8
1 Ano am-palie’o eo i antsivay,
hihelañe mb’añ’anjomba’ Iehovà
mb’eo re hoe vantio,
amy t’ie nivalik’ amy fañinakoy
vaho niola amo Fanoroakoo.
2 Hitoreo amako hao t’Israele:
Ry Andrianañahare,
fa nahafohiñ’Azo zahay.
3 Fa nahifi’ Israele añe ty soa;
horidañe’ o rafelahio iereo.
4 Nampijadoñe mpifeleke iereo,
fe tsy boak’ amako;
manam-pifehe, fe nofiko;
nanoe’ iereo ndrahare avao o volafoty naho volamena’ iareoo, soa te haitoañe.
5 I bania’oy ry Somerone, ty nañitoañ’ azo;
misolebotse ama’o ty habosehako;
ampara’ te ombia t’ie hahatakatse
lio-hakeo?
6 F’ie boak’ am’ Israele;
rinanjim-pitoroñe;
toe tsy Andrianañahare;
le ho demoheñe i bania’ i Somerone rey.
7 Nitongy i tiokey iereo,
vaho ho tatahe’ iereo ty tangololahy;
tsy hanam-bokatse iereo;
tsy hiborake ty taho’e
fe ndra t’ie hamokatse,
habotse’ ty ambahiny.
8 Fa nagodrañe t’Israele;
le hoe fanake tsy vara
amo kilakila’ ondatio,
9 amy te nionjomb’Asore mb’eo,
i borìke lý mirerererey;
manambe sakeza t’i Efraime.
10 Aa ndra t’ie nandeta-vatañe amo fifeheañeo, hatontoko henaneo,
ie fa ninìke ty amy nampijiniam-panjaka
naho o roandriañeo.
11 Nampitombo kitrely handilara’e
t’i Efraime; hakeo ama’e i kitrely rey.
12 Sinokiko ama’e ty raha maro amy
Fanoroakoy
fe natao’e ho raha ankafaankafa.
13 Banabanae’ iereo soron-draho,
isoroña’ iareo hena naho kamae’e;
fe tsy no’ Iehovà;
ho tiahi’e o tahi’ iareoo,
vaho ho vale’e o hakeo’ iareoo;
himpoly mb’e Mitsraime mb’eo iereo.
14 Amy te nandikofa’Israele i Mpitsene azey, vaho nandranjy anjomba bey;
fa nampitombo kijoly t’Iakobe;
aa le hañirahako afo o rova’eo,
fonga habotse’e o anjomba’eo.