28
जी उठनो
(मरकुस 16:1-10; लूका 24:1-12; यूहन्ना 20:1-10)
1 साबत के बाद, जैसो की इतवार सप्ताह को पहलो दिन रहै, मरियम मगदलीनी और दुसरी मरियम कबर कै देखन गईं।
2 अनकाचीति से एक खतरनाक भूकंप आओ; स्वर्ग से उतरो प्रभु को एक दूत, पथरा कै हटाय दई, और बाके ऊपर बैठगौ।
3 बाको रूप बिजली के हानी रहै, और बाके लत्ता बरफ के हानी सफेद रहैं।
4 रखबरेया इत्ते डराने भै रहैं कि बे कप-कपाय गै और बेजान आदमी से हुईगै।
5 स्वर्गदूत बईंय्यरन से बतकाईं। बे कहीं, “तुम डराबौ मत्ती, मोए पता है कि तुम ईसु कै ढूँड़ रै हौ, जोकै क्रूस मैं चढ़ाय दौ गौ रहै।
6 बौ हिंयाँ नाय है; और बे कहीं, पर अपने बचन के अनुसार जी उठो है। हिंयाँ आयकै देख लियौ, जितै बौ लेटो रहै।
7 अब जल्दी जाबौ, और बे चेलन से कहबौ, ‘कि बौ मरे भैन मैं से जी उठो है, और अब बौ तुमसे पहले गलील जाएरौ है; हूँना तुम बाकै देखैगे!’ याद रैहबै कि मैं तुमकै का बताओ हौं।”
8 तभई बे जल्दी बाजी मैं कबर से चले गईं, डरानि और खुसी से भरी चेलन कै बतान कै भाज पड़ीं।
9 अनकाचीति ईसु उनसे मिलो और कही, “तुमकै सांति मिलै।” बे बाके झोने आए, और घुपटियाय कै, बाकी आराधना करीं।
10 ईसु उनसे कही “डराबौ मत्ती, जाबौ और मेरे भईय्यन कै गलील मैं जानकै कहबौ, और हूँना तुम मोकै देखैगे।”
रखबरेयन की खबर
11 जब बईंय्यरैं अपनी रहा कै चली गईं, कबर की रखबारी करन बारे कुछ सिपईय्या सहर बापस चले गै और मुखिया पुजारिन कै जो हूँना भौ रहै सब कछु बताए दईं जो भौ रहै।
12 मुखिया पुजारी बड़े-बूढ़ेन से मिले और योजना बनाईं; बे सिपईय्यन कै भौत रुपईया दईं
13 और कही, “तुम कहियो कि बाके चेला रात के समय आए रहैं और जब तुम सोत रहौ तौ बे बाको सरीर चुराय लैगै रहैं।
14 और अगर राज्यपाल कै सुननो चहाईये, हम बाकै समझाए देंगे कि तैं निर्दोस है, और तुमकै चिंता करन की कोई जरूरत नाय होगी।”
15 रखबरेया पैसा लई और बहे करी जो बाकै करन कै कहो गौ रहै। और तभई जौ बात यहूदियन के जरिया आज ले मानी जाए रइ है।
ईसु चेलन कै देखी
(मरकुस 16:14-18; लूका 24:36-49; यूहन्ना 20:19-23; प्रेरितो 1:6-8)
16 ईसु के ग्यारह चेला गलील के बौ पहाड़ मैं गै जितै जान के ताहीं बौ कही रहै।
17 जब बे बाकै देखीं, बे बाकी आराधना करीं, हालाकि उनमैं से कुछन कै संका रहै।
18 ईसु झोने जाएकै उनसे कही, “मोकै स्वर्ग और पृथ्वी मैं सबै अधिकार दै गै हैं।
19 तौ, सब जघा सब आदमिन के झोने जाबौ और उनकै मेरे चेला बनाबौ: दऊवा, लौड़ा और पवित्र आत्मा के नाओं से बपतिस्मा देबौ,
20 और जो कछु मैं आग्या दौ हौं बाकै मानन कै सिखाबौ। और मैं दुनिया के अंत ले हमेसा तुमरे संग रहांगो।”