al-Zobur 39
Ebadot-bondegi forisaloḳ Zidutunor lagi.
Hozrot Daudor mizmor.
1 Ami ḳoisi, “Hushiar roimu ami solar fotor befare,
guna taki hefazot ḳormu amar zifrare,
naforman zoto shomoy roibo amar samne,
lagam lagai raḳmu to amar mukor maze.”
2 Zoban bond ḳoria ami nirai roilam,
bala-bura kunuta-u na matilam,
erlagi mor monor duk roilo aro baṛat.
3 Dilor ḳoshṭoe sinta ḳorae aguin laglo buko,
teu zifradi ḳoilam, “Ami kita ḳortam go,
4 amare zanao go Mabud amar dosha oibo kita?
Ḳotodin basimu ami shango oibo ayu kila?”
5 Eḳ muiṭ ḳorso tumi mor hayati,
tumar samne shuinno zanu mor zindegi,
duniar forteḳ manush oilo eḳṭa nishash ḳali.
(Sela)
6 Sayar moto ḳori manush ḳore aoa-zaoa,
beḳama fereshani kore don-doulotor lagia,
oile ita ḳe ḳaibo ikan zane na.
7 Mabud go, kitar ashae roitam ami ofekkat?
Amar hoḳol asha to tumare faoat.
8 Ḳoro go uddar more hoḳol onnae taki,
beaḳolor ato ḳorio na more beijjoti.
9 Muk kulchi na ami roisi nirai,
ita ḳoshṭo to oise mor tumar isharae.
10 Tumar shasti horailao amar ufor taki,
tumar ator agat ḳaia mui shesh oigesi.
11 Gunar daye damki dia zebla manshore shongshudon ḳoro tumi,
tarar mayar don fukor laḳan deo nosṭo ḳori,
manush to oilo eḳṭa nishash ḳali.
(Sela)
12 Amar foriad Mabud tumi huno,
ḳan deo tumi mor ḳandono,
dekia mor ḳandon nirai roio na tumi,
tumar goro to ami bideshi,
amar baf-dadar laḳan ami-o probashi.
13 Ḳoṛa nozor horailao tumar amar ufor taki,
zaibar age, shesh oibar age ami,
hirbar zanu mui kushi oitam fari.