al-Zobur 95
1 Ao amra kushir gozol gai Mabudor name,
rokkaḳari ṭilla tain, furti kori zure zure.
2 Solo amra shukur-guzar ḳori kori tan samne zai,
baznar tale tale tan name zure-shure gai.
3 Mabud-u to uforala, shorbo mohan Allatala,
dui jahanor bol-shoktir tain-u boṛo bashsha.
4 Zomin ar fatal shob-u tan ato,
faṛ-forbotor usa ṭilla-o tan-u to.
5 Tain-u doriar malik banaisoin ita,
hukna zomin-o tan duio ate goṛa.
6 Ao amra soizda dia tan ebadot ḳori,
amrare foydaḳari Mabudor samne notozanu boni.
7 Tain-u to amrar Allatala,
amra tan meṛar fal, tan zominor bonda.
Ah! Tan golar aoaz zudi huntae tumra!
8 Dilre fashan ḳorio na tumra zela ḳorslae Meribat,
hou din ḳorslae zeta morubumir Masa namor zagat.
9 Tumrar baf-dadainte hono to deḳsil more azmaia,
amar kudroti lila-ḳela dekia-o tara ḳorla more forikka.
10 Hou zomanar manshor zala shoilam ami sallish bosor doria,
heshe ḳoilam, itar dil to be-foti amar fotre sinlo na,
11 teugi amar gusar suṭe ḳoilam ḳosom ḳoria,
mor deoa aramor desho hamanir shuzug faito nae tara.