al-Zobur 98
1 Mabudor name git-gozol gao noya noya,
tain to ḳorsoin taijjubi kam zotota.
Nizor ḍain ator kudroti bol dia,
ḳorsoin ḳoto asanoḳ joyor lila-ḳela.
2 Mabud tan uddar ḳam zanaisoin hoḳolre,
tan hok kam deḳaisoin zati oḳlor sokur samne.
3 Tan doya-maya ar hok-halali,
iad raḳsoin Boni Israilor lagi,
dekise zogotor hesh shimanar manshe,
amrar Mabudor uddar ḳora ḳamre.
4 Ore zogotbashi gao kushir gan Mabudor name,
baiddo-baznar tale tale zure zure,
tan gunogan gao tumra boṛo golaye.
5 Bina-behala bazaia tale tale gao gan,
Mabudor tarif ḳori gozol-gan gao tan.
6 Tumra zure zure sunga ar shinga bazaia,
Alla malikor samne gao kushi koria.
7 Tan tarife gorzia uṭouk boṛo golae,
doria ar tar mazor hoḳoltae,
erloge furti koro zogotor shob bashindae.
8 Gang oḳole kushi koro ator tali dia,
furti koro eḳloge faṛ-forbot milia.
9 Mabudor samne gao kushie gola faṭaia,
duniar bisar ḳorat shoyong Mabud aira,
hok bisar ḳorba tain hok-halal roia,
hoḳol zatir bisar ḳorba hok-insaf dia.