49
Yaaq'ubee dixbışis xayir-düə hoole
1 Yaaq'ubee dixbı qopt'ul eyhen:
– Yizde k'anyaqa savaale, vuşde vuk'lelqa qalesınbı zı yuşan ha'as.
2 Yaaq'ubın dixbı, sabı zal k'ırı alixhxhe,
Vuşde dekkıl İzrailir k'ırı gyaqqe.
3 Ruven, ğu yizda ts'erriyna dix,
ğu yizda guc.
Ğu yedike zı mek'varanang'a
taq'atıkanang'a ıxha.
Ğu gırgıng'ule xərna,
qıvaats'ana vor.
4 Ğu xhyanık akar sa'as-qa'as əxə deş.
Vak'le man ats'axhxhe,
ğu yik' hı'ı yizde tyuleeqa k'iç'uva,
yizde xhunaşşeeşine sang'ıka g'alirxhuva,
vake xərna ixhes deş!
5 Şimoniy Levi çocar vob,
manbışe qəlasın ha'asva
g'ılınc xılyaqa alyaat'a.
6 Manbı qəlıkanang'a
adamer gyabat'a,
yik'es ıkkanang'ad
manbışin həyvanar kara idyalesın xhinne qa'a.
Manbışe ək'elee aqqıyn karbı zı ha'as deş,
Zı manbışika sarçes deş.
7 Fığan haa'ane manbışde qəlbışisiy
xıl ts'ıts'dyaa'ane bahaliyvalis bed-düə vuxhena.
Zı manbışike g'abıynbı sacigeeqa savaales havaasaras deş,
İzrailvolle oot'alasınbı.
8 Yahud, yiğne çocaaşe ğu axtı qa'as,
duşmanaaşina gardan yiğne xıle vuxhes,
dekkın dixbıb vas k'yoozaras.
9 Yizda dix, Yahud, ğu k'on qoodu-soodu qööne
mek'vne aslanık akar.
Ğu manzil haa'ane şirık akar,
horku-qorku ç'iyel g'ılexha,
Şavusse şir g'udokana'as əxəyee?
10 Paççahiyvalla Yahudne xılençe mısacab əlyhəəs deş.
Gırgıne gahbışil vuk'lek vukkiy
mang'une nasılınbışisse mebınbışilqa ılğeç'es deş.
Nimeeletteyiy gırgın milletbı k'yozarasda vake paççah g'idyarı.
11 Yahudıqa manimee xətta t'ımılen tayangbı eyxhe,
mang'us manbı qidiykkın cuna əməleb çik avt'alas vəəxəna,
çike hı'iyne çaxıree tanalinbıd hoğalas əxənbı.
12 Mang'une uleppışin adın ciga çaxırıle k'ışşeyda,
silibıd niknele cagvarada ixhes.
13 Zevulunun cigad deryahne mıglek ixhes,
maa'ad gamıbı ileezaras,
mang'un ciga Sidonnee şaharılqa hixharas.
14 Xurcunbı mıgal alyaat'u, manzil haa'ana
İssaxar taq'atıkane əməleyk akar.
15 Mang'us vuc manzilis ulyorzuliyn ciga yugda qadı,
maana nyaq'v cus vukkanəxüb g'avcu,
mang'vee yı'q' k'yozarı'ı mebınbışis iş haa'ana.
16 Dani İzrailyne nasılbışda sa vob,
mang'vee cune milletıs məhkama ha'as.
17 Dani yəqqı'ne mıglekna xoçe xhinne ixhes.
Balkanne guvuyk üvxü,
çilyna yı'q'ı'hiyna g'ı'xə'əne.
18 Rəbb, zı gozet ha'an Ğu mısayiy zı duşmanaaşike g'attixhan ha'as!
19 Mebınbı Qadın cigabı q'əra qa'as ables,
mang'veeyib manbı g'e'eebaşeng'a q'əra qaa'as.
20 Aşerne cigabışee otxhuniy barakayka ixhes,
mang'vee paççahaaşisıd otxhuniy alles.
21 Naftali g'avkuyne maralık akar,
mang'uke g'abıynbı geeb micagınbı vuxhes.
22 Yusufmee, xhyan ı'lqəəne cigaysneene,
bıtağbıd cabırıle g'alysikkıyne tayangık akar.
23 Duşmanar mang'ulqa qəlıka vukkaaşika k'yoohar,
24 mang'un xıleppı gucuka vodva
mang'vee vuk xıle it'umda aqqaqqa.
Mang'us guc hoole vuxha
Yaaq'ubee ı'bəədat ha'ane Allahee.
Allah İzrailiqa çoban cune syuriyqa ilyakkan xhinne ilyakka.
Mana manbışda Suva vobna.
25 Yiğne dekkee ı'bəədat ha'ana
Allah hasre vas kumagxhecen,
Hasre Mang'vee vas xayir-düə hevlecen,
xəəne-ç'iyeyne xhyanbışike
ğu g'ıts'mayk'vancen,
vas geeb uşaxaariy çavra-vəq'ə helecen.
26 Yiğne dekkına xayir-düə barakatnane çolbışileb geeb vob,
ğu manisa çocaaşile qıvaats'anava,
hasre man gırgın xayir-düəbı yiğınbı ixhecen.
27 Benyamin bahalne ümulyuk akar,
miç'eeb k'on givk'u opxhan,
exhalid ing'uke-şeng'uke g'ayşuyn bit'al ha'a.
28 İna ələpqı'na yits'ıq'vəble (12) nasıl İzrailyna vobna. Dekkee dixbışde gırgıng'us, cus sik'ına inəxübna xayir-düə huvu.
Yaaq'ub qek'ana
29 Qiyğa Yaaq'ubee dixbışilqa əmr haa'a:
– Zı sık'ınne gahıle qik'asda, zas yizde xizanısqa, zale ögee hapt'ıynbışde k'anyaqa əlyhəəs ıkkan. Zı Q'etbışda eyxhene Efronne çoleene mağaree k'eyxhe.
30 Mana mağara Kana'anne ölkeene Mamrе eyhene cigays k'anene Maxpelayne çolee vobna. İbrıhımee mana mağara nyaq'v haa'asdemee Efronusse çoluka sacigeeniy alivşu.
31 Maa'abniy İbrıhımiy cuna xhunaşşe Sarra, I'saq'iy cuna xhunaşşe Rivq'a k'evxhu. Zı Leayer maa'ar k'eyxhı.
32 Man çolud, maana mağarab Q'etbışisseniy alivşu.
33 Yaaq'ubee dixbışis əmr hav'u g'attirxhınmee, g'elybı tyuleeqa sı'ı qek'ana. Məxür mana ahaleeqa ayk'an.