al-Zobur 99
1 Mabude bashshai ḳoroin, zati oḳol ḳafouk,
duio Karubimor maze tan ashon, duniae tortor ḳorouk.
2 Fobitro Sion nogrir maze Mabud-u mohan,
hoḳol zatir ufre tan ijjot-shomman.
3 Tara ḳorouk tumar gunogan,
mohan ar boyonkor tumar nam,
tara ḳouk, moha fobitro tain.
4 O bolala bashsha, hok bisarre bala fao tumi,
hok-halali gatiso to mozbut ḳori,
Iakubor bongshot boail ḳorso hok bisar ar forezgari.
5 Amrar Mabud Allar tarif ḳoro,
soizda ḳoro tan ḳodom mubaroko,
ḳo, moha fobitro tain.
6 Musa ar Harun asla tan imamotir ḳamo,
Shamuel nobi-o roita tan dua-munazato,
zuaf faita tara ḍakile Mabudor dorbaro.
7 Megor kuṭit roia tain matita tarar loge,
tan kalam mania tara solta tan hukume.
8 O Alla amrar Mabud, tarar minoti tumi huntae,
tarar ḳosurir bodla dile-o tumi Allae mafi ditae.
9 Amrar Mabud Allar tarif ḳoro,
soizda ḳoro tan fobitro faṛo,
amrar Mabud Alla to fak-fobitro.