al-Zobur 96
1 Mabudor name noya git gao,
O hara dunia, Mabudor git gao,
2 Mabudor name git gao, tan tarif ḳoro,
dine dine tan deoa nazator toblig ḳoro.
3 Hoḳol zatire zanao tan gourobor ḳota,
hoḳol manshore ḳo tan kudroti kamor mohima.
4 Mabud-u mohan, moha tarif tan,
hoḳol deb-debi taki boṛo boyonkor tain,
5 zati oḳlor deb-debi to beḳama futul ḳali,
Mabude-u banaisoin hoḳol asman monḍoli.
6 Shan-shouḳot ar mohima tan samne roise,
bol-shokti ar zak-zomoḳe tan gor hazaise.
7 O zogotor ḳandan oḳol, zanao Mabudor gunogan,
gourob ar bol-shoktir ḳota zanao tan,
8 Mabudor name tan faona gourob zanao,
lilla-sodga ato loia tan dorbaro hamao.
9 Fak-saf dile Mabudor samne soizdat foṛo,
hara dunia tan samne tor-toraia ḳafia uṭo.
10 Zati oḳlor maze elan ḳoro, Mabud-u bashsha.
Zogotre banaisoin mozbut, ḳorto nae kunu loṛa-soṛa,
tain nichchit hoḳol zatir hok bisar ḳorba.
11 Asman oḳol furti korouk, dunia kushi-o ouk,
doria ar tar mazor shob zandar gorzia uṭouk,
12 zomin ar er hokkolta kushi-bashi ḳorouk,
bon-baganor shob gas-fala-o anondo-ullash ḳorouk.
13 Mabudor samne ola-u ḳorouk ita hoḳolta,
tain to aira duniar bisar ḳorta.
Zogotor bisar-foysala ḳorba hok-insafe,
tamam zatir bisar-foysala ḳorba hok-halalie.