al-Zobur 20
Ebadot-bondegi forisaloḳor lagi: Hozrot Daudor mizmor.
1 Mosibotor shomoy Mabude tumar foriad hunoukka,
Iakubor Allar nam tumare sohi-salamote raḳoukka.
2 Tan fak mukam taki tumar lagi shaijjo faṭaukka,
fobitro Sion taki tumare bol-takkot deukka.
3 Tain tumar hoḳol lilla-sodgare mono raḳoukka,
kobul ḳoroukka tumar zalail kurbani.
(Sela)
4 Tumar dilor arzire kobul ḳoroukka,
monor asha oḳol furon ḳoroukka.
5 Tumi zoyi oile amra kushi-bashir gozol gaimu,
amrar Allar name janḍa uṛaimu,
Mabude tumar hoḳol minoti furon ḳoroukka.
6 Ami to oḳon zani-u,
Mabude tan nizor ḳelafoti faoa zonre basaiba.
Tan afon ḍain ator bol-takkote zuddot zitaiba,
nizor fobitro arosh taki en minoti hunba.
7 Ḳeuror borosha oilo tar zuddor rot,
ar ḳeuror borosha tar guṛaintor ufre,
amrar borosha ḳali amrar Alla Mabudor ufre.
8 Tara to unda oia leṭizain,
oile amra shida oia hamesha ḳaṛa roi.
9 O Mabud, bashshare zoyi koroukka,
amrar ḍaḳ hunia zuaf deukka.