21
Orador bashshar loge laṛai
1 Ar Kenani zatir Orad deshor bashsha Negeb morubumit boshot ḳoroin, ein ḳobor faila, Boni Israil zati Otarimor fotedi aṭia aira, oḳan hunia bashshae tarar ufre hamla ḳoria ḳoyzonre doria nilagi.
2 Teu Boni Israile Mabudor dorbaro mannot mania ḳoilo, “O Mabud, tumi zudi Orador ou bashinda oḳolre amrar ato shofia deo, te amra tarar gau-geram ar ṭaun oḳol ekkebare binash ḳorilimu.”
3 Mabude tarar minoti kobul ḳorla, ar onor Kenani oḳolre tarar ato shofi dila. Tara era hokkolre ar erar ṭaun oḳolre ekkebare binash ḳorillo. Erlagi ou zagar nam oilo Horma, mani binash.
Tamar haf bananir goṭona
4 Erbade Boni Israile Idum deshor galabae guria zaoar lagi Hur faṛor ges taki Nil doriar faredi roana dila. Oile fotor maze tara odoirjo oia,
5 Musa nobi ar Alla Pakor birudde mata-mati lagaila, tara ḳoila, “Amrare Mishor desh taki kene bar ḳori anlae, ou morubumit ania marar lagi ni? Ino to ḳani-o nai, fani-o nai. Ar ola baze ḳani amra dui souke deḳtam fari na.”
6 Ou shomoy Mabude tarar maze bout bishakto haf faṭaila. Hafor ḳamoṛe tarar bout zon mara gela.
7 Teu manshe gia Musare ḳoila, “Amra to afnar ar Mabudor birudde matia guna ḳorilisi. Te afne oḳon Mabudor dorbaro minoti koroukka, zate ou haf guin amrar ges taki horaia neingi.” Teu Musae tarar lagi minoti korla.
8 Mabude Musare ḳoila, “Tumi eḳṭa haf banaia usa ek kuṭir ufre to. Ze manshore hafe ḳamṛaibo, he tumar ou hafor bae saile bala oizibo.”
9 Teu Musae ḳaṭi tamadi eḳ haf banaia kuṭir ufre toila. Kunu zonre hafe ḳamṛaile he ou tamar hafor bae saito, ar basizito.
Muab desho zaoa
10 Bade Boni Israile roana dila, ar Obut namor zagat gia tambu gaṛila.
11 Ar Obut taki roana oia Muab deshor fubor shimanat, morubumir Iya-Abarimo aia tambu ṭanaila.
12 Oḳan taki roana oia Zered namor hukna ḳalor faro gia tambu gaṛila.
13 Zered taki roana dia Ornon hukna ḳalor hofaro gia tambu ṭanaila. Amuri oḳlor desho taki ze morubumi shuru oise, i kal asil ou morubumit. Ḳalor eḳ faro Muab desh, oinno faro Amuri oḳlor desh.
14 Mabudor Jihad namor kitabo to ase,
“Shufa elaḳar Baheb ar Ornon hukna ḳal,
15 Aur ṭaunor muka zaora usa-nisa nal,
ita to Muab deshor eḳ shimana.”
16 Oḳan tone roana oia tara Ber namor ek kuar gese aila. Ono aia harle Mabude Musare ḳoila, “Tumi hoḳol manshore ekḳano dola ḳoro, ami tarare fani dimu.”
17 Ikan hunia Boni Israile ou gozol gailo,
“O kua, tumar fani utlia foṛouk.
Tumra kuar ḳatire gozol gao.
18 Ikṭa to hou shordar oḳlor kua,
raza oḳole tarar laṭir bole kudisoin,
ḳandani gollar zure ḳorsoin.”
Bade tara morubumi taki Mottana namor zagat gela.
19 Mottana taki Noholiel, Noholiel taki Bamut,
20 Bamut taki Muabor faṛia ek kalor faro gela. Ou ḳalor ḳandar Pisga faṛor usa ṭilla taki morubumi deḳa zae.
Bashsha Sihun ar Uzor binash
21 Boni Israile Amuri oḳlor bashsha Sihunor gese manush faṭaia minot ḳorla,
22 “Amra afnar deshor bitredi faroi zaitam sairam, amrare zaibar diba ni? Amra to Raz Fot saṛia ḳet-kishi bae ba angur baganedi zaitam nae, kunu kuar fani-o ḳaitam nae. Afnar deshor shimana faronir ag forzonto hamesha Raz Fotedi aṭat roimu.”
23 Oile bashsha Sihune tan deshor bitredi tarare zaite dila na. Tain tan sifai dol loia morubumir maze Boni Israilor loge zuddot bar oila. Tain Iyahaz ṭauno aia tarar loge zuddo lagaila.
24 Zuddot Boni Israile hou bashshare toluardi kaṭia Ornon ḳal taki Zabbuk kal forzonto tar asta desh doḳol ḳorilila. Tara Boni-Ammanor shimana forzonto hoḳol zaga doḳol ḳorla, oile Boni-Ammanor shimana asil kub mozbut, ikanre ḍingaia zaoa ḳoṭin.
25 Boni Israile Hishbon ar er ash-fashor gau-geram shudda Amuri oḳlor hoḳol ṭaun doḳol ḳoria hono boshoti gaṛila.
26 Hishbon asil to Amuri bashsha Sihunor razdani. Tain Muab deshor agor bashshar loge zuddo ḳoria Ornon ḳal forzonto asta desh doḳol ḳorsila.
27 Erlagi kobi oḳole ḳoin,
“Ao tumra hoḳol, Hishbon ṭauno ao,
raza Sihunor ṭaunre noya ḳori banao.
28 Sihunor ou ṭaun taki aguin bar oia,
Muabor Aur ṭaunre sarḳar ḳorlo zalaia,
Ornon ḳalor usa zaga binash oigelo,
honor hoḳol ṭakurre zalaia marillo.
29 Haere Muab, shorbonash!
O Komush-devtar bokto oḳol
tumra to binash oigelae.
Komushor fuain bagia horigese,
tar fuṛin oḳol bondi oise,
Amuri bashsha Sihunor ato bondi tara.
30 Amra-u to tarar loge zuddo ḳorsi,
Diban forzonto asta Hishbon binash ḳorsi,
tarar batti amra nibailisi,
Nufa ar Medeba forzonto dongsho-lila salaisi.”
31 Erbad taki Boni Israile Amuri oḳlor desho boshot ḳorat roila.
32 Hozrot Musae Zazira ṭauno guia faṭanir bade Boni Israile ou ṭaunor ash-fashor gau-geram hoḳolta doḳol ḳorla, ar honor bashinda Amuri oḳolre ḳedai dila.
33 Bade tara firia Bashon deshor bae roana oila. Teu Bashonor bashsha Uze tar hoḳol sifai loia tarar loge zuddo ḳorar lagi Idri ṭauno aia azilo.
34 Ou shomoy Mabude Musare ḳoila, “Tumi bashsha Uzre ḍoraio na, ami tare, tar asta deshre ar hoḳol sifaire tumar ato tuli disi. Erlagi Hishbonor Amuri oḳlor bashsha Sihunre tumi ze dosha goṭaislae, ogure-o ola ḳorio.”
35 Teu tara bashsha Uz, tar fuain ar hoḳol manshore binash ḳorla. Hesh-mesh tara ḳeu ar zinda roilo na. Boni Israile ou fura desh doḳol ḳorla.