मरकुस का लिखा हुआ ईसु मसीह का सुसमाचार
मरकुस को लिखो भौ ईसु मसीह को सुसमाचार
परिचय
मरकुस को लिखो भौ सुसमाचार कि किताब, बे चार नये नियम की किताब मैं से है, जोमैं ईसु मसीह के जिंदगी के बारे मैं बताओ गौ है। जे किताबन कै “गौस्पल” कहो जाथै। गौस्पल को मतलब “सुसमाचार” होथै। ईसु की मौत के बाद जे चार किताबन कै मत्ती, मरकुस, लूका, और यूहन्ना लिखीं। जे चारौ मैं से मरकुस को लिखो भौ सुसमाचार सबसे छोटी किताब है। ऐसो मानो जाथै कि जौ किताब सब सुसमाचारन से पहले मसीह के पैदा होन के 65-70 साल के बाद लिखी गई। और भौत से ईस्वर पंडितन को माननो है कि जौ रोम मैं रोमी मसीहियन कै प्रेरित करन ताहीं लिखी गई।
मरकुस जोकै जौन मरकुस करकै जानो जाथै प्रेरित पौलुस और बरनबास को संग बारो रहै। बाके मान-मरयादा कै बौ समय ठेस लगी, जब बौ पहली मिसनरी सफर के बीच मैं पौलुस और बरनबास कै बीचै मैं छोड़ दई प्रेरितो 13:13। लेकिन बाद मैं हम देखथैं कि मरकुस बरनबास के संग दुबारा से सफर करथै प्रेरितो 15:37-39। मरकुस कै पतरस को नजदीकी दिलबर करकै जानो जाथै 1 पतरस 5:13। मरकुस ईसु की जिंदगी कै नाय देखी रहै। तहुँओं बौ पतरस की गभाई कै लिखे भै के बुनियाद मैं जौ किताब लिखी । जौ सुसमाचार मैं मरकुस चेलापन और ईसु की आखरी समय बारी सिक्छा मैं जोर देथै।
रूपरेखा
1. मरकुस किताब को परिचय देथै। 1:1-13
2. मरकुस ईसु के गलील मैं करी सेवा के बारे मैं बताथै। 1:14–8:21
3. जाके बाद बौ ईसु के यरूसलेम सफर के बारे मैं बताथै। 8:22–10:52
4. ईसु को यरूसलेम मैं रहनो हुँआँ बाकी मौत और पुनरुत्थान होन के बारे मैं लिखकै किताब कै खतम करथै। 11:1–16:8
1
यूहन्ना बपतिस्मा देनबारे को, प्रचार
(मत्ती 3:1-12; लूका 3:1-18; यूहन्ना 1:19-28)
1 परमेस्वर को लौड़ा ईसु मसीह के सुसमाचार की सुरुवात।
2 जैसो यसायाह भविस्यवक्ता भविस्यवाँड़ी करन बारे की किताब मैं लिखो है
“परमेस्वर कही, ‘देख मैं अपने दूत कै तेरे अग्गु पनारथौं,
जो तेरे ताहीं रहा सुधारैगो।’
3 बन मैं एक पुकारन बारे की अबाज सुनाई दई है,
‘कि प्रभु के ताहीं रहा बनाबौ;
और बाकी रहा सीधी करौ!’ ”
4 यूहन्ना बन मैं आओ, और बौ प्रचार करकै आदमिन से कहेन लागो, “अपने पापन से मन फिराबौ और बपतिस्मा लेबौ तभईये परमेस्वर तुम्हारे पापन से तुमकै माफ करैगो।”
5 तौ यहूदिया देस के और यरूसलेम सहर के सबै रहेन बारे निकरकै बाके झोने आए, और अपने पापन कै मानकै यरदन नदिया मैं बासे बपतिस्मा लईं।
