al-Zobur 14
Gan-baznar forisaloḳor lagi: Hozrot Daudor mizmor.
1 Beaḳole mone mone ḳoy, “Alla bolte ḳeu nai.”
Ashole tara bedin-beiman, ḳorer ḳali zogoinno ḳam,
hok kam ḳore ila ḳeu nai.
2 Arshe-azim taki Alla Pake adom zatir bae sain,
saia deḳoin, hasaror aḳoldar kunu manush ase ni,
Allar ashik-deoana ḳeu ase ni.
3 Tain deḳla, hoḳol manush be-foti oigese,
hokkol eḳloge naforman bonigese,
hok kam ḳore ila ḳeu nai, eḳzon-o nai.
4 Ou bojjat oḳlor maze kunu aḳol nai ni?
Manshe zela ḳana-ḳaiddo ḳain,
tara ola amar bondare ḳailae,
Alla Mabudor nam-o ae na tarar mukedi.
5 Tara ḍoror suṭe tor-toraia ḳafiba,
Alla Pak to tan ashikor maze boshot ḳoroin.
6 Tumrar sinta oilo binash ḳora duki-kangalor asha-borosha,
oile Mabud-u tarar asroy ṭikana.
7 Boni Israilor basar fot Sion faṛ taki lamia auk!
Mabude zebla tan proza oḳlor halot bodlaiba,
Iakubor ḳandane ou shomoy furti-amud ḳorba,
Boni Israile kushir shukur-guzari gaiba.