8
Allar goror serag dani
1 Mabude Musa nobire ḳoila,
2 “Tumi Harunre ḳo, amar goror serag danir mazor shatoṭa serag ou nomunae lagaita, zate seragor for serag danir samna bae foṛe.”
3 Harune ola-u ḳorla. Musare batail Mabudor hukum mafik tain hoḳol serag olaḳan boaila, zate seragor for serag danir samnedi foṛe.
4 Serag danir tol taki agar ful forzonto astaṭa ḳaṭi shuna fiṭaia banail oilo. Mabude Musare zela noksha deḳaisla, ṭik ou laḳan serag dani banail oilo.
Lebi kandanre pak-pakiza ḳora
5 Mabude Musare ḳoila,
6 “Tumi Boni Israilor maz taki, Lebi kandanre alog koria pak-pakiza ḳoro.
7 I pak-pakiza ḳorar niom oilo, foyla tarar ufre fak-fobitro oar fani siṭaia dibae, siṭaia tara nize asta shorilor sul ḳamaia ḳafoṛ-sufoṛ doia fak-saf bonba.
8 Ar tara kurbanir lagi egu bisal anba, bisalor loge dan-gomor sodgar lagi tel maḳail moyda, gunar koforar kurbanir lagi-o aroḳṭa bisal anaio.
9 Bade tumi Lebi oḳolre loia Milon-tambur samne aibae, aia hokkol Boni Israilre hono dola ḳorbae.
10 Lebi oḳolre tumi Mabudor dorbaro azir ḳorbae ar hoḳol Boni Israile tarare ataia shofia diba.
11 Imam Harune hoḳol Boni Israilor fokko taki, dulona kurbani hishabe Lebi oḳolre Mabudor samne boḳshia diba, teu tara Mabudor kezmoto ḳam-ḳaz ḳorta farba.
12 Bade Lebi oḳole hou duio bisalor ḳollar ufre atai diba, dile tumi er eḳṭa dia gunar koforar kurbani ar dusraṭa dia zalail kurbani adae ḳorio. Olaḳan Lebi oḳlor nafakir kofora adae oibo.
13 Tumi Lebi oḳolre Harun ar tar fuaintor samne uba ḳoraia, Mabudor name tarare dulona kurbani hishabe shofia dibae.
14 Ou laḳan tumi oinno Boni Israil taki Lebi kandanre alog korbae, teu tara ḳali amar oiba.
15 “Lebi oḳolre pak-pakiza ḳoria dulona kurbani hishabe shofia dia harle, tara Milon-tambur kezmoto aiba.
16 Boni Israil taki basia alog kora i Lebi kandan ḳali amar, ar ḳeuror nae. Forteḳ Israili beṭintor foyla fuar bodla ami Lebi kandanre amar nizor banaisi.
17 Boni Israilor goro zonom loa hoḳol foyla fuain amar. Ami Mishori oḳlor foyla fuaintore marilibar ḳalo, Boni Israilor forteḳ foyla fuare amar lagi fobitro ḳoria raḳsi, ita manshor fut ouk ba foshur baichcha ouk, ita to amar.
18 Ar oḳon ami Boni Israilor foyla fuaintor zagat ḳali Lebi oḳolre amar nizor ḳoia kobul ḳorsi.
19 Ou Lebi oḳolre ami Harun ar tar fuaintore shomzaisi, zate tara Boni Israilor oia Milon-tambur kezmot ḳoroin, tarar gunar koforar usilla ḳoroin. Erlagi Boni Israilor ḳeu amar goror ḳandat aile-o tar ufre kunu gozob lamto nae.”
20 Mabude Lebi oḳlor befare Musa nobire zela hukum disla, ou hukum mafik Musa, Harun ar hoḳol Boni Israile ola ḳorla.
21 Lebi oḳole nizore fak-saf ḳoria hari tarar ḳafoṛ-sufoṛ-o toila. Bade Harune tarare Mabudor name dulona kurbani hishabe shofia dila, ar tarare pak-pakiza ḳorar niote tarar gunar koforar bebosta ḳorla.
22 Erbade Lebi oḳol-o Harun ar tan fuaintor zimmae Milon-tambur ḳadimdarit gela. Gele Mabude Musare Lebi oḳlor befare zela hukum disla, ṭik oula ḳora oilo.
23 Bade Mabude Musare ḳoila,
24 “Lebi oḳlor befare ou niom salu oibo, tarar maze fosish bosor ba tar beshi boyoshi manshe Milon-tambur ḳam-ḳaz ḳorba,
25 oile foinchash bosor oia harle tara oboshor failiba, kezmot ḳam bad dilaiba.
26 Ou shomoy tara nizor ate Milon-tambur kunu ḳam ḳora nished, oile tarar mone saile baiaintore Milon-tambur ḳamo shae-shaijjo ḳorba. Ou niome tumi Lebi oḳlor ḳam-ḳaz ṭik kori dibae.”