6 यूहन्ना ऊँट के खाल के लत्ता पहनत रहै और अपने करिहाँओं मैं चमड़ा को कमरबंद भाँदे रहेत रहै, और बौ टींड़ा और बन को सहद खाए करत रहै,
7 और जौ बात को प्रचार करत रहै, “कि मेरे बाद जो आनबारो है, बौ महुँ से ताकतवर है, मैं लोहोक्कै बाके जूता की तनी खोलनौ लायक नाय हौं।
8 मैं तौ तुमकै पानी से बपतिस्मा दौ हौं, पर बौ तुमकै पवित्र आत्मा से बपतिस्मा देबैगो।”
ईसु को बपतिस्मा और बाकी परिक्छा
(मत्ती 3:13; 4:11; लूका 3:21-22; 4:1-13)
9 बेईं दिनन ईसु गलील देस के नासरत नगर से आए कै, यरदन नदिया मैं यूहन्ना से बपतिस्मा लई।
10 और जब ईसु पानी से निकरकै ऊपर आओ, तौ बौ बहे समय कै स्वर्ग खुलत और आत्मा कै कबूतर के हानी अपने ऊपर उतरत भौ देखी।
11 और स्वर्ग से एक अबाज आई, “तू मेरो प्रिय लौड़ा है, तोसे मैं बड़ा खुस हौं।”
12 तौ पवित्र आत्मा बाकै तुरंतै बन घाँईं पनार दई।
13 और बन मैं चालीस दिन ले, सैतान बाकै लालच देत रहो। और बौ बन के जानवरन के संग रहो, और स्वर्गदूत बाकी सेवा करत रहे।
ईसु के सेवा करन की सुरुवात
(मत्ती 4:12-22; लूका 4:14-15; 5:1-11)
14 यूहन्ना के पकड़वाए जान के बाद ईसु गलील मैं आयकै परमेस्वर के राज्य को सुसमाचार को प्रचार करी,
15 और कही, “समय पूरो हुई गौ है, और परमेस्वर को राज्य झोने आए चुको है; मन बदलौ और सुसमाचार मैं बिस्वास करौ।”
ईसु चार मछरेयन कै मस्काई
16 ईसु गलील देस की झील के डींड़े-डींड़े जात भै, बौ सिमौन और बाके भईय्या अन्द्रियास कै झील मैं जार डारत देखी; काहैकि बे मछरेया रहैं।
17 ईसु उनसे कही, “मेरे पच्छू आबौ; मैं तुमकै परमेस्वर के झोने कैसे आदमिन कै लाथैं बौ सिखांगो।”
18 बे तुरंतै जार कै छोड़कै बाके पच्छू हुई लईं।
19 और जरा सो अग्गु पुगकै, ईसु जब्दी के लौड़ा याकूब, और बाके भईय्या यूहन्ना कै, अपनी नईंयाँ मैं जार कै सुरजात भै देखी।
20 बौ तुरंतै उनकै मस्काई; और बे अपने दऊवा जब्दी कै मजदूरन के संग नईंयाँ मैं छोड़कै, बाके पच्छू हुई लईं।
भूत पकड़े भै आदमी कै अच्छो करनो
(लूका 4:31-37)
21 तौ फिर ईसु और बाके चेला कफरनहूम सहर मैं आए, और बौ तुरंतै साबत के दिन सभाघर मैं जाएकै उपदेस देन लागो।
22 और लोग बाके उपदेस से चौहोंक गै; काहैकि बौ उनकै यहूदि नियम के सिक्छक के हानी नाय, बल्किन अपने अधिकार से उपदेस देत रहै।
23 और बहे समय, उनके सभाघर मैं एक आदमी रहै, जोके भीतर प्रेत आत्मा सटकी रहै।
24 बौ चिल्लाए कै कही, “हे ईसु नासरी, हमकै तोसे का काम? का तू हमकै नास करन कै आओ है? मैं तोकै जानथौं, तू कौन है? तू परमेस्वर को पवित्र आदमी है!”
