al-Zobur 41
Ebadot-bondegi forisaloḳor lagi: Hozrot Daudor mizmor.
1 Hou manush doinno, duki-kangalor ḳota sinta ḳore ze,
mosibotor dino Mabude nichchit uddar ḳorba tare.
2 Mabude tare rokka ḳoria raḳba basaia,
deshor manshe tare shukila manush ḳoiba,
dushmonor ato Mabude tare shofia na diba.
3 Bemare bisnat foṛi gele Mabude tar asan ḳoroin,
shifa ḳoria bisna taki tare tulia anoin.
4 Ami ḳoisi, “Ami to ḳorsi tumar birudde guna,
ogo Mabud, doya ḳoria ḳoro more shifa.”
5 Amar ḳeti saia dushmone ḳoy, “Ogu kun shomoy morbo?
Kun shomoy tar nam-nishana zomin taki musi zibo?”
6 Tara more deḳat aile baotabazi mate,
tarar mono zomail bodnam roṭae gia bare.
7 Amar birudi oḳol milia ḳana-ḳani kore,
amar ḳeti korto kila ou dandae taḳe.
8 Ḳoy tara, “Bout boṛo ḳarafie tare zatia dorse,
uṭito farto nae ar zeḳano he hutail ase.”
9 Eḳ talo boia zegie ḳaito, borosha ḳortam zar ufre,
oḳon ou mayar duste-o amar birudde lagigese
10 Ogo Mabud rohom ḳoro tumi nize more,
tarar bodla nibar lagi tulilao amare.
11 Amar ufre kushi tumi ikan ami zani,
dushmone to mor birudde sillae na ar joyor sillani.
12 Tumi doria raḳso more hok-halal dekia,
tumar didaro zaga diso siroḳalor lagia.
13 Hokkol proshongsha Boni Israilor Mabud Allar ouk,
shuru taki aḳer forzonto siroḳal zari rouk.
Amin Summa-Amin.
Zobur Shorifor dusra sifara (Zobur 42-72)