35
Yaaq'ub Bet-Elyqa siyk'al
1 Allahee Yaaq'ubık'le eyhen:
– Ğu Esavne xılençe hexvamee, vas Bet-Elee Allah gyagu. Həşde oza qıxha, maqa hoora, maayir axve. Maa'ad Allahıs q'urbanbı allya'an ciga ale'e.
2 Yaaq'ubee xizanık'leyiy cokane gırgınbışik'le eyhen:
– Şosneedın gırgın byutbı dağe'e, mətteepxha, tanalinbı badal he'e.
3 Oza qeepxha Bet-Elyqa vüqqəs. Zı Allahıs maa'ad q'urbanbı allya'an ciga alya'as. Mang'vee yizde vuk'lel yiğ höömee, zas alidghıniy quvu, zı nyaa ixhiy, Mana zaka ıxha.
4 Manbışe cosneedın byutbıyiy k'ırıbışilin tenebı Yaaq'ubısqa qele. Yaaq'ubee manbı Şekemne k'anene mı'qəq avud k'eyxha.
5 Manbı yəqqı'lqa qığeebaç'e. Allahee hiqiy-allane şaharbışin insanar it'umba qəvəəq'ən haa'a. Manbı mançil-allab Yaaq'ubne xizanıqab qihna gyabak'a deş.
6 Yaaq'ubiy cukan gırgın insanar Kana'anne cigabışeene Luzqa (mana Bet-El vob) qabayle.
7 Yaaq'ubee maa'ad q'urbanbı allya'an ciga ali'ı, mane cigayn doyud El-Bet-El (Bet-Elyna Allah) giyxhe. Çocune xılençe hexvamee, Allahee Vuc maa'arniy Yaaq'ubık'le hagu.
8 Rivq'a geeq'vey'ına Debora qeek'ana. Mana Bet-Elyne k'anekne mı'qəne avur k'eexha. Mane cigayn doyud Allon-Bakut (k'ane g'yaaşena mı'q) giyxhe.
Allah meer Yaaq'ubıs gyagva
9 Yaaq'ub Paddan-Arameençe siyk'alang'a, Allah mang'us gyagu, xayir-düə huvu,
10 eyhen:
– Yiğın do Yaaq'ub vodun. Həşdiyle valqa Yaaq'ubva ona'as deş. G'iyniyke şaqa yiğın do İzrail (mana Allahıka uğoda) ixhes.
İnəxüd mang'un do İzrail eyxhe.
11 Qiyğa Allahee mang'uk'le eyhen:
– Gırgın əxəna Allah Zı vorna. Ğunab yiğna nasıl hexxee'e, geeb qee'e. Vake sa millet deş, geedın milletbı g'ales. Yiğne nasıleab paççaharıb vuxhesınbı.
12 İbrıhımısiy I'saq'ıs huvuyn ç'iyebı Zı vasıd helesınbı. Valed qiyğa yiğne nasılıs heles.
13 Allah Yaaq'ubne k'anençe – yuşana'ane cigeençe ooqa ts'ıts'axhxhe.
14 Yaaq'ubee Allah cuka yuşan hı'iyne cigee sa g'aye ulyoozaraa'a. Qiyğad Allahne doyule çilqa zeytunun q'ışiy kya'an k'yı'ı.
15 Yaaq'ubee Allah cuka yuşan hı'iyne cigayn do Bet-El (Allahın xav) giyxhe.
Raahileyn qiyk'uy
16 Yaaq'ubiy cuna xizan Bet-Eleençe avayk'ananbı. Efratısqa hiviyxharang'a Raahileys uşax eyxhe. Uxooxang'a məng'ee xəppa k'ov ts'ıts'av'u. Məng'ı'n uxuy dağamda ılğeç'e.
17 Məng'ee k'ov ts'ıts'a'ane, uxooxane gahıl kumag ha'ane xhunaşşee eyhen:
– Qimeeq'ən, vas meer dix ıxha.
18 Mana qeek'aniy vor, dixes Ben-Oni (yizde uts'urna dix) do giyxheng'a. Qiyğa dekkeeme mang'un do badal hı'ı Benyamin (sağne xılena dix) giyxhe.
19 Raahile qeek'ana. Efratne (Bet-Lexemne) yəqqə mana k'eyxhı.
20 Yaaq'ubee Raahileyne nyuq'vnelqa sa g'aye giviyxhe. Mana g'aye g'iyniyne yiğılqamee Raahileyne nyuq'vnel guts xhinne avxuna.
21 İzrail mançe ark'ın, Migdal-Ederne şene aq'val çadır güvxü.
22 İzrail maa'ar axvang'a, Ruven dekkıne həmbal zəiyfayka Bilyhayka g'ılexha. İzrailik'le man ats'axhxhen.
Yaaq'ubın dixbı
Yaaq'ubıqa yits'ıq'vər (12) dixniy vor.
23 Manbı Leaye vuxuynbıniy vob:
Yaaq'ubna ts'erriyna dix Ruven, qihnanbıb Şimon, Levi, Yahud, İssaxariy Zevulun vuxha.
24 İnbıb Raahilee vuxuynbıniy vob:
Yusuf, Benyamin.
25 İnsabıme Raahileyne nukaree Bilyhanee vuxuynbıniy vob:
Dani, Naftali.
26 Leayeyne nukaree Zilypaneeyib inbıniy vuxu:
Qad, Aşer.
Yaaq'ubıs Paddan-Aramee vuxhayn dixbı inbı vuxha.
I'saq'ın qik'uy
27 Yaaq'ub Mamreeqa Qiryat-Arbenne (Xevronne) k'anyaqa, dekkıne I'saq'ne k'anyaqa qarayle. İbrıhımiy I'saq' Mamreab menne cigaynbı xhinne vuxha.
28 I'saq'ee vəşşe molyts'al (180) sen hı'ı.
29 Mana ine dyunyeyle ats'ı, q'əs qıxha qek'a. Məxür mana ahaleeqa ayk'an. Mana dixbışe Esaveeyiy Yaaq'ubee k'eyxha.