al-Zobur 7
Hozrot Daudor mizmor. shur ‘Shiggayon’. Bin-Iamin ḳandanor shordar Kushe tanre gali deoae Mabudor dorbaro tan foriad.
1 Ogo amar Mabud Elahi
tumar sayat asroy loisi,
ḳore oia ḳedaira zara amare,
tarar at taki basao more.
2 Naile shinghor laḳan ṭukra ṭukra ḳorbo more,
faria-siria marbo to basanit ḳeu na aile.
3 Ogo amar Mabud Elahi, zudi ḳoria taki kunu ḳarafi,
amar ato roy zudi kunu naformani,
4 mor birudi nae tebuo zudi ḳeti ḳoria taki,
—borong bina ḳarone ze dushmon oise tar-o ufoḳar ḳorsi—
5 te dushmone amare dorilauk ḳedaia,
maṭit falaia faodi faṛaia,
dulat mishailauk amar ḳaya.
(Sela)
6 Mabud go, tumar moha gusae amar fokke ubao,
zara more ingshae ota dushmonor bifokke ḳaṛa o,
O amar Alla, tumar hok bisar zari ḳorilao.
7 Tumar sairo galat zoma ouk duniar hoḳol zati,
arsho boia deḳo tarar hoḳol ku-kirti.
8 Mabud ota hoḳol zatir bisarok to tumi,
ray dio dekia mor forezgari ar hok-halali.
9 Naformanor zulum bond ḳorilaukka,
forezgarre mozbut banao O hok Alla,
dil-monor bitor tumi zasai ḳoro hoḳolta.
10 Alla pak mor rokkaḳari, zan basain amar,
tain-u basaneala shorol monor bondar.
11 Alla pake ḳoroin hok bisar,
naformanor ufre gusa ḳoroin borabor,
12 manshe touba na ḳorile tan toluar daraiba,
tir-donuk loia tain donuko tir lagaiba.
13 Zane marar atiar tain zuit ḳorsoin,
tan tir oḳolre tain aguindi hazaisoin.
14 Naformane bod ḳamre feṭor bitre raḳe,
bod ḳame feṭ bori gele zonom dey misare.
15 Maṭi kuṛia kuf kude he goin ḳoria,
tar banail ou kufo nize zae foṛia.
16 Tar naformani to tar matat firia ae,
tar zulum aia nizor talut foṛi zae.
17 Mabudor hok bisaror lagi shukur-guzar ḳormu tan,
Rabbul alaminor name ami ḳormu gunogan.