9
1 Ko mirebeke ry Israele,
ko miriñariña an-kobaiñe
manahake ondatio;
nisitak’ aman’Añahare’o irehe,
nitea’o ty tamben-karapilo
an-toe-panongàñe eo.
2 Tsy hahaeneñe iareo o toe-
pamofoha’eo naho o fipiritan-divaio,
vaho hifotetse ama’e ty divay vao.
3 Tsy ho tambatse an-tane’ Iehovà ao;
fa hibalike mb’e Mitsraime mb’eo
t’i Efraime,
naho hilintseñe hàneñe tsy malio
e Asore añe.
4 Ie tsy mañilin-divay am’ Iehovà,
naho tsy ho no’e ka o fisoroña’ iereoo,
fa hoe mofom-pandala,
fonga tiva ze mikama ama’e:
a’ iareo avao izay,
fe tsy mete mimoak’ amy anjomba’
Iehovày ao ty mahakama’ iareo
ty amo arofo’ iareoo.
5 Ino ty hanoe’ areo amo
sabadidam-pitontonañeo?
naho amo andro namantaña’ Iehovào?
6 Ingo te nisitaha’ iereo ty fandrotsahañe;
fe hatonto’ i Mitsraime, haleve’ i Mofe
ho lovae’ o hisatseo ze nisoa amo
volafoti’ iareoo;
fatike ty hitiry amo kivoho’ iareoo.
7 Fa tondroke o androm-pitilihañeo
fa pok’eo o androm-pamaleañeo;
hapota’ Israele izay;
dagola ty mpitoky,
minè t’indaty entoen-troke,
ty amy fitoabora’ o hakeo’oo,
bey ty falaiñañe azo.
8 Mpijilojilon’ Añahareko t’i Efraime
fe fandri-bom-pitsindroke
o sata’ i mpitokiy iabio, toe falaiñañe añ’anjomban’Añahare’e ao.
9 Fa pok’ an-dalek’ ao iereo,
naniva vatañe manahake
tañ’andro’ i Gibà;
toly ndra ho tiahi’e o hakeo’eo
vaho ho tilihe’e o tahi’eo.
10 Tendrek’ ahy hoe valòboke
an-dratraratra añe t’Israele;
nitreako o rae’eo hoe loham-boan-tsakoa amy fifotora’ey;
fe nimoake e Baal-peore
ie nitokañe ho amity raha mahameñatse,
vaho naniva vatañe
mira amo raha kokoa’ iareoo.
11 I Efraime: hitiliñe añe hoe voroñe
ty enge’ iareo,
ho po-pisamahañe,
naho hakoahañe an-koviñe ao
vaho tsy am-piareñañe.
12 Ndra t’ie mañabey anake, hampandalàko,
tsy hahatoly lahilahy raike;
Eka! hankàñe am’iereo ka te isitahako.
13 I Efraime, manahake ty nahatreavako
i Tsore, ie tinongy an-tane fanjàka;
fe hakare’ i Efraime ho amy
mpanjamañey o ana-dahi’eo.
14 Atoloro iareo, ry Iehovà
ze satri’o hatolotse:
toloro hòviñe mampiboloañe
naho fatroa kapaike.
15 E Gilgale iaby o hakeo’eo,
tañe ty namotorako falaiñañe am’ iareo,
ami’ty halò-tsere’ o sata’eo ty
handroahako iareo amy anjombakoy,
tsy hikokoako ka;
fonga mpiola o roandria’eo.
16 Linafa t’i Efraime, maike o vaha’eo,
tsy hamokatse voa ka iereo;
aa ndra t’ie mahatoly,
haitoako ty sabon-koviñe noro’ iareo.
17 Hahifin’Añahare añe iereo,
ami’ty tsy fañaoña’ iareo Aze;
vaho ho mpirererere amo
kilakila’ondatio añe.