al-Zobur 9
Ebadot-bondegi forisaloḳor lagi: shur ‘Mout-Labben’.
Hozrot Daudor mizmor.
1 Ami furafur dile-zane Mabudor gunogan gaimu,
tumar kudroti ḳam-ḳazor ḳota ami toblig ḳormu.
2 Ami tumare loia-u furti-amud ḳormu,
O Rabbul alamin, tumar namor tarif git gaimu.
3 Dushmon oḳol zebla amar ḳor taki firia zae,
zaoar ḳalo usṭa ḳaia foṛia tara morizae.
4 Nalish hunia tumi amar fokke ray diso,
raz-godit boia tumi to hok bisar ḳorso.
5 Tumi bin zatire damki dia ou naforman binash ḳorso,
tumi siroḳalor lagia itar nam miṭailiso.
6 Ita dushmon oḳol gese nifat oia,
tarar baṛi-gor binash siroḳalor lagia,
tarar ṭaun oḳol tumi falaiso tulia,
kunu sin nam-nishana na rakia.
7 Oile Mabud to roin siroḳal,
tain ḳorsoin bisaror godi boail,
8 hok-insafe zogotor bisar-foysala ḳorba,
hok-halalie tamam zatir bisar ḳorba.
9 Zulumo foṛa zonor lagi Mabud-u tar asroy,
mosibotor ḳalo tain nirafod ṭikana oy.
10 Tumare sine zara, tumar ufre borosha ḳore tara,
Mabud go, tumar tallash ḳorra ashikor log tumi saṛso na.
11 Sion nogoro boshot ḳari Mabudor tarif-gozol gao,
tan kudroti lila-ḳelar boyan hokkol zatire zanao.
12 Kun-ḳarafir bodla deorae mono raḳoin hoḳolta,
duki-kangalor ḳandon tain kunudin fauroin na.
13 Dushmonor ato durdosha dekia rohom ḳoro Mabud go,
moutor duar taki tumi amare tulia neo go,
14 zate tumar shukria-tarif ami gaitam fari,
tumi amar zan basanie ami ḳormu kushi-bashi,
Sion nogrir faṛae faṛae ḳormu nasa-nasi.
15 Nizor kuṛa gato foṛia bin zati buṛigese,
tarar fatail lukail fando tarar-u fao hamaise.
16 Mabude nizore zair ḳoria hok bisar ḳorsoin,
naforman dolor banail fando tara-u aṭkisoin.
(Higgayon-Sela)
17 Naforman oḳol hamauk gia goin fatale,
otar loge bin zati-o buli zain zetae Allare.
18 Nirasroyre fauroin na tain siroḳalor dae,
duki-kangalor asha-o kunudin bifole zaito nae.
19 Zoldi ao go Mabud!
manshe zanu na deḳae baṛti bahaduri,
tumar samne bisar ouk hoḳol bin zati.
20 Ḍor-boy deḳao Mabud tumi tarare,
tara ḳali maṭir manush zanouk bin zatie.
(Sela).