25 ईसु बाकै झुकाएकै कही, “चुप्पा रहे; और बाके भीतर से निकर जा।”
26 तौ प्रेत आत्मा बाकै ऐंठाएकै, और बड़ा जोड़ से किक्याए कै बाके भीतर से निकर गौ।
27 जौ देखकै सब जनी चौहोंक गै, और सब आपस मैं बहस करन लग्गै, “कि जौ का बात है? जौ तौ अनोखो उपदेस है! बौ तौ अधिकार से प्रेत आत्मा कै आग्या देथै, और प्रेत आत्मा बाकी बात मानथैं।”
28 और ईसु को नाओं तुरंतै गलील के आस-पास के सबै जघन मैं फैल गौ।
ईसु निरे बिमार आदमिन कै अच्छो करी
(मत्ती 8:14-17; लूका 4:38-41)
29 और ईसु तुरंतै सभाघर मैं से निकरकै, याकूब और यूहन्ना के संग सिमौन और अन्द्रियास के घरै आओ।
30 और सिमौन की सास ततासेरी से बिमार रहै, और बे तुरंतै बासे, बाके बारे मैं कहीं।
31 तौ फिर ईसु बाके झोने जाएकै बाको हाथ पकड़कै उठाई; और बाको बुखार तुरंतै उतर गई, और बौ उनकी सेवा-खातिर करन लग्गई।
32 संजा खिन जब दिन डूब गौ तौ लोग सब बिमारन कै और उनकै, जोके भीतर प्रेत आत्मा सटकी रहैं, ईसु के झोने लाईं।
33 और पूरो सहर बाके घर के दुआरे जुराएगौ।
34 और बौ निरेन कै जो अलग-अलग तरहन की बिमारिन से परेसान रहैं, उनकै अच्छो करी, और निरे तरहन के भूतन कै निकारी, और प्रेत आत्मा कै मसकन तक नाय दई, काहैकि प्रेत आत्मा ईसु कै जानत रहैं।
गलील सहर मैं ईसु को प्रचार
(लूका 4:42-44)
35 और भुकभुको होन से भौत अग्गु, ईसु उठकै निकरो, और बन मैं गौ और बौ प्रार्थना करन लग्गौ।
36 तौ सिमौन और बाके संग बारे ईसु कै ढूँड़न गै।
37 जब ईसु मिलगौ, तौ बे बासे कहीं, “सब जनी तोकै ढूँड़ रै हैं।”
38 ईसु उनकै जबाब दई, “आबौ; आपन और कहूँ आसपास के गाँव मैं चलैं, मैं हुँओं प्रचार करंगो, काहैकि मैं जहे ताहीं निकरो हौं।”
39 और ईसु पूरे गलील मैं उनके सभाघर मैं जाए-जाएकै प्रचार करतो, और प्रेत आत्मा कै निकारे करत रहै।
ईसु एक कोहढ़ी कै अच्छो करी
(मत्ती 8:1-4; लूका 5:12-16)
40 एक कोहढ़ी ईसु के झोने आयकै, बासे नहोरे करी, और बाके अग्गु घूँटे टेक कै बासे कही, “अगर तू चाहबैगो तौ मोकै सुद्ध कर सकथै।”
41 ईसु बाके ऊपर तरस खाएकै बाके ऊपर हाथ बढ़ाई, और बाकै छुइ कै कही, “मैं चाहथौं कि तू सुद्ध हुई जा।”
42 और तुरंतै बाको कोहोढ़ चले गौ, और बौ सुद्ध हुई गौ।
43 फिर ईसु बाकै समझाए कै तुरंत पनार दई,
44 और बासे कही, “देख, कोई से कछु मत कहिये, और जाएकै अपने आपकै पुजारी कै दिखा, और अपने सुद्ध होन के बारे मैं, जो कछु मूसा के नियम हैं, बाकै भेंट चढ़ा ताकी तेरे अच्छे होन को तू गभा बनै।”
45 पर बौ हुँआँ से जाएकै जौ बात को गजब प्रचार करी और हिंयाँ तक की ऐसे बात फैलान लग्गौ की ईसु फिर खुल्लम-खुल्ला नगर मैं नाय जाए पाई, पर बौ बाहर अलग्याँओं जघा मैं रहेत रहै; और लोग सब घाँईं से बाके झोने आत रहैं।