe yoq'ts'al (40) yiğna haa'a. Mumyelamişa'as manimena vaxtniyxhe vukkiykanna. Yights'al (70) yiğna misirğançenbı mang'uqa gyaaşe.
Ak'ın yiğbı ç'əveetxhamee, Yusufee fironne insanaaşik'le eyhen:
– Zı vuşde ulen aqqıxheene, fironuk'le eyhe, dekkee zasqa k'ın g'assaras alikkı, uvhuynniy: «Zı qik'asda xhinne vor. Kana'anne ölkee zı zasda mağaree nyaq'v hav'u. Zı maa k'eyxhe». Həşde fironee zı hasrecen, dek k'eyxhı, yı'q'əlqa sak'alas.
Fironee eyhen:
– Dekke nəxdiy vasqa k'ın g'assaras alikkı, həməxürur mana k'eyxhe.
Məxür Yusuf ayk'anna dek k'eyxhas. Yusufuka sacigee fironun delesın insanar, Misirın ağsaqqalar, Yusufneyiy dekkıne xaabın gırgınbı, çocar havayk'an. Manbışe saccu çavra-vəq'əyiy uşaxar Goşen g'alyaa'a. Manbışika sacigee balkanaaşil alepxıynbı, dəv'əys hı'iyne daşk'abışe gyuv'uriynbı yəqqı'lqa qığeebaç'e. Maa qəpqəs-ələpqəs devxhesınmeen insanar vooxhe.
10 Manbı İordan damayne şene sural, Atad eyhene cigeene atteeqa (suk məttaa'an ciga) hipxhıriyng'a, axtıne nıq'ıka gyaaşe giviyğal. Ma'ab Yusufee dekkıs yighılle yiğna ak' hoole. 11 Mane ölkayne insanaaşik'le, Kana'anğançenbışik'le, Atadee hoolena ak' g'avcumee, uvhuyn: «Misirbışiqa xədın geşşuyud». İordan damayne k'anene cigays çil-alla Avel-Mitsrayim (misirbışin geşşuy) do giyxhe.
12 Yaaq'ubne dixbışe gırgın dekke uvhuyn xhinne ha'a. 13 Mana manbışe Kana'anne ölkeeqa qarı, Mamreys k'anene Maxpela eyhene çoleene mağaree'ar nyuq'vneeqa giyxhe. Mana mağara İbrıhımee çoluka sa cigee cus nyaq'v haa'asın ciga ixhecenva, Q'etbışda eyxhene Efronukeniy alivşu. 14 Dek k'eyxhıyle qiyğa, Yusuf cune çocaaşika, dekkıne ak'ıs abıyne gırgınbışika sacigee Misirqa siyk'al.
Yusuf çocaaşika yugra eyxhe
15 Dek qik'uyle qiyğa, Yusufne çocaaşe sana-sang'uk'le eyhen:
– Yusufee şi hı'iynçina qəl yik'el avqu vuxhee, mana qəl şake qığaahas vukkiykınee, şi hucoone ha'as?
16 Mançil-allab manbışe Yusufus xabar g'axuvu:
– Dekkee qik'asse, şak'le uvhuynniy: 17 «Yusufuk'le inəxüd eyhe: „Hucoone ixhes, çocaaşe vas hav'una pisvalla, yik'el hivxhanee'e“». Həşded şi vake heqqa, hucoone ixhes, yiğne dekkee ı'bəədat ha'ane Allahee g'ulaaşin bınahbı yik'eliyxan he'ecen.
Man eyhenbı Yusufuk'le g'ayxhımee, geşşe giyğal.
18 Qiyğa çocar mang'usqa abı, ç'iyelqamee k'yobzur, «Şi həşdiyle yuğun g'ular vobva» eyhe.
19 Yusufee manbışik'le eyhen:
– Zı nya'a Allahne vor, şu zale qəvəəq'ənas? 20 İlyaake, şos zas pisvalla haa'as vukkiykın, Allaheeyib mana yugvalis qav'u. G'iyna şok'le g'ecenbıyiy xəppanane insanaaşina ı'mı'r g'attivxhan he'ecenva Allahee məxüd hı'ı. 21 Mançil-alla qıməəq'ən zı şoqar vuşde uşaxaaşiqar ilyakkasda.
Yusuf manbışiqa g'üvənara yuşanı'ı manbışis yik'bı hele.
Yusufun qik'uy
22 Yusuf cuneyiy dekkıne xizanıka Misir axva. Yusufee vəşşe yits'ılle (110) sen ha'a. 23 Mang'uk'le Efrayimın uşaxarıb nevabıb g'oocenbı. Menaşşeyne dixene Maxiriyne uşaxaaşisıb mang'vee dekvalla haa'a.
24 Sabara gah ılğevç'uyle qiyğa Yusufee çocaaşik'le eyhen:
– Yizda qik'asda gah k'ane quvxheeyib, Allahee şu yik'el hivxanaa'as deş. Allahee şu ine ölkeençe qığaa'asınbı. Mang'vee k'ın g'assır İbrıhımıs, I'saq'ıs, Yaaq'ubıs hevlesva uvhiyne cigeeqa şu quvkees.
25 Qiyğa Yusufee İzrailybışisqa k'ınbı g'assaras alikkı, eyhen:
– Allahee şos huvuyn cuvab mısacad yik'el hixan ha'as deş. Şunad əlyhəəng'ə, yizın bark'vbı inyaa g'ılyma'a, şoka qıkkee.
26 Yusuf vəşşe yits'ılle (110) sen hı'ı qek'a. Mana Misiree mumyelamiş hı'ı, tabuteeqa giyxhe.